ନୂଆଦିଲ୍ଲୀ,୪ା୧୧: ସୁପ୍ରିମକୋର୍ଟରେ ବିଚାରାଧୀନ ସଦ୍ୟ ପ୍ରସଙ୍ଗଗୁଡ଼ିକର ଶୁଣାଣି ପାଇଁ ଆଉ ଅଧିକ ସମୟ ନ ମାଗିବାକୁ ଭାରତର ପ୍ରଧାନ ବିଚାରପତି (ସିଜେଆଇ) ଡି.ଓ୍ବାଇ. ଚନ୍ଦ୍ରଚୂଡ଼ ଶୁକ୍ରବାର ଓକିଲମାନଙ୍କୁ ପରାମର୍ଶ ଦେଇଛନ୍ତି। ହିନ୍ଦୀ ଫିଲ୍ମ ‘ଦାମିନୀ’ରେ ଅଭିନେତା ସନ୍ନି ଦେଓଲଙ୍କ ଡାଇଲଗ୍କୁ ମନେପକାଇ ସିଜେଆଇ କହିଛନ୍ତି, ସୁପ୍ରିମକୋର୍ଟକୁ ‘ତାରିଖ ପେ ତାରିଖ’ କୋର୍ଟ କରିବାକୁ ସେ ଚାହୁଁନାହାନ୍ତି।
ସର୍ବୋଚ୍ଚ ଅଦାଲତରେ ଶୁଣାଣି ଆରମ୍ଭ ହେବା ପରେ ସିଜେଆଇ ଚନ୍ଦ୍ରଚୂଡ଼ ଗତ ୨ ମାସ ମଧ୍ୟରେ ଆଇନଜୀବୀମାନେ ମାଗିଥିବା ତାରିଖକୁ ନେଇ ଅସନ୍ତୋଷ ବ୍ୟକ୍ତ କରିଥିଲେ। କେବଳ ସେପ୍ଟେମ୍ବର ଓ ଅକ୍ଟୋବରରେ ଆଇନଜୀବୀମାନେ ନୂଆ ମାମଲାଗୁଡ଼ିକରେ ୩,୬୮୮ ଥର ଆଡ୍ଜର୍ନମେଣ୍ଟ ସ୍ଲିପ୍ ଦାଖଲ କରି ଅଧିକ ସମୟ ମାଗିଥିଲେ। ଅତି ଜରୁରୀ ନ ପଡ଼ିଲେ ଦୟାକରି ଆଡ୍ଜର୍ନମେଣ୍ଟ ସ୍ଲିପ୍ ଦାଖଲ କରନ୍ତୁ ନାହିଁ। ଏହି କୋର୍ଟକୁ ମୁଁ ‘ତାରିଖ ପେ ତାରିଖ’ କୋର୍ଟରେ ପରିଣତ କରିବାକୁ ଚାହୁଁନାହିଁ ବୋଲି ଜଷ୍ଟିସ୍ ଜେ.ବି. ପରଡିଓ୍ବାଲା ଏବଂ ମନୋଜ ମିଶ୍ରଙ୍କୁ ନେଇ ଗଠିତ ଖଣ୍ଡପୀଠର ଅଧ୍ୟକ୍ଷତା କରୁଥିବା ସିଜେଆଇ ପ୍ରକାଶ କରିଥିଲେ। ସିଜେଆଇ ଆହୁରି କହିଥିଲେ, ବର୍ତ୍ତମାନ ଓକିଲ ସଂଘଗୁଡ଼ିକର ସହଯୋଗକ୍ରମେ ନୂଆ ମାମଲାଗୁଡ଼ିକୁ ତାଲିକାଭୁକ୍ତ କରିବା ନେଇ ସମୟ ବ୍ୟବଧାନ ହ୍ରାସ ପାଇଛି। କିନ୍ତୁ ସେଗୁଡ଼ିକ ଖଣ୍ଡପୀଠଙ୍କ ନିକଟରେ ଶୁଣାଣି ପାଇଁ ଲିଷ୍ଟିଂ ହେବା ପରେ ଓକିଲମାନେ ଆଡଜର୍ନମେଣ୍ଟ କଲ୍ଚର ଆପଣାଉଛନ୍ତି। ଏହା ବାହ୍ୟ ଦୁନିଆକୁ ଅତି ଖରାପ ସନ୍ଦେଶ ଦେଉଛି। ନଭେମ୍ବର ୩ ପାଇଁ ଆମେ ୧୭୮ ଆଡଜର୍ନମେଣ୍ଟ ସ୍ଲିପ୍ ପାଇଛୁ। ଅକ୍ଟୋବାର ଆରମ୍ଭରୁ ପ୍ରତିଦିନ ଏଭଳି ୧୫୦ ସ୍ଲିପ୍ ମିଳିଛି। ମାମଲାର ଶୁଣାଣିକୁ ତ୍ୱରାନ୍ବିତ କରିବାରେ ଏହା ବଡ଼ ବାଧକ ବୋଲି ସିଜେଆଇ କହିଛନ୍ତି।
ପ୍ରକାଶ ଯେ, ୧୯୯୩ରେ ମୁକ୍ତିଲାଭ କରିଥିବା ‘ଦାମିନୀ’
ସୁପ୍ରିମକୋର୍ଟ ‘ତାରିଖ ପେ …
ଫିଲ୍ମରେ ସନ୍ନି ଦେଓଲ ଜଣେ ଓକିଲ ଭୂମିକାରେ ନଜରକୁ ଆସିଥିଲେ। ସେ ନିଜ ମହକିଲ (ଜଣେ ବଳାତ୍କାର ପୀଡ଼ିତା)ଙ୍କ ପାଇଁ ମାମଲା ଲଢ଼ୁଥିବାବେଳେ ଅଭିଯୁକ୍ତଙ୍କ ଓକିଲ ଭୂମିକାରେ ଥିବା ଅମରୀଶ ପୁରୀ ଅଦାଲତଙ୍କୁ ଅଧିକ ସମୟ ମାଗିଥିଲେ। ଏହାକୁ ନେଇ ସନ୍ନି ଦେଓଲ ବିରକ୍ତି ଭାବ ପ୍ରକାଶ କରି ଏହି ‘ତାରିଖ ପେ ତାରିଖ’ ଡାଇଲଗ୍ ମାରିଥିଲେ, ଯାହାକି ଅଦ୍ୟାବଧି ସିନେପ୍ରେମୀଙ୍କ ମଧ୍ୟରେ ଲୋକପ୍ରିୟ ହୋଇ ରହିଆସିଛି।
