ଢେଙ୍କାନାଳ ଅଫିସ, ୧୭ା୧୨: ଢେଙ୍କାନାଳ ସହର ଉପକଣ୍ଠ ବୋରାପଦାସ୍ଥିତ ସରକାରୀ ଆଇଟିଆଇ କଲେଜ କ୍ୟାମ୍ପସ୍ରେ ଶୁକ୍ରବାର ଅଭାବନୀୟ ଘଟଣା ଘଟିଛି। ପ୍ରାର୍ଥନା ସଭା ଚାଲିଥିବାବେଳେ ଇଲେକ୍ଟ୍ରିକାଲ ବ୍ରାଞ୍ଚ୍ର ପ୍ରଥମ ବର୍ଷ ଛାତ୍ର ଅଭିଜିତ୍ ଦାସ (୧୭)ଙ୍କ ଅସ୍ବାଭାବିକ ମୃତ୍ୟୁ ଘଟିଛି। ଅଭିଜିତ୍ଙ୍କ ଘର କାମାକ୍ଷାନଗର ଉପଖଣ୍ଡ ସରଦେଇପୁର ଜିରାଳ ଗ୍ରାମରେ। କଲେଜରେ ପୂର୍ବାହ୍ନ ୯ଟା ୧୦ରୁ ୯ଟା ୨୫ ପର୍ଯ୍ୟନ୍ତ ପ୍ରାର୍ଥନ ସଭା ହେଉଥିବାବେଳେ ସେ ଯୋଗଦେଇଥିଲେ। ତେବେ ହଠାତ୍ ତାଙ୍କ ଶରୀର ଥରିଥିଲା। କିଛିକ୍ଷଣ ମଧ୍ୟରେ ସେ ଚେତାଶୂନ୍ୟ ହୋଇ ଟଳିପଡ଼ିଥିଲେ। ତାଙ୍କୁ ଜିଲା ଚିକିତ୍ସାଳୟରେ ଭର୍ତ୍ତି କରାଯାଇଥିବାବେଳେ ଡାକ୍ତର ମୃତ ଘୋଷଣା କରିଥିଲେ।
ଏ ସଂକ୍ରାନ୍ତରେ ସହକାରୀ ଟ୍ରେନିଂ ଅଫିସର ଧନେଶ୍ୱର ବେହେରା କହିଛନ୍ତି, ହଷ୍ଟେଲରେ ରହୁଥିବା ଅଭିଜିତ୍ ନିର୍ଦ୍ଧାରିତ ସମୟରେ ପ୍ରାର୍ଥନା ସଭାରେ ଯୋଗ ଦେଇଥିଲେ। ଅସୁସ୍ଥ ହୋଇ ତଳେ ପଡ଼ିଯିବା ପରେ ତାଙ୍କୁ କଲେଜ ଗାଡ଼ିରେ ଜିଲା ଚିକିତ୍ସାଳୟକୁ ନିଆଯାଇଥିଲା। ସେଠାରେ ଡାକ୍ତର ମୃତ ଘୋଷଣା କରିଥିଲେ। ପୂର୍ବରୁ ତାଙ୍କର ଦେହ କେବେ ଖରାପ ହୋଇଥିବା ଆମେ ଜାଣିନାହୁଁ ବୋଲି ଟ୍ରେନିଂ ଅଫିସର ବେହେରା ସୂଚନା ଦେଇଛନ୍ତି। ଅଭିଜିତ୍ଙ୍କ ଏଭଳି ବିୟୋଗକୁ ନେଇ କଲେଜରେ ଶୋକାକୁଳ ପରିବେଶ ସୃଷ୍ଟି ହୋଇଛି। ମୃତଦେହ ବ୍ୟବଚ୍ଛେଦ ପରେ ପରିବାରକୁ ହସ୍ତାନ୍ତର କରାଯାଇଛି। ଏ ନେଇ ସଦର ଥାନାରେ ଏକ ଅପମୃତ୍ୟୁ ମାମଲା ରୁଜୁ ହୋଇଛି।
