ଯାଜପୁର ଟାଉନ,୨ା୨(ଡି.ଏନ.ଏ.): ଯାଜପୁର ସହର ଏକ ପୁରାତନ ସହର। ଏହି ସହରକୁ ଟ୍ରାଫିକ୍ ମୁକ୍ତ କରିବା ପାଇଁ ବିରଜା ରିଂରୋଡ ନିର୍ମାଣ କରାଯାଇଛି। ଯାଜପୁରର ମୁଖ୍ୟ ଦ୍ୱାର କିଆନାଳୀକୂଳଠାରୁ ସିନ୍ଦୁରାଇମୁହଁ ପର୍ଯ୍ୟନ୍ତ ବୈତରଣୀ ନଦୀକୁ ଚୌଡ଼ା କରି ‘ବିରଜା ରିଂରୋଡ’ନାମରେ ନାମିତ କରାଯାଇଛି। ଯାଜପୁର ସହରକୁ ସବୁଜ ସୁନ୍ଦର କରିବା କ୍ଷେତ୍ରରେ ଏହି ରୋଡ୍ ଗୁରୁତ୍ୱ ବହନ କରୁଛି। ମାତ୍ର ଏବେ ଏହି ରିଂରୋଡ ଅତ୍ୟନ୍ତ କଦର୍ଯ୍ୟ ଅବସ୍ଥା ଦେଇ ଗତି କରୁଛି। ଯାଜପୁର ପ୍ରଶାସନିକ ଭବନ ଓ ମେଡିକାଲ କଲେଜ ନିର୍ମାଣ ପାଇଁ ଦେବୀଗଡ଼ା ଘାଟରୁ ବାଲି ଉଠାଯାଇ ପୋତିବା କାମ ଆରମ୍ଭ କରାଯାଇଛି, ଯଦ୍ଦ୍ବାରା ଦେବୀଗଡ଼ା ଘାଟରୁ କିଆନାଳୀକୂଳ ଛକ ପର୍ଯ୍ୟନ୍ତ ରାସ୍ତାରେ ଫୁଟେ ବହଳର ବାଲି ବିଛେଇ ହୋଇପଡିଲାଣି। ରାସ୍ତାରେ ପିଚୁ ଦେଖାଯାଉନାହିଁ। ଏହି ରାସ୍ତାଦେଇ ପ୍ରତ୍ୟେକ ଦିନ ହଜାରହଜାର ବାଇକ୍ ଯାଉଥିବାବେଳେ ବାଲି ଯୋଗୁ ଅନେକ ସମୟରେ ଛୋଟବଡ଼ ଦୁର୍ଘଟଣାମାନ ଘଟୁଛି। ଏହି ରାସ୍ତାରେ ସଞ୍ଜ ନଇଁବା ପରେ ଯିବା ଆସିବା କରିବା କଷ୍ଟକର ହୋଇପଡିଛି। ସହରବାସୀ ପ୍ରାତଃ ଭ୍ରମଣ ପାଇଁ ରିଂରୋଡକୁ ବାଛି ଥିବାବେଳେ ଏବେ କୌଣସି ସହରବାସୀ ପ୍ରାତଃ ଭ୍ରମଣରେ ଆସୁ ନ ଥିବା ଦେଖାଦେଇଛି। ସବୁଠାରୁ କଷ୍ଟରେ ଅଛନ୍ତି ନଦୀକୂଳରେ ବସବାସ କରୁଥିବା ଶହସ୍ରାଧିକ ପରିବାର। ଉକ୍ତ ପରିବାରଗୁଡ଼ିକ ଏହି ଧୂଳି, ବାଲି ଯୋଗୁ କବାଟ, ଝରକା ଖୋଲିପାରୁନାହାନ୍ତି। ଦେବୀଗଡ଼ା ଘାଟରୁ ୫ରୁ୬ଶହ ହାଇୱା ଦୈନିକ ବାଲି ପରିବହନ କରୁଛନ୍ତି। ବାଲିପରିବହନ ବେଳେ ହାଇୱା ଉପରେ ପାଲ ଢାଙ୍କିବାର ବ୍ୟବସ୍ଥା କରାଯାଉନାହିଁ। ବିଶେଷକରି ପାଣି ମିଶା ବାଲି ହାଇୱାରେ ଓଭରଲୋଡ୍ କରି ନିଆଯାଉଛି। ଫଳରେ ଏହି ରାସ୍ତାରେ ବାଲି ପଡି ଯାତାୟାତ ସମ୍ଭବ ହୋଇପାରୁନାହିଁ।
ବିରଜା ରିଂରୋଡର କିଆନାଳୀକୂଳ ଛକଠାରୁ ଦେବୀଗଡ଼ା ଘାଟ ପର୍ଯ୍ୟନ୍ତ ୫୦୦ରୁ ଊର୍ଦ୍ଧ୍ୱ ଘର ରହିଥିବାବେଳେ ଏହି ରାସ୍ତା କଡ଼ରେ ୨ଟି ବିଦ୍ୟାଳୟ ମଧ୍ୟ ରହିଛି। ରିଂରୋଡ ସଂଲଗ୍ନରେ ଜିଲାପାଳଙ୍କ କାର୍ଯ୍ୟାଳୟ ଥିବାରୁ ପ୍ରତ୍ୟେକ ଦିନ ପ୍ରଶାସନିକ ଅଧିକାରୀ ଏହି ରାସ୍ତାଦେଇ ଯାତାୟାତ କରୁଛନ୍ତି। ହେଲେ ଏଥିପ୍ରତି କେହି ନଜର ନଦେବା ସମସ୍ତଙ୍କୁ ଚକିତ କରିଛି। ବାଲି ଓ ଧୂଳି ଯୋଗୁ ରିଂରୋଡ୍ କଡରେ ବସବାସ କରୁଥିବା ଲୋକେ ନୟାନ୍ତ ହୋଇପଡିଥିବାବେଳେ ଅନେକ ପରିବାରରେ ଯଖ୍ମା ଓ ଶ୍ୱାସ ରୋଗୀଙ୍କ ସଂଖ୍ୟା ବୃଦ୍ଧି ଘଟିଛି। ଯାଜପୁର ସହରର ବିକାଶମୂଳକ ପ୍ରକଳ୍ପ ପାଇଁ ନଦୀରୁ ବାଲି ପରିବହନ ଆବଶ୍ୟକତା ରହିଛି। ମାତ୍ର ବିକାଶ ନାଁରେ ପରିବେଶ ପ୍ରଦୂଷଣ କରାଯିବା କେତେଦୂର ଯଥାର୍ଥ ବୋଲି ସାଧାରଣରେ ପ୍ରଶ୍ନ ଉଙ୍କି ମାରୁଛି। ଏ ସମ୍ପର୍କରେ ଯାଜପୁର ତହସିଲଦାର ଜ୍ୟୋତିକାନ୍ତ ଭୁଜବଳଙ୍କୁ ପଚାରିବାରେ ସେ କହିଛନ୍ତି, ବାଲି ପରିବହନ କରୁଥିବା ଠିକାଦାରଙ୍କୁ ରାସ୍ତା ସଫେଇ ସହ ପାଣି ସିଞ୍ଚନ କରିବାକୁ କୁହାଯାଇଛି। ଯଦି ସେ ଏଥିରେ ଅବହେଳା କରନ୍ତି ତେବେ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
