ଭୁବନେଶ୍ୱର, ୨୭।୧୧(ବ୍ୟୁରୋ): କ୍ୟାପିଟାଲ ହସ୍ପିଟାଲରେ ଏମ୍ଆର୍ଆଇ ବିଭାଗ ଖୋଲିଛି। ଗୁରୁବାର ସ୍ବାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ନବ କିଶୋର ଦାସ ଏହାକୁ ଲୋକାର୍ପଣ କରିଛନ୍ତି। ଏଣିକି ରୋଗୀମାନେ ଏମ୍ଆର୍ଆଇ ପରୀକ୍ଷା ପାଇଁ ବାହାରକୁ ଯିବେ ନାହିଁ। ହସ୍ପିଟାଲରେ ହିଁ ଏହି ପରୀକ୍ଷଣ ସେବା ପାଇବେ। ଏଠାରେ ମସ୍ତିଷ୍କର ଆନ୍ଜିଓ, ଭେନୋଗ୍ରାମ୍ ଓ ସ୍ପେକ୍ଟ୍ରୋସ୍କୋପି ପରୀକ୍ଷା, ଅର୍ବିଟ୍, ମେରୁଦଣ୍ଡ, ମଣିବନ୍ଧ, କହୁଣି, କାନ୍ଧ, ଆଣ୍ଠୁ, ଖଞ୍ଜା, ମୁହଁ, ବେକ, ତଳିପେଟ, ହାତ, ଗୋଡ଼ ଓ ପାଦ ଇତ୍ୟାଦିର ସମ୍ପୂର୍ଣ୍ଣ ଆଭ୍ୟନ୍ତରୀଣ ପରୀକ୍ଷା ହୋଇପାରିବ। ଏହି ଅବସରରେ ମନ୍ତ୍ରୀ ଦାସ କହିଛନ୍ତି, ଉନ୍ନତ ସାର୍ବଜନୀନ ସ୍ବାସ୍ଥ୍ୟସେବା ଉପରେ ରାଜ୍ୟ ସରକାର ଅଗ୍ରାଧିକାର ଦେଇଛନ୍ତି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ‘ସୁସ୍ଥ ଓଡ଼ିଶା ସୁଖୀ ଓଡ଼ିଶା’ ଅଭିଯାନକୁ ଅଧିକ ସଶକ୍ତ କରିବା ନିମନ୍ତେ ବିଭାଗ ପକ୍ଷରୁ ବ୍ୟାପକ ପଦକ୍ଷେପ ଗ୍ରହଣ କରାଯାଉଛି। କ୍ୟାପିଟାଲ ହସ୍ପିଟାଲରେ ଏମ୍ଆର୍ଆଇ ପରୀକ୍ଷା ସୁବିଧା ଉପଲବ୍ଧ କରାଇବା ଏପରି ପ୍ରୟାସରେ ଏକ ମାଇଲଖୁଣ୍ଟ ବିବେଚିତ ହେବ। ଏହା ଫଳରେ ସହଜରେ ଓ ବିନା ମୂଲ୍ୟରେ ଏମ୍ଆର୍ଆଇ ପରୀକ୍ଷା କରାଯାଇପାରିବ। ରାଜ୍ୟର ଅନ୍ୟ ହସ୍ପିଟାଲଗୁଡ଼ିକରେ ଏପରି ସୁବିଧା ପାଇଁ ଉଦ୍ୟମ ଅବ୍ୟାହତ ରହିବ ବୋଲି ମନ୍ତ୍ରୀ କହିଛନ୍ତି।
ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତୀକରଣ, ବିଜ୍ଞାନ ଓ କାରିଗରି ମନ୍ତ୍ରୀ ଅଶୋକ ଚନ୍ଦ୍ର ପଣ୍ଡା, ବିଧାୟକ ଅନନ୍ତ ନାରାୟଣ ଜେନା, ବିଧାୟକ ସୁଶାନ୍ତ କୁମାର ରାଉତଙ୍କ ସମେତ କ୍ୟାପିଟାଲ ହସ୍ପିଟାଲର ନିର୍ଦ୍ଦେଶକ ଡା. ଲକ୍ଷ୍ମୀଧର ସାହୁ, ଅଧୀକ୍ଷକ ଡା. ବିରଞ୍ଚତ୍ ନାରାୟଣ ବାରିକ ଓ ଉପଅଧୀକ୍ଷକ ଡା. ଧନଞ୍ଜୟ ଦାସ ପ୍ରମୁଖ ଉପସ୍ଥିତ ଥିଲେ ା
ରାଜ୍ୟରେ ପିପିପି ମୋଡ୍ରେ ପ୍ରଥମଥର ପାଇଁ ଏହି ପରୀକ୍ଷଣ ବ୍ୟବସ୍ଥା ହୋଇଛି। ଏଥିପାଇଁ ମଣିପାଲ୍ ହେଲ୍ଥ ମ୍ୟାପ୍ ଡାଇଗ୍ନୋଷ୍ଟିକ୍ସ ସ୍ବାସ୍ଥ୍ୟାନୁଷ୍ଠାନ ସହିତ ଗତ ମାର୍ଚ୍ଚ ମାସରେ ରାଜ୍ୟ ସରକାର କରିଥିବା ଚୁକ୍ତିନାମା ଅନୁସାରେ ସେବା ଆରମ୍ଭ ହୋଇଛି। ଅଗଷ୍ଟରୁ କାର୍ଯ୍ୟ ଆରମ୍ଭ ହୋଇ ଗତ ୨୦ ତାରିଖରେ ସରିଥିଲା। ଏଥିପାଇଁ ପ୍ରାୟ ୮ କୋଟି ଟଙ୍କା ବ୍ୟୟ କରାଯାଇଥିବା ହସ୍ପିଟାଲ ପକ୍ଷରୁ ସୂଚନା ଦିଆଯାଇଛି।
