ବାରିପଦା ଅଫିସ, ୩୧ା୭- ପରିବେଶ ପ୍ରତି ଦୁର୍ବଳତା ରହିଛି ତାଙ୍କର। ସେଥିପାଇଁ ନିଜ ଛାତ ଉପରେ ତିଆରି କରିଛନ୍ତି ସୁନ୍ଦର ବଗିଚା। ଏହି ବଗିଚାରେ ଭଳିକି ଭଳିି ଫୁଲ ଓ ଫଳ ସାଙ୍ଗକୁ ରହିଛି ପନପରିବା ଗଛର ସମ୍ଭାର। ଏହି ବଗିଚାକୁ ଦେଖିଲେ ଯେ କେହି ବି କ୍ଷଣିକ ପାଇଁ ଅଟକିଯିବେ। ଛାତ ଉପରେ ଏହିଭଳି ବଗିଚା ତିଆରି କରିଛନ୍ତି ବାରିପଦା ପୌରପରିଷଦ ଅଧୀନ ୫ନଂ. ୱାର୍ଡ଼ ସୁରୂପନଗର ବାସିନ୍ଦା ଧରଣୀ କୁମାର ଦେ। ଏହି ବଗିଚାକୁ ଦେଖିଲେ ଜଣାପଡ଼େ ଧରଣୀଙ୍କ ପରିବେଶ ପ୍ରତି ଭଲ ପାଇବା କେତେ। ସପେଟା, ପିଜୁଳି, ଆମ୍ବ, ନଡ଼ିଆ, ଡାଳିମ୍ବ, ବରକୋଳି, ଲେମ୍ବୁ, ଭେଣ୍ଡି, ପୋଇ, ପୋଟଳ, ଗୋଲାପ, ଗେଣ୍ଡୁ ଫୁଲ, ଧନିଆ ପତ୍ର, ଲଙ୍କା ଆଦି ୪୦ରୁ ଉର୍ଦ୍ଧ୍ୱ ବିଭିନ୍ନ ଫୁଲ, ଫଳ ଓ ପନିପରିବା ଗଛ ଲଗାଇଛନ୍ତି। କେବଳ ସେତିକ ନୁହେଁ ଥାଲକୁଡ଼ି, ଅଶ୍ୱଗନ୍ଧା ଭଳି ଔଷଧିୟ ବୃକ୍ଷ ମଧ୍ୟ ଲଗାଇଛନ୍ତି ସେ। ଧରଣୀ କୁହନ୍ତି ଯେ, ପିଲାଦିନୁ ଗଛ ପ୍ରତି ତାଙ୍କର ଦୁର୍ବଳତା ଥିଲା। ସହରରେ ରହୁଥିବା ହେତୁ ଗଛ ଲଗାଇବା ପାଇଁ ଜାଗାର ଅଭାବ ଦେଖାଦେଲା। ତେଣୁ ଛାତ ଉପରେ ସେ ବଗିଚା କରିବା ପାଇଁ ନିଷ୍ପତ୍ତି ନେଇଥିଲେ। ପ୍ରଥମେ ମାଟି କୁଣ୍ଡରେ ବିଭିନ୍ନ ଗଛ ଲଗାଇଥିଲେ। ମାତ୍ର ମାଟିକୁଣ୍ଡ ଅଳ୍ପ ଦିନ ପରେ ନଷ୍ଟ ହୋଇଯାଉଥିଲା। ଏବେ ସେ ପ୍ଲାଷ୍ଟିକ୍ କୁଣ୍ଡରେ ବିଭିନ୍ନ ପ୍ରକାର ଗଛ ଲଗାଇଛନ୍ତି। ବଜାରରେ ମିଳୁଥିବା ପନିପରିବାରେ ରାସାୟନିକ ସାର ଦିଆଯାଉଥିବା ବେଳେ ତାହା ଦେହ ପାଇଁ କ୍ଷତିକାରକ। କିନ୍ତୁ ଜୈବିକ ସାର ବ୍ୟବହାର କରି ନିଜେ ଚାଷ କଲେ ସେଥିରୁ ମୁକ୍ତି ମିଳିବ। ଛାତରେ ବଗିଚା କରିବା ପାଇଁ କମ୍ ଟଙ୍କା ଖର୍ଚ୍ଚ ହେଉଥିବା ବେଳେ ପରିଶ୍ରମ ମଧ୍ୟ କମ୍। ଗୋଟିଏ ପରିବାର ପାଇଁ ଯେତିକି ଆବଶ୍ୟକ ସେତିକି ପନିପରିବା ଆରାମରେ ଚାଷରୁ ମିଳିଯିବ। ଜଣେ ଚାହିଁଲେ ନିଜ ଛାତ ଉପରେ ସୁନ୍ଦର ବଗିଚାଟିଏ କରିପାରିବ। ବର୍ଷ ସାରା ତାଙ୍କୁ ପନିପରିବା କିଣିବା ପାଇଁ ପଡ଼ୁ ନ ଥିବା ସେ କହିଛନ୍ତି। ଋତୁ ଅନୁସାରେ ସେ ପନିପରିବା ଚାଷ କରନ୍ତି। ଶୀତ ଋତୁରେ ଫୁଲ କୋବି, ବନ୍ଧାକୋବି, ଗାଜର, ମୂଳା, କଖାରୁ ଆଦି ଚାଷ କରିଛନ୍ତି। ଗତ ବର୍ଷ ତାଙ୍କର ୧୨ କେଜି ଓଜନର ଦୁଇଟି କଖାରୁ ହୋଇଥିଲା। ଯେଉଁଦିନ ଅଧିକ ପରିବା ବାହାରେ ସେଦିନ ସେ ସାହିପଡ଼ିଶାଙ୍କୁ ବାଣ୍ଟି ଦିଅନ୍ତି। ପେଶାରେ ଧରଣୀ ଜଣେ ବ୍ୟବସାୟୀ। ବାରିପଦା ଗାନ୍ଧୀ ମାର୍କେଟରେ ତାଙ୍କର ଏକ ଆସବାବପତ୍ର ଦୋକାନ ରହିଥିବା ବେଳେ ନିଶାରେ କିନ୍ତୁ ସେ ଜଣେ ପରିବେଶ ପ୍ରେମୀ। ପ୍ରତିଦିନ ସକାଳ ୬ଟାରୁ ୮ଟା ସେ ବଗିଚାର କାମ କରନ୍ତି। ଏହା ପରେ ସେ ଦୋକାନକୁ ଯାଆନ୍ତି। ସନ୍ଧ୍ୟାବେଳେ ଧରଣୀଙ୍କ ସ୍ତ୍ରୀ ମନୋରମା ଗଛର ଯତ୍ନ ନିଅନ୍ତି। ଏହିଭଳି ପରିବେଶ ପ୍ରତି ତାଙ୍କ ଭଲ ପାଇବା ଯୋଗୁ ନିଜ ଅଞ୍ଚଳରେ ଗଛ ପ୍ରେମୀ ଭାବେ ସେ ଖୁବ୍ ଜଣାଶୁଣା।
