ମହାକାଳପଡ଼ା, ୧୯ା୪(ପ୍ରତାପ ଚନ୍ଦ୍ର ସ୍ବାଇଁ): ସରକାର ପାମ୍ ଜାତୀୟ ଗଛ ରୋପଣ କରିିବା ପାଇଁ ଗୁରୁତ୍ୱାରୋପ କରୁଛନ୍ତି। ରାସ୍ତା ପାଶର୍ବ, ଖୋଲା ପଡ଼ିଆ, ନଦୀ, ନାଳ, କେନାଲ ପାର୍ଶ୍ୱ ଆଦି ସ୍ଥାନଗୁଡ଼ିକରେ ବ୍ୟାପକ ପରିମାଣରେ ବୃକ୍ଷ ରୋପଣ କରିବାକୁ ସଚେତନତା ସୃଷ୍ଟି କରାଯାଉଛି। ବିଶେଷକରି ଉପକୂଳ ଅଞ୍ଚଳଗୁଡ଼ିକରେ ପ୍ରାକୃତିକ ବିପର୍ଯ୍ୟୟ ରୋକିବା, ମୃତ୍ତିକା ସନ୍ତୁଳନ ରକ୍ଷା କରିବା ଆଦି କ୍ଷେତ୍ରରେ ଖଜୁରି, ତାଳ ଗଛଗୁଡ଼ିକ ଭୂମିକା ଖୁବ୍ ଗୁରୁତ୍ୱପୂର୍ଣ୍ଣ। କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଅଞ୍ଚଳରେ ଥିବା ଖଜୁରି ଗଛଗୁଡ଼ିକୁ କେତେଜଣ ବ୍ୟବସାୟୀ ଗଛ ଉପର ଅଂଶ କାଟି ଯତ୍ନର ସହ ତାଡି ଗାଡୁଆ ବସାଇ ରସ ନିଗାଡୁ ଛନ୍ତି। ସେହି ରସରେ ବିଭିନ୍ନ ନିଶା ବଟିକା ପକାଇ ଖୁଲୁମଖୁଲା ଭାବେ ବିକ୍ରି କରୁଛନ୍ତି। ଏହି ନିଶା ଯୁକ୍ତ ତାଡ଼ିକୁ ପାନ କରି ଯୁବ ସମାଜ ପଥଭ୍ରଷ୍ଟ ହେଉଛନ୍ତି। ବେପାରୀମାନେ ଏହି ଖଜୁରି ତାଡ଼ି ବିଭିନ୍ନ ସ୍ଥାନରେ, ଛକ, ଗଳିକନ୍ଦିରେ ଭଲ ବ୍ୟବସାୟ କରୁଛନ୍ତି। ବିଶେଷକରି ନିଛାଟିଆ ସ୍ଥାନରେ ବିକ୍ରି ହେଉଥିବା ଦେଖିବାକୁ ମିଳୁଛି। ଏହି ଗଛର ଉପରଅଂଶ କାଟିବା ଦ୍ୱାରା ଗଛ ପ୍ରଭାବିତ ହୋଇ ଫଳ ଫଳିବାରେ ଦିନକୁ ଦିନ ହ୍ରାସ ପାଇବାରେ ଲାଗିଛି। ନଦୀ ପାଶର୍ବରେ ଥିବା ଗଛଗୁଡ଼ିକରେ ଫଳ ଝଡ଼ିବା ଦ୍ୱାରା ବହୁସଂଖ୍ୟାରେ ଚାରା ସୃଷ୍ଟି ହୋଇଥାଏ। ଫଳରେ ଏହି ପାମ୍ ଜାତୀୟ ଗଛଗୁଡ଼ିକ ମୃତ୍ତିକା ଅବକ୍ଷୟକୁ ରୋକିଥାଏ। ଯଦି ଏହି ପରିମାଣରେ ଗଛ କଟାଯାଏ ତେବେ ଖୁବ୍ କମ୍ଦିନ ମଧ୍ୟରେ ପ୍ରାକୃତିକ ପରିବେଶ ସନ୍ତୁଳନ ରକ୍ଷା କରିବାରେ ପ୍ରଭାବିତ ହେବ ବୋଲି ବୁଦ୍ଧିଜୀବୀ ମହଲରେ ଅସନ୍ତୋଷ ପ୍ରକାଶ ପାଇଛି।
