ନୂଆଦିଲ୍ଲୀ,୭।୮: ଦେଶ ମଧ୍ୟରେ କରୋନା ମାମଲା ବୃଦ୍ଧି ହେଉଥିବାରୁ ଏହା ଘରୋଇ ବଜାରକୁ କ୍ଷତିଗ୍ରସ୍ତ କରୁଛି। ଏଥିଯୋଗୁ ଦେଶର ଅର୍ଥନୈତିକ ଅଭିବୃଦ୍ଧି ନିମ୍ନଗାମୀ ହେଉଥିବା ନଜରକୁ ଆସିଛି। ଚଳିତ ଆର୍ଥତ୍କ ବର୍ଷରେ ଦେଶର ଅର୍ଥ ବ୍ୟବସ୍ଥା ନେଗେଟିଭ ଜୋନ୍ରେ ରହିବ ବୋଲି ରିଜର୍ଭ ବ୍ୟାଙ୍କ ଗୁରୁବାର ପୂର୍ବାନୁମାନ କରିଛି। ଦ୍ୱିମାସିକ ମୁଦ୍ରାନୀତି ଘୋଷଣା ସମୟରେ ରିଜର୍ଭ ବ୍ୟାଙ୍କ ଗଭର୍ନର ଶକ୍ତିକାନ୍ତ ଦାସ କହିଛନ୍ତି ଯେ, ମହାମାରୀକୁ ଯଦି ଶୀଘ୍ର ନିୟନ୍ତ୍ରଣାଧୀନ କରାଯିବ ତେବେ ଅର୍ଥନୈତିକ ଅଭିବୃଦ୍ଧିକୁ ଉପରେ ଏହା ସକରାତ୍ମକ ପ୍ରଭାବ ପକାଇବ। ଅଭିବୃଦ୍ଧି ପୂର୍ବାନୁମାନରେ ରିଜର୍ଭ ବ୍ୟାଙ୍କର ମୁଦ୍ରାନୀତି କମିଟି(ଏମ୍ପିସି) କହିଛି ଯେ, ଗ୍ରାମାଞ୍ଚଳ ଅର୍ଥ ବ୍ୟବସ୍ଥା ଶୀଘ୍ର ଟ୍ରାକ୍କୁ ଫେରିବ। ଖରିଫ ଚାଷ ଉନ୍ନତ ହୋଇଥିବାରୁ ଏହା ଅଭିବୃଦ୍ଧିକୁ ପ୍ରୋତ୍ସାହିତ କରିବ। ଦ୍ୱିତୀୟ ତ୍ରୈମାସରେ ଘରୋଇ ଚାହିଦା ଫେରିବା ନେଇ ମାନୁଫାକଚରିଂ ଫାର୍ମଗୁଡିକ ଆଶାବାଦୀ ରହିଛନ୍ତି। ୨୦୨୧-୨୨ ଆର୍ଥତ୍କ ବର୍ଷର ପ୍ରଥମ ତ୍ରୈମାସରେ ଚାହିଦା ଉନ୍ନତ ସ୍ତରକୁ ଫେରିବା ନେଇ ଆଶାକରାଯାଉଛି।
ଜୁଲାଇ ମାସରେ ଖାଉଟି ଆତ୍ମବିଶ୍ୱାସ ଏକ ନିରାଶାଜନକ ସ୍ଥିତିରେ ରହିଥିବା କେନ୍ଦ୍ରୀୟ ବ୍ୟାଙ୍କ ଏହାର ରିପୋର୍ଟରେ ପ୍ରକାଶ କରିଛି। ବିଶ୍ୱ ମାନ୍ଦାବସ୍ଥା ଏବଂ ବାଣିଜ୍ୟରେ ହ୍ରାସ ହେବା ଯୋଗୁ ଏହା ବାହ୍ୟ ଚାହିଦାକୁ ମଧ୍ୟ ପ୍ରଭାବିତ କରି ରଖିବ ବୋଲି ଆଶଙ୍କା କରାଯାଇଛି। ଚଳିତ ଆର୍ଥତ୍କ ବର୍ଷ ପ୍ରଥମ ୬ ମାସରେ ଦେଶର ରିୟଲ ଜିଡିପି ଋଣାତ୍ମକ ରହିବ। ସେହିଭଳି ୨୦୨୦-୨୧ କଥା ବିଚାରକଲେ ସାରା ବର୍ଷ ଅର୍ଥ ବ୍ୟବସ୍ଥା ଏକ ନେଗେଟିଭ ଜୋନରେ ରହିବ ବୋଲି ଶକ୍ତିକାନ୍ତ କହିଛନ୍ତି। ସେହିଭଳି ୨୦୨୦ର ପ୍ରଥମ ୬ ମାସ ବିଶ୍ୱ ବଜାରର ଆର୍ଥତ୍କ କାର୍ଯ୍ୟକଳାପ କ୍ଷତିଗ୍ରସ୍ତ ହୋଇ ରହିବ ବୋଲି ସେ ମତ ପ୍ରକାଶ କରିଛନ୍ତି।
