ପୁରୀ,୨୯ା୫(ଅଜିତ ମହାନ୍ତି): ପୁରୀ ବଡ଼ଦାଣ୍ଡରେ ଏକ ନିଆରା ତଥା ଅଭାବନୀୟ ଦୃଶ୍ୟ ଦେଖିବାକୁ ମିଳିଛି। ଯାହା ବିଭିନ୍ନ ସୋସିଆଲ ମିଡିଆରେ ବେଶ ଭାଇରାଲ ହେବାରେ ଲାଗିଛି । ଭିଡ଼ିଓରେ ଦେଖିବାକୁ ମିଳୁଛି ଦିନ ଦ୍ବିପହରରେ ବଡ଼ଦାଣ୍ଡରେ ଥିବା ଖଜା ଭର୍ତ୍ତି ପଷ୍ଟରୁ ଲୋକ ମାନେ ଖଜା ବୋହି ନେଇ ଯାଇଥିବା ଦେଖିବାକୁ ମିଳୁଛି । କିଏ ଦୁଇ ହାତରେ ତ ପୁଣି କିଏ ବ୍ୟାଗ, ଲୁଗା କାନି ଯିଏ ଯାହା ପାଇଲା ସେଥିରେ ଖଜା ବୋହି ନେଉଥିବା ଦେଖିବାକୁ ମିଳିଛି । ତେବେ ଶୁଣିବାକୁ ମିଳୁଚି ପୋଲିସ କହିବା ପରେ ଲୋକ ମନ ଇଚ୍ଛା ଖଜା ବୋହି ନେଇଥିଲେ।
ମିଳିଥିବା ସୂଚନା ଅନୁଯାୟୀ ଖଜା ବ୍ୟବସାୟୀଙ୍କୁ ନେଇ ପୁରୀରେ ଅନେକ ସମୟରେ ଅନେକ ଅପରାଧିକ କାର୍ଯ୍ୟକଳାପ ଘଟୁଛି। କିଛି ଦିନ ତଳେ ଖଜା ବ୍ୟବସାୟୀଙ୍କୁ ନେଇ ଦୁଇ ବ୍ୟବସାୟୀ ହାତାହାତି ହୋଇଥିଲେ। ଘଟଣାରେ ପୋଲିସ ଦୁଇ ଜଣଙ୍କୁ ଉଠାଇ ନେବା ସହ କୋର୍ଟ ଚାଲାଣ କରିଥିଲା । ତେବେ ଉକ୍ତ ଘଟଣାରେ ଅନ୍ୟ ଜଣେ ବ୍ୟକ୍ତି ସଂପୃକ୍ତ ଥିଲେ ଘଟଣାସ୍ଥଳରୁ ଫେରାର ହୋଇଯାଇଥିଲେ। ତେବେ ଗୁରୁବାର ଶ୍ରୀ ମନ୍ଦିର କାର୍ଯ୍ୟାଳୟ ନିକଟରେ ବ୍ୟକ୍ତି ଜଣଙ୍କୁ ଖଜା ବ୍ୟବସାୟ କରୁଥିବା ବେଳେ ପୋଲିସ ବ୍ୟକ୍ତିଙ୍କୁ କାବୁ କରିଥିଲା। ବ୍ୟକ୍ତିଙ୍କୁ ଥାନାକୁ ନେଇଥିବା ବେଳେ ବ୍ୟବସାୟ ପାଇଁ ଆଣିଥିବା ଖଜା ରୋଡ ଉପରେ ଛାଡ଼ି ଦେଇଥିଲା। ଉକ୍ତ ଖଜାକୁ ଲୋକ ମାନେ ବୋହି ନେଇଥିବା ଦେଖିବାକୁ ମିଳିଥିଲା।
