ସୁନ୍ଦରଗଡ,୧୫।୧: ସୁନ୍ଦରଗଡ଼ ସଦର ବ୍ଲକ କିରେଇ ପଞ୍ଚାୟତର ନିଖୋଜ ଗାଁ ସାଥୀ ରମେଶ ସିଂ(୩୫)ଙ୍କୁ ଖଣ୍ଡ ଖଣ୍ଡ କରି ହତ୍ୟା କରାଯାଇଛି । ହତ୍ୟାର କାରଣ ଜଣାପଡି ନ ଥିବା ବେଳେ ପରକୀୟା ପ୍ରୀତିକୁ ନେଇ ଏହା ଘଟିଥିବା କୁହାଯାଉଛି । ସୂଚନା ଯୋଗ୍ୟ, ଗୁରୁବାର ସନ୍ଧ୍ୟାରେ ଟାଉନ ଥାନା ପୋଲିସ ପୁରୁଣା ଟୋଲଗେଟ୍ ନିକଟବର୍ତ୍ତୀ ଏକ ଧାନବିଲ ମଧ୍ୟରୁ ଏକ କଟା ହାତ ଉଦ୍ଧାର କରିବା ପରେ ତନାଘନା ଆରମ୍ଭ କରିଥିଲା। ଶୁକ୍ରବାର ସକାଳେ ପୋଲିସ ସାଇଣ୍ଟିଫିକ୍ ଟିମ୍ ଓ ସନ୍ଧାନୀ କୁକୁର ସହାୟତାରେ ଭବାନୀପୁର ଶୀତଳଭଣ୍ଡାର ନିକଟସ୍ଥ ଏକ ପୋଖରୀ ଭିତରୁ ନିଖୋଜ ଥିବା ଗାଁ ସାଥୀ ରମେଶଙ୍କ କଟାମୁଣ୍ଡ, କଟାହାତ, ଗୋଟିଏ ଗୋଡ ଓ ଗଣ୍ଡି ଉଦ୍ଧାର କରିଥିଲା। ହେଲେ ଅନ୍ୟ ଏକ ଗୋଡ ମିଳି ନ ଥିବାରୁ ପୋଲିସ ଅଗ୍ନିଶମ ବିଭାଗ କର୍ମଚାରୀଙ୍କ ସହାୟତାରେ ପୋଖରୀ ପାଣିକୁ ଶୁଖାଇ ଖୋଜାଖୋଜି କରିଥିଲା। ସୁନ୍ଦରଗଡ଼ ଏସ୍ପି ସାଗରିକା ନାଥଙ୍କ ତତ୍ତ୍ୱାବଧାନରେ ଟାଉନ ଥାନା ଆଇଆଇସି ବିବିତ୍ସ ପ୍ରଧାନ ସଦଳବଳ ଏହି ମାମଲାର ତଦନ୍ତ ଚଳାଇଛନ୍ତି । ଗ୍ରାମସାଥୀ ରମେଶ ଗତ ୧୩ ତାରିଖରୁ ନିଖୋଜ ଥିବା ନେଇ ପରିବାର ଲୋକେ ଟାଉନ ଥାନାରେ ଏତଲା ଦେଇଥିଲେ । ପୋଲିସ ଏକ ନିଖୋଜ ମାମଲା ରୁଜୁ କରି ତଦନ୍ତ ଚଳାଇଥିଲା । ହେଲେ କଟା ହୋଇଥିବା ତାଙ୍କ ଶରୀରର ଅଙ୍ଗ ପ୍ରତ୍ୟଙ୍ଗ ବିଭିନ୍ନ ସ୍ଥାନରୁ ଉଦ୍ଧାର ପରେ ପୋଲିସ ଏକ ହତ୍ୟା ମାମଲା(ନଂ.୨୦/୨୧) ରୁଜୁ କରିଛି। ପୋଲିସ ବିଭିନ୍ନ ଦିଗରୁ ତଦନ୍ତ ଆରମ୍ଭ କରି ଘଟଣାରେ ସମ୍ପୃକ୍ତ ଥିବା ସନ୍ଦେହରେ ୫ଜଣଙ୍କୁ ଥାନାରେ ଅଟକ ରଖି ପଚରାଉଚୁରା ଚଳାଇଛି ।
