ଗୁଣପୁର,୧୭ା୨(ଡି.ଏନ୍.ଏ.):ଫେବୃୟାରୀ ୧ରେ ଉପସ୍ଥାପିତ ସାଧାରଣ ବଜେଟରେ ରାୟଗଡ଼ା ଜିଲା ଗୁଣପୁର-ଥେରୁବାଲି ରେଳପଥ ପାଇଁ ୧ହଜାର ଟଙ୍କା ମଞ୍ଜୁର ନେଇ ଘୋଷଣା କରିଥିଲେ। ଏହାକୁ ନେଇ ଅଞ୍ଚଳରେ ଅସନ୍ତୋଷ ବଢ଼ିବାରେ ଲାଗିଛି। ତେବେ ଏହି ଘଟଣା ଏବେ ନୂଆ ମୋଡ଼ ନେଇଛି। ପ୍ରକଳ୍ପ କାର୍ଯ୍ୟ ବିଳମ୍ବ ପାଇଁ ରେଲଓ୍ବେ ବୋର୍ଡ ରାଜ୍ୟ ସରକାରଙ୍କୁ ଦାୟୀ କରିଛି। ରାଜ୍ୟ ସରକାର ମାଗଣା ଜମି ନେଇ ସମ୍ମତି ଜଣାଇଥିଲେ ମଧ୍ୟ ପ୍ରକଳ୍ପର ଅଧାଖର୍ଚ୍ଚ ବହନ ନେଇ ନୀରବ ରହିଛନ୍ତି। ଫଳରେ ଏହି ପ୍ରକଳ୍ପ ଆଗେଇପାରି ନ ଥିବା ରେଲଓ୍ବେ ବୋର୍ଡ ପକ୍ଷରୁ ଓଡ଼ିଶା-ଆନ୍ଧ୍ର ରେଳ ବ୍ୟବହାରିକ ସଂଘର ଆବାହକ ସତ୍ୟପ୍ରକାଶ ପଣ୍ଡାଙ୍କ ନିକଟକୁ ଆସିଥିବା ଚିଠିରୁ ଜଣାପଡ଼ିଛି।
ସୂଚନାଯୋଗ୍ୟ, ୨୦୨୦ ଅକ୍ଟୋବର ୧୧ରେ ଗୁଣପୁର-ଥେରୁବାଲି ରେଳପଥ ସମ୍ପ୍ରସାରଣ ନିମନ୍ତେ ଓଡ଼ିଶା-ଆନ୍ଧ୍ର ରେଳ ବ୍ୟବହାରିକ ସଂଘର ଆବାହକ ସତ୍ୟପ୍ରକାଶ ପଣ୍ଡା ପ୍ରଧାନମନ୍ତ୍ରୀଙ୍କ ପ୍ରିନ୍ସିପାଲ ସେକ୍ରେଟାରିଙ୍କୁ ଚିଠି ଲେଖିଥିଲେ। ଏବେ ବୋର୍ଡର କାର୍ଯ୍ୟକାରୀ ନିର୍ଦ୍ଦେଶକ(ପ୍ରୋଜେକ୍ଟ ମନିଟରିଂ) ବି.କେ.ଗୁପ୍ତା ଏହାର ଉତ୍ତର ରଖି ପ୍ରକଳ୍ପ କାର୍ଯ୍ୟ ଆଗକୁ ବଢ଼ି ନ ପାରିବାର କାରଣ ଦର୍ଶାଇଛନ୍ତି। ୨୦୧୭-୧୮ ବଜେଟରେ ୯୩୫ କୋଟି ବ୍ୟୟ ଅଟକଳରେ ଏହି ରେଳପଥ ପ୍ରକଳ୍ପ ସ୍ଥାନ ପାଇଥିଲା। ଏହାର ଡିପିଆର୍ ପରେ ପ୍ରକଳ୍ପ ମୂଲ୍ୟ ବୃଦ୍ଧିପାଇବା ସହ ବ୍ୟୟ ଅଟକଳ ୧୨୭୪ କୋଟିରେ ପହଞ୍ଚିଥିଲା ଏବଂ ଏହାର ଆର୍ଓଆର୍(-)୩.୧୯ ଶତକଡ଼ା ରହିଥିଲା। ଏହି ରେଳପଥ ଲାଭଦାୟକ ନ ଥିବା କହି ରେଲଓ୍ବେ ବୋର୍ଡ ରାଜ୍ୟକୁ ମାଗଣା ଜମି ସହ ପ୍ରକଳ୍ପର ଅଧା ଖର୍ଚ୍ଚ ବହନ କରିବାକୁ କହିଥିଲା। ଏହାପରେ ରାଜ୍ୟ ସରକାର ୨୦୨୦ ଜାନୁୟାରୀ ୪ରେ ପ୍ରକଳ୍ପ ନିମନ୍ତେ ମାଗଣା ଜମି ଦେବାକୁ ସମ୍ମତି ଜଣାଇଥିଲେ। ହେଲେ ପ୍ରକଳ୍ପର ଅଧାଖର୍ଚ୍ଚ ବହନ ନେଇ ନୀରବ ରହିଥିବା ବୋର୍ଡର କାର୍ଯ୍ୟକାରୀ ନିର୍ଦ୍ଦେଶକ(ପ୍ରୋଜେକ୍ଟ ମନିଟରିଂ) ଗୁପ୍ତା ୨୦୨୧ ଜାନୁୟାରୀ ୨୮ରେ ଓଡ଼ିଶା-ଆନ୍ଧ୍ର ରେଳ ବ୍ୟବହାରିକ ସଂଘର ଆବାହକ ସତ୍ୟପ୍ରକାଶ ପଣ୍ଡାଙ୍କ ନିକଟକୁ ପଠାଇଥିବା ଚିଠିରେ ଉଲ୍ଲେଖ କରିଛନ୍ତି। ତେବେ ଏହି ପ୍ରସଙ୍ଗ ଏବେ ନୂତନ ମୋଡ଼ ନେଇଥିବାବେଳେ ରାଜ୍ୟ ସରକାର କାହିଁକି ଏ ଦିଗରେ ନୀରବ ରହିଛନ୍ତି ତାହାକୁ ନେଇ ପ୍ରଶ୍ନ ଉଠିଛି। ବହୁ ଦାବି ପରେ ୨୦୧୭-୧୮ ରେଳ ବଜେଟରେ ଏହି ପ୍ରକଳ୍ପ ସ୍ଥାନ ପାଇଥିଲା। ଦୀର୍ଘ ୪୭ ବର୍ଷ ପରେ ଏହି ଦାବି ପୂରଣ ହୋଇଥିବା ନେଇ ଅଞ୍ଚଳରେ ଖୁସି ପ୍ରକାଶ ପାଇଥିଲା। ହେଲେ ପରବର୍ତ୍ତୀ ସମୟରେ ଏହି ରେଳପଥ ପାଇଁ ବଜେଟରେ ଅନୁଦାନ କମାଇ ଦିଆଯାଇଥିଲା। ଗତ ବର୍ଷ ୧ଲକ୍ଷ ଟଙ୍କା ପ୍ରଦାନ କରାଯାଇଥିବାବେଳେ ଚଳିତ ବର୍ଷ ୧ହଜାରକୁ ଖସିଛି। ଏହାକୁ ନେଇ ଅସନ୍ତୋଷ ବଢ଼ିବା ସହ ଏହି ରେଳପଥ ପ୍ରକଳ୍ପ ଅନିଶ୍ଚିତତା ମଧ୍ୟକୁ ଠେଲି ହୋଇଯାଇଛି।
