ଫୁଲବାଣୀ,୨୭।୧୨(ରାକେଶ କୁମାର ରାଉତ): ଶାସକ ବିଜୁ ଜନତା ଦଳ(ବିଜେଡି) ୨୦୦୦ ମସିହାରୁ କନ୍ଧମାଳ ଜିଲା ଫୁଲବାଣୀ ବିଧାନସଭା ନିର୍ବାଚନମଣ୍ଡଳୀକୁ ହାତରେ ରଖିଆସିଛି।ଏଥର ୬ଷ୍ଠ ପାଳିରେ ମଧ୍ୟ ବିଜେଡି ଏହି ସିଟ୍କୁ ହାସଲ କରିବାକୁ ରଣନୀତି ପ୍ରସ୍ତୁତ କରିଚାଲିଛି। କିନ୍ତୁ ଦଳ ପୁଣି ନୂଆ ନା ପୁରୁଣା ମୁହଁଙ୍କୁ ସୁଯୋଗ ଦେବ, ତାହାକୁ ନେଇ କଳ୍ପନାଜଳ୍ପନା ଆରମ୍ଭ ହୋଇଯାଇଛି। ସେପଟେ ବିରୋଧୀ ଭାଜପା ଏବଂ କଂଗ୍ରେସର ରାଜନୈତିକ ତତ୍ପରତା ସେଭଳି ଦୃଷ୍ଟିଗୋଚର ହେଉନାହିଁ। କହିବାକୁ ଗଲେ ଭାଜପାରେ କିଛି ନୂଆ ମୁହଁ ନିର୍ବାଚନ ମଇଦାନକୁ ଓହ୍ଲାଇବାକୁ ଚେଷ୍ଟା କରୁଥିବା ବେଳେ କଂଗ୍ରେସ ସ୍ଥିତି ଅସ୍ପଷ୍ଟ ରହିଛି।
ଫୁଲବାଣୀ ବିଧାନସଭା ନିର୍ବାଚନମଣ୍ଡଳୀ ଅନୁସୂଚିତ ଜନଜାତି ପାଇଁ ସଂରକ୍ଷିତ। ଏହା ଫୁଲବାଣୀ ପୌରପାଳିକା ସମେତ ଫୁଲବାଣୀ, ଫିରିଙ୍ଗିଆ, ଖଜୁରିପଡ଼ା ଓ ଚକାପାଦ ବ୍ଲକକୁ ନେଇ ଗଠିତ। ପୂର୍ବରୁ କଂଗ୍ରେସର ଗଡ଼ ଭାବେ ପରିଚିତ ଏହି କ୍ଷେତ୍ରକୁ ୨୦୦୦ ମସିହାରୁ ବିଜେଡି ନିଜ ଅକ୍ତିଆରରେ ରଖି ତା’ର ପ୍ରଭାବ ବିସ୍ତାର କରିଚାଲିଛି। ଗତ ତିନୋଟି ନିର୍ବାଚନରେ କଂଗ୍ରେସକୁ ପଛରେ ପକାଇ ଭାଜପା କ୍ରମାଗତ ଶକ୍ତି ବୃଦ୍ଧି କରିବା ସହ ଦ୍ୱିତୀୟ ସ୍ଥାନରେ ରହିଛି। ପଦ୍ମନାଭ ବେହେରା ଏଠାରୁ ଦୁଇ ଥର ବିଧାୟକ ହୋଇ ମନ୍ତ୍ରୀ ହେବାର ସୁଯୋଗ ପାଇଥିଲେ। ସେ ୧୯୯୦ରେ ଜନତା ଦଳ ଓ ୨୦୦୪ରେ ବିଜେଡିରୁ ପ୍ରାର୍ଥୀ ହୋଇ ବିଜୟଲାଭ କରିଥିଲେ। ପରବର୍ତ୍ତୀ ସମୟରେ ତାଙ୍କୁ ବୀରମହାରାଜପୁର ଯିବାକୁ ପଡ଼ିଥିଲା। ଏହା ସତ୍ତ୍ୱେ ଏହି ନିର୍ବାଚନମଣ୍ଡଳୀରୁ ବିଜେଡି ପ୍ରାର୍ଥୀମାନେ ବାରମ୍ବାର ବିଜୟୀ ହୋଇଆସୁଛନ୍ତି। ପଦ୍ମନାଭଙ୍କ ପରେ ୨୦୦୯ରେ ଦେବେନ୍ଦ୍ର କହଁର, ୨୦୧୪ରେ ଦୁଗୁନି କହଁର ଓ ୨୦୧୯ରେ ଅଙ୍ଗଦ କହଁର ଦଳୀୟ ପ୍ରାର୍ଥୀ ହୋଇ ବିଜୟ ଲାଭ କରିଥିଲେ। ଏଭଳି ସ୍ଥିତିରେ ବର୍ତ୍ତମାନର ବିଧାୟକ ଅଙ୍ଗଦଙ୍କୁ ଦଳ ପୁନର୍ବାର ସୁଯୋଗ ଦେବା ଭଳି ଦେଖାଯାଉନାହିଁ ବୋଲି ଆଲୋଚନା