କୋରାପୁଟ,୧୭।୨(ସ୍ବ.ପ୍ର.): କୋରାପୁଟ ଟାଉନ ପୋଲିସ ଦ୍ୱାରା ଜଣେ ଲୁଟେରାଙ୍କୁ ଗିରଫ କରାଯାଇଥିବା ବେଳେ ତାଙ୍କ ଠାରୁ କିଛି ସୁନାଗହଣା ଏବଂ ନଗଦ ଟଙ୍କା ଜବତ କରାଯାଇଥିବା ଟାଉନ ଥାନାଧିକାରୀ ଧୀରେନ ପଟ୍ଟନାୟକ ସୂଚନା ଦେଇଛନ୍ତି।
ସୂଚନାରୁ ଜଣାପଡ଼ିଛି ଯେ, ମଙ୍ଗଳବାର ବିଳମ୍ବିତ ରାତିରେ ଜଣେ ଯାତ୍ରୀ ଅଟୋରେ ଆସି ବସଷ୍ଟାଣ୍ଡ ନିକଟରେ ବସ୍କୁ ଅପେକ୍ଷା କରିଥିବାବେଳେ ତାଙ୍କ ବ୍ୟାଗଟିକୁ ଅଟୋରେ ରଖିଥିଲେ। ଏହି ସମୟରେ ଜଣେ ଲୁଟେରା ହଠାତ ତାଙ୍କ ବ୍ୟାଗ୍ଟିକୁ ଝାମ୍ପିନେଇ ଚମ୍ପଟ ମାରିଥିଲା। ଖବରପାଇ ଟାଉନ ଥାନା ପୋଲିସ ପାଟ୍ରୋଲିଂ ବେଳେ ଚମ୍ପଟ ଲୁଟେରାକୁ କାବୁ କରିବାରେ ସଫଳ ହୋଇଥିଲା। ଲୁଟେରାଙ୍କଠାରୁ ଦୁଇହଳ କାନଫୁଲ, ନଗଦ ୪ ହଜାର ୭୯୦ ଟଙ୍କା ଜବତ କରାଯାଇଥିଲା। ଏନେଇ ଥାନାରେ ୪୮/୨୧ରେ ଏକ ମାମଲା ରୁଜୁ କରାଯାଇ ଲୁଟେରା ଜଣଙ୍କୁ ବୁଧବାର ଗିରଫ କରାଯାଇଛି। ଟାଉନ ଥାନାର ଅତିରିକ୍ତ ଥାନାଧିକାରୀ ଶଙ୍କର ପ୍ରସାଦ ମାଝିଙ୍କ ନେତୃତ୍ୱରେ ସବ୍ଇନ୍ସପେକ୍ଟର ଚିତ୍ତରଞ୍ଜନ ପ୍ରଧାନ ଏହି ଲୁଟେରାକୁ ଧରିଥିବାବେଳେ ଘଟଣାର ଅଧିକ ତଦନ୍ତ ଜାରି ରହିଛି।
