ଗଞ୍ଜାମ, ୧୨।୧୧ (ଅଖିଳ ତରାଇ): ଗଞ୍ଜାମ ଜିଲାର ଗଞ୍ଜାମ ବ୍ଲକ ଅନ୍ତର୍ଗତ କରପଡ଼ା ପଞ୍ଚାୟତରେ ରାସ୍ତା ମରାମତିର ଅଭାବ ଯୋଗୁ ସ୍ଥାନୀୟ ବାସିନ୍ଦାମାନେ ଦୁର୍ଦ୍ଦଶାର ସମ୍ମୁଖୀନ ହେଉଛନ୍ତି। କରପଡ଼ା ବଜାର ସାହିରେ ଥିବା ପଞ୍ଚାୟତ କାର୍ଯ୍ୟାଳୟରୁ ଶନି ମନ୍ଦିର ପର୍ଯ୍ୟନ୍ତ ଏହି ରାସ୍ତାର ଅବସ୍ଥା ଅତ୍ୟନ୍ତ ଦୟନୀୟ ହୋଇପଡ଼ିଛି। ପ୍ରତିଦିନ ଶତାଧିକ ଲୋକଙ୍କ ଯାତାୟାତର ମୁଖ୍ୟ ପଥ ହୋଇଥିବା ଏହି ରାସ୍ତା ଏବେ ଜନସାଧାରଣଙ୍କ ପାଇଁ ଏକ ବଡ଼ ଚ୍ୟାଲେଞ୍ଜ ସୃଷ୍ଟି କରିଛି।
ଏହି ରାସ୍ତା କେବଳ କରପଡ଼ାର ସ୍ଥାନୀୟ ବାସିନ୍ଦାମାନଙ୍କ ପାଇଁ ନୁହେଁ, ବରଂ ଛତ୍ରପୁର ବ୍ଲକର ଅନେକ ପଞ୍ଚାୟତ ଏବଂ ଛତ୍ରପୁର ସହରକୁ ସଂଯୋଗ କରିଥାଏ। ଏହା ପ୍ରସିଦ୍ଧ ଶକ୍ତିପୀଠ ମା’ ତାରାତାରିଣୀ ଏବଂ ମା’ ରାମଚଣ୍ଡୀ ମନ୍ଦିରକୁ ଯାତ୍ରା କରୁଥିବା ଶ୍ରଦ୍ଧାଳୁମାନଙ୍କ ପାଇଁ ମୁଖ୍ୟ ମାର୍ଗ। ଫଳରେ, ପ୍ରତିଦିନ ବହୁ ସଂଖ୍ୟକ ଯାତ୍ରୀ ଏହି ବାଟେ ଦେଇ ଯା’ଆସ କରନ୍ତି। କିନ୍ତୁ ରାସ୍ତାରେ ବଡ଼ ବଡ଼ ଖାଲ, ଖମା ଏବଂ ଅଳିଆ ଆବର୍ଜନାର ସ୍ତୂପ ଯୋଗୁ ଚଳାଚଳ ଅସମ୍ଭବ ହୋଇପଡ଼ିଛି। ସାଇକେଲ, ବାଇକ ଏବଂ ଅନ୍ୟାନ୍ୟ ଯାନବାହନର ଚାଳକମାନେ ପ୍ରତିଦିନ କଷ୍ଟ ଭୋଗୁଛନ୍ତି। ପେଡ଼େଷ୍ଟ୍ରିଆନ୍ମାନେ, ବିଶେଷକରି ସ୍କୁଲ ଯାଉଥିବା ପିଲାମାନେ, ଖସି ପଡ଼ି ଆହତ ହେବା ଏକ ନିୟମିତ ଘଟଣାରେ ପରିଣତ ହୋଇଛି।
ବର୍ଷା ଋତୁରେ ସ୍ଥିତି ଆହୁରି ଭୟଙ୍କର ହୁଏ। ଖାଲରେ ପାଣି ଜମି ରହିବା ଯୋଗୁ ଦୁର୍ଘଟଣାର ଆଶଙ୍କା ବଢ଼ିଯାଏ। ସ୍ଥାନୀୟ ବାସିନ୍ଦାମାନେ କହିଛନ୍ତି ଯେ ଏହି ସମସ୍ୟା ବହୁ ଦିନରୁ ଲାଗି ରହିଛି, କିନ୍ତୁ ପ୍ରଶାସନର ଉଦାସୀନତା ଯୋଗୁ କୌଣସି ପଦକ୍ଷେପ ନିଆଯାଉ ନାହିଁ। ରାସ୍ତାର ଉଭୟ ପାର୍ଶ୍ୱରେ ପୂର୍ବରୁ ପକ୍କା ରାସ୍ତା ନିର୍ମାଣ ହୋଇଥିବା ବେଳେ ଏହି ଅଳ୍ପ ଦୂରତା କାହିଁକି ମରାମତିରୁ ବଞ୍ଚିତ ରହିଛି, ଏହା ଏକ ପ୍ରଶ୍ନବାଚୀ ସୃଷ୍ଟି କରିଛଇ। କରପଡ଼ା ସରପଞ୍ଚ ଅଜୟ ନାୟକ କହିଛନ୍ତି, ଛଅ ମାସ ପୂର୍ବରୁ ଏହି ରାସ୍ତାର ମରାମତି କାମ ଆରମ୍ଭ ହୋଇଥିଲା, କିନ୍ତୁ ଠିକାଦାର ହଠାତ୍ କାମ ବନ୍ଦ କରି ଦେଇଛନ୍ତି। ଏହା ନେଇ ମୁଁ ଜିଲାପାଳଙ୍କୁ ଭେଟିବି ଏବଂ ସମସ୍ୟାର ସମାଧାନ ପାଇଁ ଦାବି କରିବି। ଏ ନେଇ ବିଭାଗୀୟ ଜେଇଙ୍କୁ ଯୋଗାଯୋଗ କରିବାକୁ ଚେଷ୍ଟା କରିଥଲେ ମଧ୍ୟ ଯୋଗାଯୋଗ ସମ୍ଭବପର ହୋଇନଥିଲା । ସ୍ଥାନୀୟ ବାସିନ୍ଦାମାନେ ପ୍ରଶାସନକୁ ତୁରନ୍ତ ପଦକ୍ଷେପ ନେବାକୁ ଅନୁରୋଧ କରିଛନ୍ତି। ଏହି ରାସ୍ତାର ମରାମତି ନ ହେଲେ ଦୁର୍ଘଟଣାର ଆଶଙ୍କା ବଢ଼ିବ ଏବଂ ଯାତ୍ରୀମାନଙ୍କ ସୁରକ୍ଷା ପ୍ରଶ୍ନବାଚକ ହୋଇଯିବ। ପ୍ରଶାସନ ଏହାକୁ ଗୁରୁତ୍ୱ ସହକାରେ ନେଇ ଜନସାଧାରଣଙ୍କୁ ସୁରକ୍ଷିତ ଏବଂ ସୁବିଧାଜନକ ଯାତାୟାତ ଯୋଗାଇ ଦେବାକୁ ଆବଶ୍ୟକ।