ହେଉଛି। ଦୁଗୁନି ସମ୍ଭବତଃ ରାଜନୈତିକ ଅସ୍ଥିରତା ଦେଇ ଗତି କରୁଛନ୍ତି। କାରଣ ତାଙ୍କୁ କୌଣସି ଦଳୀୟ କାର୍ଯ୍ୟକ୍ରମରେ ଦେଖିବାକୁ ମିଳୁନାହିଁ। ବାକି ରହିଲେ ଫୁଲବାଣୀ ଅଞ୍ଚଳର ପୂର୍ବତନ ବିଧାୟକ ଦେବେନ୍ଦ୍ର କହଁର। ବିଗତ ଦୁଇଟି ସାଧାରଣ ନିର୍ବାଚନରେ ସେ ଆଶାୟୀ ଥିଲେ ମଧ୍ୟ ଦଳୀୟ ଟିକେଟ ହାତେଇପାରି ନ ଥିଲେ। ଆସନ୍ତା ସାଧାରଣ ନିର୍ବାଚନରେ ସେ ନିର୍ବାଚନ ରଣାଙ୍ଗନକୁ ଓହ୍ଲାଇବାକୁ ପ୍ରୟାସ ଜାରି ରଖିଥିବା ତାଙ୍କ ସମର୍ଥକମାନେ କହୁଛନ୍ତି। ଫୁଲବାଣୀ ବ୍ଲକରୁ କେବଳ ଦେବେନ୍ଦ୍ରଙ୍କୁ ବାଦ୍ ଦେଲେ ବିଜେଡି ସବୁ ନିର୍ବାଚନରେ ଫିରିଙ୍ଗିଆ ବ୍ଲକରୁ ହିଁ ପ୍ରାର୍ଥୀ ଚୟନ କରିଛି। ତେଣୁ ଆଗାମୀ ନିର୍ବାଚନରେ ଏହି ଧାରା ବଦଳିବ କି ଅପରିବର୍ତ୍ତିତ ରହିବ, ତାହାକୁ ନେଇ ରାଜନୈତିକ ମହଲରେ ଆଲୋଚନା ଜାରି ରହିଛି। ଫିରିଙ୍ଗିଆ ବଡ଼ ବ୍ଲକ ହୋଇଥିବା ବେଳେ ପଦ୍ମନାଭ ବେହେରାଙ୍କ ଏହା ନିଜସ୍ବ ଅଞ୍ଚଳ। ଏବେ ବି ଜିଲା ରାଜନୀତିରେ ତାଙ୍କ ପ୍ରଭାବ ରହିଛି। ଆଗାମୀ ପ୍ରାର୍ଥୀ ମଧ୍ୟ ଏଠାରୁ ହେବା କିଛି ଅସମ୍ଭବ ନୁହେଁ ବୋଲି ଚର୍ଚ୍ଚା ହେଉଛି। ବିଜୟ ସମ୍ଭାବନା ଦୃଷ୍ଟିରୁ ଅନ୍ୟ ଦଳ ଅପେକ୍ଷା ବିଜେଡି ଆଗୁଆ ରହିଛି।
ଗତ ପଞ୍ଚାୟତ ନିର୍ବାଚନରେ ୬ଟି ଜିଲା ପରିଷଦ ଆସନ ମଧ୍ୟରୁ ବିଜେଡି ୪ଟିରେ ବିଜୟୀ ହୋଇଥିବା ବେଳେ ଭାଜପାକୁ ଦୁଇଟି ଆସନ ମିଳିଥିଲା। କଂଗ୍ରେସ ଖାତା ଖୋଲି ପାରି ନ ଥିଲା। ୧୯୮୫ରେ ଶେଷଥର ପାଇଁ ଅଭିମନ୍ୟୁ ବେହେରା କଂଗ୍ରେସ ପ୍ରାର୍ଥୀ ହିସାବରେ ଫୁଲବାଣୀ ବିଧାୟକ ହୋଇଥିଲେ। ତା’ ପରଠାରୁ ଦଳକୁ ପରାଜୟର ମୁହଁ ଦେଖିବାକୁ ପଡ଼ିଛି। ଗତ ସମସ୍ତ ନିର୍ବାଚନରେ କଂଗ୍ରେସ ନୂଆ ନୂଆ ପ୍ରାର୍ଥୀଙ୍କୁ ନେଇ ପରୀକ୍ଷା କରିଛି। କିନ୍ତୁ ସଫଳ ହୋଇନାହିଁ। ୨୦୨୪ ପାଇଁ ମଧ୍ୟ ଦଳରେ କୌଣସି ଉଦୀୟମାନ ପ୍ରାର୍ଥୀ ଦେଖାଯାଉ ନ ଥିବା ଚର୍ଚ୍ଚା ହେଉଛି। କଂଗ୍ରେସ ତୁଳନାରେ ଭାଜପାର ଭୋଟ ହାର ଅପେକ୍ଷାକୃତ ଭଲ ଥିଲେ ମଧ୍ୟ କିଏ ପ୍ରାର୍ଥୀ ହେବେ, ତାହା ଏବେ ସମସ୍ତଙ୍କ ଅଗୋଚରରେ ରହିଛି।
