ନାଉଗାଁ,୨୬।୩(ସ୍ବ.ପ୍ର): ଶିକ୍ଷକମାନଙ୍କର ପଦୋନ୍ନତି ପାଇଁ ପ୍ରତିବର୍ଷ ଶିକ୍ଷା ବିଭାଗ ପକ୍ଷରୁ ଶିକ୍ଷକମାନଙ୍କର ଗ୍ରେଡେଶନ ତାଲିକା ପ୍ରସ୍ତୁତ କରାଯାଇଥାଏ। ଏହି ଗ୍ରେଡେଶନ ତାଲିକା ଜିଲା ଶିକ୍ଷାଧିକାରୀ ଓ ବ୍ଲକ ଶିକ୍ଷାଧିକାରୀଙ୍କ କାର୍ଯ୍ୟାଳୟ ପକ୍ଷରୁ ପ୍ରସ୍ତୁତ କରାଯାଇ ଶିକ୍ଷା ବିଭାଗକୁ ପ୍ରଦାନ କରାଯାଇଥାଏ। କିନ୍ତୁ ଜଗତ୍ସିଂହପୁର ଜିଲା ନାଉଗଁା ବ୍ଲକ ଶିକ୍ଷାଧିକାରୀଙ୍କ କାର୍ଯ୍ୟାଳୟ ଦ୍ୱାରା ପ୍ରସ୍ତୁତ ହୋଇଥିବା ୩ ବର୍ଷର ଗ୍ରେଡେଶନ ତାଲିକାରେ କିଛି ଶିକ୍ଷକଙ୍କ ଶିକ୍ଷାଗତ ଯୋଗ୍ୟତା ଓ ତାଲିମ ଯୋଗ୍ୟତାରେ ତାଳମେଳ ନ ଥିବା ଜନ ସୂଚନା ଅଧିକାର ଆଇନ ବଳରେ ମିଳିଥିବା ତଥ୍ୟରୁ ଜଣାଯାଇଛି। ସୂଚନା ଅନୁସାରେ, ଜନୈକ ସୂଚନା ଅଧିକାର କର୍ମୀ ଜନସୂଚନା ଆଇନ ବଳରେ ଜଗତ୍ସିଂହପୁର ଜିଲା ଶିକ୍ଷାଧିକାରୀଙ୍କ କାର୍ଯ୍ୟାଳୟକୁ ନାଉଗଁା ବ୍ଲକ ଶିକ୍ଷାଧିକାରୀଙ୍କ କାର୍ଯ୍ୟାଳୟ ଶିକ୍ଷକଙ୍କ-୨୦୨୦, ୨୦୨୧ ଓ ୨୦୨୨ର ଗ୍ରେଡେଶନ ତାଲିକାର ତଥ୍ୟ ମାଗିଥିଲେ। ନାଉଗଁା ବ୍ଲକ ଶିକ୍ଷାଧିକାରୀଙ୍କ କାର୍ଯ୍ୟାଳୟର ପତ୍ରସଂଖ୍ୟା-୪୫୦/୧୦ା୩ା୨୦୨୩ରେ ଜନସୂଚନା ଅଧିକାରୀଙ୍କ ପକ୍ଷରୁ ସମ୍ପୃକ୍ତ ସୂଚନା ଅଧିକାର କର୍ମୀଙ୍କୁ ତଥ୍ୟ ଯୋଗାଇ ଦିଆଯାଇଥିଲା। ମିଳିଥିବା ତଥ୍ୟ ଅନୁସାରେ, ନାଉଗଁା ବ୍ଲକ ଶିକ୍ଷାଧିକାରୀଙ୍କ କାର୍ଯ୍ୟାଳୟର ଶିକ୍ଷକଙ୍କ ଗ୍ରେଡେଶନ ତାଲିକା ୨୦୨୦ରେ ଶିକ୍ଷକ ଲକ୍ଷ୍ମୀଧର ବେହେରାଙ୍କ ଆଇଏ(ସିଟି) ରହିଥିବାବେଳେ ତାଲିକା ୨୦୨୧ରେ ଆଇଏ(ସିଟି) ଓ ତାଲିକା ୨୦୨୨ରେ ଯୁକ୍ତ ୩ କଳା(ସିଟି)ରହିଛି। ସେହିପରି ଶିକ୍ଷକ ଦିଲୀପ କୁମାର ମହାପାତ୍ରଙ୍କ ତାଲିକା ୨୦୨୦ରେ ଆଇଏ(ସିଟି) ରହିଥିବା ବେଳେ ୨୦୨୧ରେ ଆଇଏ(ସିଟି) ଓ ୨୦୨୨ରେ ଯୁକ୍ତ ୩ କଳା(ସିଟି) ଦର୍ଶାଯାଇଛି। ସେହିପରି ଶିକ୍ଷୟିତ୍ରୀ ରିନା ବେହେରାଙ୍କ ତାଲିକା ୨୦୨୦ରେ ଯୁକ୍ତ ୩ କଳା(ସିଟି) ରହିଥିବା ବେଳେ ୨୦୨୧ରେ ଯୁକ୍ତ୩ କଳା(ସିଟି) ଓ ୨୦୨୨ରେ ଯୁକ୍ତ ୩କଳା(ବିଇଡି), ଶିକ୍ଷୟିତ୍ରୀ ଖୁଲଣା ଦାସଙ୍କ ତାଲିକା ୨୦୨୦ରେ ଯୁକ୍ତ୨କଳା(ସିଟି) ରହିଥିବାବେଳେ ୨୦୨୧ରେ ଯୁକ୍ତ ୩ କଳା(ସିଟି) ଓ ୨୦୨୨ରେ ଯୁକ୍ତ ୩ କଳା(ସିଟି) ଉଲ୍ଲେଖ ରହିଛି। ଶିକ୍ଷୟିତ୍ରୀ ପ୍ରିୟତମା ସ୍ବାଇଁଙ୍କର ତାଲିକା ୨୦୨୦ରେ ମାଟ୍ରିକ୍(ସିଟି) ରହିଥିବା ବେଳେ ୨୦୨୧ରେ ମାଟ୍ରିକ୍(ସିଟି) ଓ ୨୦୨୨ରେ ଯୁକ୍ତ୨(ସିଟି)ଦର୍ଶାଯାଇଛି। କେବଳ ଏତିକି ଶିକ୍ଷୟିତ୍ରୀ ଓ ଶିକ୍ଷକ ନୁହନ୍ତି, ଏହି ଗ୍ରେଡେଶନ ତାଲିକାରେ ଏଭଳି ଆହୁରି ଅନେକଙ୍କ ଏପରି ହୋଇଥିବା ଜଣାଯାଇଛି। ଏହି ୩ ବର୍ଷର ତାଲିକାକୁ ଅନୁଧ୍ୟାନ କଲେ ଜଣାଯାଉଛି, ଉପରୋକ୍ତ ଶିକ୍ଷୟିତ୍ରୀ, ଶିକ୍ଷକମାନେ ନିଯୁକ୍ତ ହେବା ପରେ ଉଚ୍ଚଶିକ୍ଷା ଗ୍ରହଣ କରିଛନ୍ତି। ଏଠାରେ ପ୍ରଶ୍ନ ଉଠୁଛି, ଉପରୋକ୍ତ ଶିକ୍ଷୟିତ୍ରୀ ଶିକ୍ଷକମାନେ କେବେ ଓ କେଉଁବର୍ଷ ଉଚ୍ଚଶିକ୍ଷା ଗ୍ରହଣ କରିବା ପାଇଁ ଆବେଦନ କରିଥିଲେ। ଯଦି ଆବେଦନ କରିଥିଲେ, ଶିକ୍ଷା ବିଭାଗଠାରୁ ଅନୁମତି ନେଇ ଆବେଦନ କରିଛନ୍ତି କି ନାହିଁ, ଏହାର ଉଚ୍ଚସ୍ତରୀୟ ତଦନ୍ତ କରାଗଲେ ଆହୁରି ବହୁ ତଥ୍ୟ ସାମ୍ନାକୁ ଆସିପାରିବ ବୋଲି ମତପ୍ରକାଶ ପାଇଛି।
ଏ ସମ୍ପର୍କରେ ଜିଲା ଶିକ୍ଷାଧିକାରୀ ନିରଞ୍ଜନ ବେହେରାଙ୍କୁ ପଚାରିବାରେ, ପ୍ରସଙ୍ଗକୁ ଏଡ଼ାଇବାକୁ ଯାଇ ଏ ବିଷୟରେ ମୁଁ ଜାଣିନାହିଁ। ବ୍ଲକ ଶିକ୍ଷାଧିକାରୀଙ୍କୁ ପଚାରିଲେ କହି ପାରିବେ ବୋଲି କହିଥିଲେ। ଏ ବିଷୟରେ ବ୍ଲକ ଶିକ୍ଷାଧିକାରୀ ମନୋରମା ରାଉତଙ୍କ ସହ ମୋବାଇଲ୍ ଫୋନ୍ ଯୋଗେ ଯୋଗାଯୋଗ କରା ଯାଇଥିଲେ ମଧ୍ୟ ସେ ଉଠାଇ ନ ଥିଲେ।
