ନବରଙ୍ଗପୁର,୧ା୫(ବି.ପ୍ର.): ନବରଙ୍ଗପୁର ସହରରେ ଗୋରାମୁଣ୍ଡା, ନୂଆବନ୍ଧ ଓ ପ୍ରତାପ ସାଗର ଏପରି ୩ଟି ଜଳାଶୟ ରହିଛି। ଏହାକୁ ବାଦ ଦେଲେ ସହରର ସୌନ୍ଦର୍ଯକରଣ ଅସମ୍ପୂର୍ଣ୍ଣ ହେବ। ଜଳାଶୟଗୁଡିକୁ ସୌନ୍ଦର୍ଯ୍ୟକରଣ ସହ ଓ ବିପଦମୁକ୍ତ କରିବାକୁ ସ୍ଥାନୀୟ ଜନ କଲ୍ୟାଣ ଅନୁଷ୍ଠାନ ଗୋବିନ୍ଦାଳୟ ୨୦୧୭ରୁ ଡିସେମ୍ବରରୁ ଲଢେଇ ଆରମ୍ଭ କରିଛି । ଏହି ୩ ପ୍ରମୁଖ ପୋଖରୀର ଊନ୍ନତି ପାଇଁ ନବରଙ୍ଗପୁର ପୌରପାଳିକାକୁ ନିର୍ଦ୍ଦେଶ ଦେବାକୁ ଜନସାର୍ଥ ମାମଲା ଉପଜିଲାପାଳଙ୍କ କୋର୍ଟରେ ଦାୟର କରାଗଲା। ମାସ ମାସ ଧରି ଫାଇଲ ପଡ଼ିରହିବା ପରେ ବି କୌଣସି ପଦକ୍ଷେପ ଗ୍ରହଣ କରାଗଲା ନାହିଁ। ଗୋବିନ୍ଦାଳୟକୁ ପୌରପାଳିକା ଓ ପ୍ରଶାସନିକ ଯୋଜନାରେ ହସ୍ତକ୍ଷେପ କରିବାର ଆରୋପ ସହିବାକୁ ପଡିଲା । ଉପଜିଲାପାଳଙ୍କ ଜନସ୍ବାର୍ଥ ମାମଲା ଶୁଣିବାର କ୍ଷମତା ବାବଦରେ ବିି ପ୍ରଶ୍ନ ଉଠିଲା। ପରେ ଗୋବିନ୍ଦାଳୟ ମୁଖ୍ୟମନ୍ତ୍ରୀଙ୍କ ଅଭିଯୋଗ ଶୁଣାଣିକୁ ଯାଇଥିଲା। ଜିଲା ପ୍ରଶାସନକୁ ମାମଲା ରୁଜୁ କରି ଶୁଣାଣି ଆରମ୍ଭ କରିବା ପାଇଁ ୨୦୧୮ରେ ଜୁଲାଇ ସେଠାରୁ ନିର୍ଦ୍ଦେଶ ଆସିଲା। ଉପଜିଲାପାଳଙ୍କ କୋର୍ଟରେ ମାମଲା ଆରମ୍ଭ ହେଲା। ଅନେକ ତଥ୍ୟ ପ୍ରସ୍ତୁତ କରି ଜମା କଲା ଗୋବିନ୍ଦାଳୟ I ଜଳାଶୟଗୁଡିକର ପାର୍ଶ୍ୱ ରାସ୍ତାର ସଂକୀର୍ଣ୍ଣତା ଯୋଗୁଁ ହେଉଥିବା ଦୁର୍ଘଟଣାର ବିବରଣୀ ଦିଆଗଲା କୋର୍ଟକୁ। ଗୋବିନ୍ଦାଳୟ ଦାୟର କରିଥିବା ଜନସ୍ବାର୍ଥ ମାମଲା ଖାରଜ କରିବା ପାଇଁ ପୌରପାଳିକା ଓକିଲ ନିୟୋଜିତ କଲା। କୋର୍ଟ ଉଭୟ ପକ୍ଷର ଯୁକ୍ତି ଶୁଣିବା ପରେ ମାମଲା ନିଶ୍ଚିତ ଭାବେ ଜନସ୍ବାର୍ଥ ମାମଲା ବୋଲି ଘୋଷଣା କଲେ । ମାସକ ମଧ୍ୟରେ ଜଳାଶୟଗୁଡିକର ସୁରକ୍ଷା ପାଇଁ ବ୍ୟବସ୍ଥା କରିବାକୁ ୨୦୧୮ ଅଗଷ୍ଟରେ ପୌରପାଳିକାକୁ ନିର୍ଦ୍ଦେଶ ଦେଲେ। ପୌରପାଳିକା କୋର୍ଟ ନିର୍ଦ୍ଦେଶକୁ ଖାତିର କଲାନାହିଁ। ଅନ୍ୟପକ୍ଷରେ କୋର୍ଟ କିରାଣୀ ଗୋବିନ୍ଦାଳୟ ମାମଲାକୁ ଆଉ କୋର୍ଟ ଶୁଣାଣି ପାଇଁ ତାଲିକାଭୁକ୍ତ କଲେନି। ଫାଇଲ କୁଆଡେ ହଜିଗଲା ବୋଲି କୁହାଗଲା। ୨୦୨୨ରେ ଗୋବିନ୍ଦାଳୟ ପ୍ରତିଷ୍ଠାତା ସାନମୁଗା ପାତ୍ର ତତ୍କାଳୀନ ଉପଜିଲାପାଳଙ୍କୁ ମାମଲାକୁ ଯୁକ୍ତିଯୁକ୍ତ ଭାବେ ଆଗକୁ ବଢ଼ାଇବା ପାଇଁ ଅନୁରୋଧ କଲେ। ପୁଣି ଶୁଣାଣି ଆରମ୍ଭ ହେଲା। ୨୦୨୨ ଜୁଲାଇ ୭ ତାରିଖରେ କୋର୍ଟ ପୌରପାଳିକାକୁ ୨୦୧୮ର ନିର୍ଦ୍ଦେଶକୁ ୧ ମାସ ଭିତରେ ପାଳନ କରିବାକୁ ନିର୍ଦ୍ଦେଶ ଦେଲେ। ନିର୍ଦ୍ଧାରିତ ସମୟ ସୀମା ଭିତରେ ପୌରପାଳିକାକୁ ଆଦେଶ ପାଳନ ନ କଲେ ଧାରା ୧୩୬ ଅନୂଯାୟୀ ସଂପୃକ୍ତ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ କରାଯିବ ବୋଲି ଆଦେଶ ରହିଥିଲା। ଉଲ୍ଲଘନକରୀଙ୍କୁ ୬ ମାସ ପର୍ଯ୍ୟନ୍ତ କାରାଗାର ଦଣ୍ଡ ଦିଆଯିବାର ସମ୍ଭାବନା ରହିଛି। ଜନସାର୍ଥ ମାମଲା ବାବଦରେ ନବରଙ୍ଗପୁରବାସୀଙ୍କ ମଧ୍ୟରେ ସଚେତନତା ଅଭାବରୁ, ଗୋବିନ୍ଦାଳୟର ଅନନ୍ୟ ପ୍ରୟାସ ଲକ୍ଷ୍ୟ ସ୍ଥଳରେ ପହଞ୍ଚିପାରିଲା ନାହିଁ। ପୌରପାଳିକା ଓ କ୍ଷମତାସୀନ ଉପଜିଲାପାଳ କୋର୍ଟଙ୍କ ଏହି ଗୁରୁତ୍ୱପୂର୍ଣ୍ଣ ଅର୍ଡର ଅଣଦେଖା କରିଥିବାରୁ, ସନମୁଗ ପାତ୍ର ଗତ ଜାନୁୟାରୀ ୨ ତାରିଖରେ ଜିଲାପାଳଙ୍କ ଅଭିଯୋଗ ଶୁଣାଣିରେ ଗୁହାରୀ କଲେ। ଜିଲାପାଳ କାର୍ଯ୍ୟାନୁଷ୍ଠାନ ଗ୍ରହଣ କରିବାର ପ୍ରତିଶ୍ରୁତି ଦେଲେ। ଉପଜିଲାପାଳଙ୍କୁ ତଦନ୍ତ ଭାର ଦେଇ ମାସକ ଭିତରେ ରିପୋର୍ଟ ଦେବା ପାଇଁ ନିର୍ଦେଶ ଦେଲେ। ତେବେ ତାହା ପୁଣି ପଡ଼ି ରହିଲା। ଗୋବିନ୍ଦାଳୟ ନିଜ ଅଭିଯୋଗ ପାଇଁ ହେଇଥିବା କାର୍ଯ୍ୟାନୁଷ୍ଠାନ ବାବଦରେ କିଛି ଜାଣି ପାରିଲାନି। ଗତ ମାର୍ଚ୍ଚରେ ପୁଣି ଜିଲାପାଳଙ୍କ ଅଭିଯୋଗ ଶୁଣାଣିକୁ ଯିବାକୁ ପଡ଼ିଲା। ଏଥିରେ ଅତିରିକ୍ତ ଜିଲାପାଳଙ୍କୁ ତଦନ୍ତ ଭାର ଦେଇ ମାସକ ଭିତରେ ରିପୋର୍ଟ ଦେବା ପାଇଁ ନିର୍ଦେଶ ଦିଆଗଲା। ତଥାପି ଏ ଯାଏ ସୁଫଳ ମିଳଲାନି। ଜନସାର୍ଥ ମାମଲାରେ କୋର୍ଟ ଦେଇଥିବା ଅର୍ଡର ର୍ନିର୍ଦ୍ଦିଷ୍ଟ ସମୟରେ ପାଳନ ନ କରିବା ବାବଦରେ ପ୍ରଶାସନ କ’ଣ ପଦେକ୍ଷପ ନେଇଛି ଗୋବିନ୍ଦାଳୟ ବା ନବରଙ୍ଗପୁରବାସୀଙ୍କୁ କୌଣସି ସୂଚନା ପାଇନାହାନ୍ତି। ଇତିମଧ୍ୟରେ ସ୍ଥାନୀୟ କୋର୍ଟ ନିର୍ଦ୍ଦେଶକୁ ଅଣଦେଖା କରି ସରକାରୀ ଯୋଜନା ମାଧ୍ୟମରେ ହେବାକୁ ଥିବା କିଛି ଜଳାଶୟ ଉନ୍ନୟନ କାମକୁ ନେଇ ପୌରପାଳିକା ନିଜ ପାରିବା ପଣିଆ ଦେଖାଇବାରେ ବ୍ୟସ୍ତ ରହିଛି।
