କାମାକ୍ଷାନଗର, ୧୯।୮(ସୁଧୀର ପରିଡ଼ା): ଦୁଇଦିନ ଧରି ଜାରି ରହିଥିବା ଲଗାଣବର୍ଷାରେ ଢେଙ୍କାନାଳ ଜିଲା କାମାକ୍ଷାନଗର ବ୍ଲକ ତୁମୁସିଙ୍ଗା ପଞ୍ଚାୟତ ଶ୍ରୀମୂଳା ଗ୍ରାମ ଅରଖବାହାଳି ପୋଖରୀ ବନ୍ଧ ଶୁକ୍ରବାର ଭାଙ୍ଗିଯାଇଛି। ଫଳରେ ୮ ମିଟର ଘାଇ ସୃଷ୍ଟି ହେବା ସହ ଜଳାଶୟ ନିକଟବର୍ତ୍ତୀ ଶତାଧିକ ଏକର ଜମି ଜଳାର୍ଣ୍ଣବ ହୋଇଯାଇଛି। ବ୍ୟାପକ ଧାନ ଚାଷ ନଷ୍ଟ ହୋଇଥିବା ଅଭିଯୋଗ ହୋଇଛି।
ଚାଷୀଙ୍କ କହିବା କଥା, ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଯୋଜନା (ଏମ୍ଜିଏନ୍ଆରଇଜିଏସ୍) ଅନୁଦାନ ଅର୍ଥରେ ପ୍ରତିବର୍ଷ ଅରଖବାହାଳି ପୋଖରୀର ଉନ୍ନତୀକରଣ ହେଉଛି। ତେବେ ନିମ୍ନମାନର କାମ ଯୋଗୁ ପୋଖରୀ ବନ୍ଧ ଦୁର୍ବଳ ହୋଇଯାଇଥିଲା। ଦୁଇଦିନ ଧରି ଜାରି ରହିଥିବା ଲଗାଣ ବର୍ଷାରେ ପୋଖରୀରେ କ୍ଷମତାଠାରୁ ଅଧିକ ପାଣି ଭର୍ତ୍ତି ହୋଇଯିବାରୁ ବନ୍ଧ ଭାଙ୍ଗିଯାଇଛି। ପାଣି ବିଲରେ ମାଡୁଯିବା ଫଳରେ ଶତାଧିକ ଚାଷୀଙ୍କ ଧାନ ଚାଷ ନଷ୍ଟ ହୋଇଯାଇଛି। ତେଣୁ ତୁରନ୍ତ କ୍ଷୟକ୍ଷତି ଆକଳନ କରି କ୍ଷତିପୂରଣ ଦେବାକୁ ସେମାନେ ଦାବି କରିଛନ୍ତି। କିଛିଦିନ ତଳେ ହୋଇଥିବା ବର୍ଷାରେ ତୁମୁସିଙ୍ଗା ଗ୍ରାମ ପୋଖରୀ ସୁରକ୍ଷା ପାଚେରି ଭାଙ୍ଗିଯାଇଥିଲା। ଏବେ ଅରଖବାହାଳି ପୋଖରୀ ହୁଡ଼ା ଭୁଶୁଡ଼ିଯିବା ଏମ୍ଜିଏନ୍ଆର୍ଇଜିଏସ୍ ଯୋଜନାର କାର୍ଯ୍ୟକାରିତା ଉପରେ ପ୍ରଶ୍ନବାଚୀ ସୃଷ୍ଟି କରିଛି। ବିଭାଗୀୟ ଅଧିକାରୀ ଏବଂ ଠିକାଦାରଙ୍କ ମଧ୍ୟରେ ମଧୁଚନ୍ଦ୍ରିକା ଯୋଗୁ କୌଣସି କାର୍ଯ୍ୟ ଠିକ୍ ଭାବେ ହେଉ ନ ଥିବା କେତେଜଣ ଗ୍ରାମବାସୀ ନାମ ଗୋପନ ରଖି କହିଛନ୍ତି।
ଏ ସମ୍ପର୍କରେ ଜିଲା ପରିଷଦ ମୁଖ୍ୟ ଉନ୍ନୟନ ଅଧିକାରୀ ଜ୍ୟୋତିଶଙ୍କର ସାହୁ କୁହନ୍ତି, ଗଣମାଧ୍ୟମରୁ ପୋଖରୀ ହୁଡ଼ା ଭାଙ୍ଗିଯାଇଥିବା ସୂଚନା ମିଳିଛି। ବିଡିଓଙ୍କ ଜରିଆରେ ତଦନ୍ତ କରାଯିବ। କ’ଣ ହୋଇଛି ବୁଝିବା ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
