ଢେଙ୍କାନାଳ ଅଫିସ, ୩୦।୭ ଢେଙ୍କାନାଳ ଜିଲା ଦେଇ ଯାଇଥିବା ୫୫ନଂ. ଏନ୍ଏଚ୍ରେ ଯାତ୍ରୀଙ୍କୁ ହାତୀଙ୍କ ଉପସ୍ଥିତି ସମ୍ପର୍କରେ ସୂଚନା ଦେବା ନିମନ୍ତେ ପରୀକ୍ଷାମୂଳକ ଭାବେ ଲାଗିଥିବା ସାଇରନ୍ ଓ ଆଲର୍ଟ ଲାଇଟ୍ ଅଚଳ ହୋଇପଡ଼ିଛି। ପଥଚାରୀମାନେ ହାତୀଙ୍କ ଚଳପ୍ରଚଳ ସମ୍ପର୍କରେ ସୂଚନା ପାଇପାରୁ ନ ଥିବାବେଳେ ସେମାନଙ୍କ ଜୀବନ ବିପଦରେ ପଡୁଛି। ସଦର ରେଞ୍ଜ ଅଧୀନ ରସାସିଂହ ନିକଟ ତଥା ୫୫ନଂ. ଜାତୀୟ ରାଜପଥ ପାର୍ଶ୍ୱରେ ଏକ ସ୍ବେଚ୍ଛାସେବୀ ସଂସ୍ଥା ଦ୍ୱାରା ଉକ୍ତ ସାଇରନ୍ ଏବଂ ରେଡ୍ ଆଲର୍ଟ ଲାଇଟ୍ ଲଗାଯାଇଥିଲା। ଏହାର ଆଖପାଖ ଅଞ୍ଚଳରେ ହାତୀ ଚଳପ୍ରଚଳ ହେଲେ ଏଥିରେ ଖଞ୍ଜାଯାଇଥିବା ସେନ୍ସର ସକ୍ରିୟ ହୋଇ ସାଇରନ ବାଜୁଥିଲା। ଏଥିସହ ରାତ୍ରି ସମୟରେ ନାଲି ଲାଇଟ୍ ଜଳିଉଠୁଥିଲା। ତେବେ ପ୍ରବଳ ବର୍ଷାରେ ପାଣି ପଶିଯିବାରୁ ଏହା ଏବେ ଅଚଳ ହୋଇପଡ଼ିଛି। ଫଳରେ ସାଇନରରୁ ବିକୃତ ଶବ୍ଦ ବାହାରୁଛି। ଏ ନେଇ ସ୍ଥାନୀୟ ବାସିନ୍ଦା ବନ ବିଭାଗକୁ ଅବଗତ କରାଇଛନ୍ତି।
ଅନ୍ୟପଟେ ଅନୁଗୋଳ ଜିଲା ବନ୍ତଳା ସୀମାନ୍ତ ଆମ୍ବିଠି ଗ୍ରାମଦେଇ ଢେଙ୍କାନାଳ ଜିଲାକୁ ହାତୀପଲ ପ୍ରବେଶ କରିଛନ୍ତି। ଫଳରେ ସମ୍ପୃକ୍ତ ଅଞ୍ଚଳର ଚାଷୀ ଚିନ୍ତାରେ ପଡ଼ିଛନ୍ତି। ଶୁକ୍ରବାର ସୁଦ୍ଧା ଜିଲାରେ ୩୨୬ ହାତୀ ରହିଛନ୍ତି। ତନ୍ମଧ୍ୟରୁ କେବଳ ହିନ୍ଦୋଳ ରେଞ୍ଜରେ ୨୨୫ ହାତୀ ଥିବା ବନ ବିଭାଗ ପକ୍ଷରୁ ସୂଚନା ଦିଆଯାଇଛି।
ଏ ସଂକ୍ରାନ୍ତରେ ଜିଲା ବନଖଣ୍ଡ ଅଧିକାରୀ ଡ. ପ୍ରକାଶଚାନ୍ଦ ଗୋଗିନେନି କୁହନ୍ତି, ୫୫ନଂ. ଜାତୀୟ ରାଜପଥରେ ଯାତ୍ରୀ ଓ ଯାନବାହନର ସୁରକ୍ଷା ପାଇଁ ପରୀକ୍ଷାମୂଳକ ଭାବେ ଲାଗିଥିବା ସିଗନାଲ ଓ ରେଡ୍ଲାଇଟରେ ବର୍ଷାପାଣି ପଶି ଖରାପ ହୋଇଯାଇଛି। ଏହାକୁ ମରାମତି କରିବାକୁ କୋଏମ୍ବାଟୁରର ସମ୍ପୃକ୍ତ ସଂସ୍ଥାକୁ ସୂଚନା ଦିଆଯାଇଛି।
