କଟକ ଅଫିସ,୧।୧୨: ସରକାର ସ୍ବାସ୍ଥ୍ୟସେବାକୁ ଲୋକାଭିମୁଖୀ କରିବା ପାଇଁ ଅନେକ ଯୋଜନା କରିଛନ୍ତି। ଏପରି କି ହସ୍ପିଟାଲଗୁଡିକର ଭିତ୍ତିଭୂମି ବିକାଶ ସହ ଉନ୍ନତ ଚିକିତ୍ସା ପ୍ରଦାନ ନିମନ୍ତେ ବହୁ କୋଟି ଟଙ୍କା ଖର୍ଚ୍ଚ କରୁଛନ୍ତି। ହେଲେ ଏବେ ବି ରାଜ୍ୟର ପ୍ରମୁଖ ଏସ୍ସିବି ମେଡିକାଲ ଓ ଆଚାର୍ଯ୍ୟ ହରିହର ସ୍ନାତକୋତ୍ତର କର୍କଟ ରୋଗ ପ୍ରତିଷ୍ଠାନରେ ରୋଗୀଙ୍କୁ ଅତି ଦୟନୀୟ ଅବସ୍ଥାରେ ନିଆଯାଉଛି। ଏଭଳି ସମସ୍ୟା ଦୂର କରିବା ପାଇଁ ସରକାର ରାଜ୍ୟର ପ୍ରମୁଖ ହସ୍ପିଟାଲଗୁଡିକରେ ବ୍ୟାଟେରି ରିକ୍ସା ସେବା ଆରମ୍ଭ କରିଛନ୍ତି। ସାଧାରଣତଃ ବଡ ହସ୍ପିଟାଲଗୁଡିକର ଗୋଟିଏ ବିଭାଗରୁ ଆଉ ଗୋଟିଏ ବିଭାଗ ମଧ୍ୟରେ ଅଧିକ ଦୂରତା ରହୁଥିବାରୁ ଗୁରୁତର ରୋଗୀଙ୍କୁ ସ୍ଥାନାନ୍ତର ନିମନ୍ତେ ବ୍ୟାଟେରି ରିକ୍ସା ବେଶ୍ ସହାୟକ ହେଉଛି। କିନ୍ତୁ ବିଡମ୍ବନାର ବିଷୟ ଆଚାର୍ଯ୍ୟ ହରିହର କର୍କଟ ରୋଗ ପ୍ରତିଷ୍ଠାନରେ ବ୍ୟାଟେରି ରିକ୍ସା ସେବା ଆରମ୍ଭ ହୋଇ ନ ଥିବାବେଳେ ଏସ୍ସିବି ମେଡିକାଲରେ ଆବଶ୍ୟକଠାରୁ କମ୍ ସଂଖ୍ୟକ ବ୍ୟାଟେରି ରିକ୍ସା ରହିଛି। ଫଳରେ ବାଧ୍ୟ ହୋଇ ପରିବାର ଲୋକ ଓ ସମ୍ପର୍କୀୟମାନେ ଗୁରୁତର ରୋଗୀଙ୍କୁ କାନ୍ଧ କିମ୍ବା ରିକ୍ସାରେ ସ୍ଥାନାନ୍ତର କରୁଥିବା ଦୃଶ୍ୟ ସ୍ବାସ୍ଥ୍ୟ ସେବାର ବିକଳ ଚିତ୍ରକୁ ପଦାକୁ ଆଣିଛି।
ଏସ୍ସିବି ମେଡିକାଲରେ ବ୍ୟାଟେରି ରିକ୍ସା ସେବା ଆରମ୍ଭ ହୋଇଥିଲା। ମୋଟ୍ ୬ଟି ବ୍ୟାଟେରି ରିକ୍ସା ମଧ୍ୟରୁ ଗୋଟିଏ ମେଡିସିନ ନେବାଆଣିବା ଓ ଅନ୍ୟ ୫ଟି ରୋଗୀ ସ୍ଥାନାନ୍ତର ନିମନ୍ତେ ଉଦ୍ଦିଷ୍ଟ ଥିଲା। ଏବେ ଉକ୍ତ ପାଞ୍ଚଟି ମଧ୍ୟରୁ ଦୁଇଟି ବ୍ୟାଟେରି ରିକ୍ସା ଅଧିକାଂଶ ସମୟ କୋଭିଡ୍ ରୋଗୀଙ୍କ ସେବାରେ ନିୟୋଜିତ ହେଉଛି। ଫଳରେ ଅନ୍ୟ ବିଭାଗର ଗୁରୁତର ରୋଗୀଙ୍କୁ ସ୍ଥାନାନ୍ତର ପାଇଁ ଘଣ୍ଟାଘଣ୍ଟା ଧରି ଅପେକ୍ଷା କରିବାକୁ ପଡୁଛି। ବେଳେବେଳେ ଅଧିକ ଗୁରୁତର ଥିବା ରୋଗୀଙ୍କୁ ସମ୍ପର୍କୀୟମାନେ ଟେକିଟେକି ସ୍ଥାନାନ୍ତର କରୁଛନ୍ତି। ଏଭଳି ଅବ୍ୟବସ୍ଥା ସମ୍ପର୍କରେ ସବୁ ବିଭାଗର କର୍ତ୍ତୃପକ୍ଷ ଅଳ୍ପ ବହୁତେ ଅବଗତ ଅଛନ୍ତି। ତେଣୁ ସୁପର ସ୍ପେସିଆଲିଟି ଆଉଟ୍ଡୋର, କାଜୁଆଲ୍ଟି, ସର୍ଜରି ବିଭାଗ ପକ୍ଷରୁ ସ୍ବତନ୍ତ୍ର ଭାବେ ବ୍ୟାଟେରି ରିକ୍ସା ପାଇଁ ହସ୍ପିଟାଲ କର୍ତ୍ତୃପକ୍ଷଙ୍କ ନିକଟରେ ଦାବି କରାଯାଇଛି ବୋଲି କେତେଜଣ କର୍ମଚାରୀ କହିଛନ୍ତି।
ପ୍ରଶାନ୍ତ କୁମାର ବାରିକ ନାମକ ଜଣେ ରୋଗୀ ସମ୍ପର୍କୀୟ କହିଛନ୍ତି, ଅର୍ଥୋପେଡିକରୁ ଆମ ରୋଗୀଙ୍କୁ ଡାଏଲିସିସ କରାଇବାକୁ ନେବା ପାଇଁ ଦେଢଘଣ୍ଟା ଅପେକ୍ଷା କରିବା ପରେ ବି ବ୍ୟାଟେରି ରିକ୍ସା ପାଇଲୁ ନାହିଁ। ଶେଷରେ ବାଧ୍ୟ ହୋଇ ରିକ୍ସାରେ ନେଲୁ। ଏ ବାବଦରେ ଏସ୍ସିବି କର୍ତ୍ତୃପକ୍ଷଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ଉତ୍ତର ମିଳିନାହିଁ। ସେହିଭଳି ଏସ୍ସିବି ସଂଲଗ୍ନ ଆଚାର୍ଯ୍ୟ ହରିହର ସ୍ନାତକୋତ୍ତର କର୍କଟ ରୋଗ ପ୍ରତିଷ୍ଠାନରେ ଏପର୍ଯ୍ୟନ୍ତ ବ୍ୟାଟେରି ରିକ୍ସା ସେବା ଉପଲବ୍ଧ ନାହିଁ। ଫଳରେ ରୋଗୀମାନଙ୍କୁ ଅନେକ ଅସୁବିଧାର ସମ୍ମୁଖୀନ ହେବାକୁ ପଡୁଛି। କ୍ୟାଥେଟର ଓ ଅନ୍ୟ ପାଇପ ସଂଯୋଗ ହୋଇଥିବା ରୋଗୀଙ୍କୁ ଲୋକେ ଟେକି ନେଉଥିବା ଦେଖୁଥିବା ରାକେଶ ପରିଡା ନାମକ ଜଣେ ରୋଗୀ ସମ୍ପର୍କୀୟ କହିଛନ୍ତି। ଏ ସମ୍ପର୍କରେ କର୍କଟ ରୋଗ ପ୍ରତିଷ୍ଠାନର ନିର୍ଦ୍ଦେଶକ ଡା. ଲଲାଟେନ୍ଦୁ ଷଡ଼ଙ୍ଗୀ କହିଛନ୍ତି, ଗତ ମେ ୨୧ରେ ସରକାରଙ୍କୁ ଲିଖିତ ଭାବେ ଅବଗତ କରାଯାଇଥିଲେ ମଧ୍ୟ ସୁଫଳ ମିଳିପାରିନାହିଁ। ପୁଣି ଥରେ ମନେ ପକାଇବା ପାଇଁ ରିମାଇଣ୍ଡର ଲେଟର ଲେଖାଯିବ।
