ଯାଜପୁର ଅଫିସ,୧୯।୧୧: ଯାଜପୁର ଜିଲା ଦୁଲାଖପାଟଣା ରେଳ ଷ୍ଟେଶନରେ ଶନିବାର ଏକ ଅଘଟଣ ଘଟିଛି। ଟ୍ରେନ୍ରେ ଅତ୍ୟାଧିକ ଯାତ୍ରୀଭିଡ଼ ଯୋଗୁ ଚଢ଼ିଲା ସମୟରେ ୨ ଯାତ୍ରୀ ଖସିପଡ଼ି ଗୁରୁତର ହୋଇଛନ୍ତି। ସେମାନଙ୍କ ପରିଚୟ ମିଳି ପାରି ନ ଥିବା ବେଳେ ତୁରନ୍ତ ସେମାନଙ୍କୁ ଚିକିତ୍ସା ନିମନ୍ତେ ସ୍ଥାନୀୟ ମେଡିକାଲରେ ଭର୍ତ୍ତି କରାଯାଇଛି।
ଏହାର ପ୍ରତିବାଦରେ ଉତ୍ତ୍ୟକ୍ତ ଲୋକେ ଟ୍ରେନକୁ ପ୍ରାୟ ୫ ଘଣ୍ଟା ଅଟକ ରଖିଥିବା ବେଳେ ପ୍ରତିଶ୍ରୁତି ମିଳିବା ପରେ ଧାରଣା ପ୍ରତ୍ୟାହୃତ ହୋଇଛି।
ସୂଚନାଯୋଗ୍ୟ, ପଲାସା ଡିଏମ୍ୟୁ ପାସେଞ୍ଜର ଟ୍ରେନ୍ ଉପରେ ଦୈନନ୍ଦିନ ବହୁ ସଂଖ୍ୟାରେ ଲୋକେ ନିର୍ଭର କରନ୍ତି। ଏହା ପୂର୍ବରୁ ଭଦ୍ରକରୁ ଚାଲୁଥିବା ବେଳେ ବାଲେଶ୍ୱରରୁ ଆଉ ଏକ ଟ୍ରେନ୍ ଚାଲିବା ପରିବର୍ତ୍ତେ ସେହି ଟ୍ରେନ୍ ବାଲେଶ୍ୱରରୁ ଚାଲୁଛି। ଏହା ବାଲେଶ୍ୱରରୁ ଚାଲିବାରୁ ଯାତ୍ରୀଙ୍କ ଭିଡ଼ ବଢ଼ୁଛି। ମାତ୍ର ଯାତ୍ରୀମାନଙ୍କ ପକ୍ଷରୁ ଦାବି ହେଉଥିବା ସତ୍ତ୍ୱେ ବଗି ବଢ଼ୁନାହିଁ। ବିଭାଗୟୀ କର୍ତ୍ତୃପକ୍ଷ ଶୁଣୁ ନାହାନ୍ତି। ପରନ୍ତୁ କରୋନା ସମୟରେ ଟ୍ରେନ ଭଡ଼ା ବୃଦ୍ଧି କରାଯାଇଛି। ସମସ୍ୟା ସମାଧାନ ଦାବିରେ ଉତ୍ତ୍ୟକ୍ତ ଲୋକେ ଟ୍ରେନକୁ ଅଟକାଇଥିଲେ। ଘଟଣାସ୍ଥଳରେ ରେଳ ବିଭାଗର ବରିଷ୍ଠ ଅଧିକାରୀ ପହଞ୍ଚତ୍ ଉତ୍ତ୍ୟକ୍ତ ଲୋକଙ୍କ ସହ ଆଲୋଚନା କରିଥିଲେ। ଡିଏମ୍ୟୁ ପାସେଞ୍ଜର ଟ୍ରେନ୍ ବଗିସଂଖ୍ୟା ବୃଦ୍ଧି ସହ ଦୁଲାଖପାଟଣା ଷ୍ଟେଶନରେ ଅନ୍ୟ ଏକ ପାସେଞ୍ଜର ଟ୍ରେନ ରହଣି ନିମନ୍ତେ ପ୍ରତିଶ୍ରୁତି ଦେବା ପରେ ଆନ୍ଦୋଳନ ହଟିଛି।
