ପାରାଦୀପ,୨୩ା୧୨(ସ୍ବ.ପ୍ର.) : ରାଜ୍ୟର ୧୦୧ ବିଧାୟକ ଓ ଜଣେ ଏମ୍ପି ମଙ୍ଗଳବାର ପାରାଦୀପ ଗସ୍ତରେ ଆସି ଭାରତୀୟ ନୌସେନାର ଦ୍ବିତୀୟ ବୃହତ୍ ଯୁଦ୍ଧ ଜାହାଜ ଆଇଏନ୍ଏସ୍ ଜଲାସ୍ବରେ ବୁଲିଛନ୍ତି। ଏହା ନୌସେନା ଇତିହାସରେ ପ୍ରଥମ ବୋଲି କାର୍ଯ୍ୟକ୍ରମ ଶେଷରେ ରିୟଲ ଆଡମିରାଲ୍ ସଞ୍ଜୟ ଭଟ୍ଟ ସାୟାନ କହିଛନ୍ତି। ଏଥିରେ ଉଭୟ ଶାସକ ଓ ବିରୋଧୀ ଦଳର ମନ୍ତ୍ରୀ ଓ ବିଧାୟକମାନେ ସାମିଲ ହୋଇଥିଲେ। ୧୯୭୧ରେ ଭାରତ-ପାକିସ୍ତାନ ଯୁଦ୍ଧରେ ଭାରତୀୟ ନୌସେନାର ପ୍ରମୁଖ ଭୂମିକା ଥିଲା। ସେହି ଦିବସ (ଡିସେମ୍ବର ୫)କୁ ନୌସେନା ଦିବସ ଭାବେ ପାଳନ କରାଯାଏ। ଚଳିତ ମାସରେ ଏହା ୫୦ ବର୍ଷ ପୂରଣ କରୁଥିବାରୁ ଏହାକୁ ସ୍ମରଣୀୟ କରିବା ପାଇଁ ନୌସେନା ପକ୍ଷରୁ ଏଭଳି କାର୍ଯ୍ୟକ୍ରମ ଆୟୋଜନ କରାଯାଇଥିଲା। ଜନପ୍ରତିନିଧିମାନେ ସମୁଦ୍ରରେ ଆଇଏନ୍ଏସ୍ ଜଲାସ୍ବରେ ବୁଲିବା ସମୟରେ ଯୁଦ୍ଧ ଜାହାଜ ଆଇଏନ୍ଏସ୍ ଶକ୍ତି, ସାହଦ୍ରୀ ଓ ଶିବଲିକ୍ ସାମିଲ ହୋଇଥିଲା। ସମୁଦ୍ରରେ କିପରି ଦେଶକୁ ସୁରକ୍ଷା କରାଯାଏ, ଯୁଦ୍ଧାସ୍ତ୍ର ବ୍ୟବହାର ଓ ଉଦ୍ଧାର କାର୍ଯ୍ୟ କରାଯାଏ ସେସବୁ କୌଶଳ ନୌସେନା ପକ୍ଷରୁ ଜନପ୍ରତିନିଧିମାନଙ୍କୁ ଦେଖାଯାଇଥିଲା। ଶେଷରେ ବାଚସ୍ପତି ସୂର୍ଯ୍ୟ ନାରାୟଣ ପାତ୍ର ବିଧାନସଭା ପକ୍ଷରୁ ଏକ ତାରକସି ଫଳକ ଦେଇ ଆଡ୍ମିରାଲ ଭଟ୍ଟ ସାୟନଙ୍କୁ ସମ୍ମାନିତ କରିଥିଲେ। ସେହିପରି ନୌସେନା ପକ୍ଷରୁ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଏକ ଫଳକ ଦିଆଯାଇଥିଲା। ପୂର୍ବାହ୍ନରେ ଜନପ୍ରତିନିଧିମାନେ ବସ୍ରେ ଭୁବନେଶ୍ୱରରୁ ଆସି ଅଠରବାଙ୍କିସ୍ଥିତ ବିଜୁ ପଟ୍ଟନାୟକଙ୍କ ପ୍ରତିମୂର୍ତ୍ତିରେ ପୁଷ୍ପମାଲ୍ୟ ଦେଇଥିଲେ। ସେଠାରୁ ସେମାନଙ୍କୁ ପାରାଦୀପ ବନ୍ଦର ପିଆଇସିଟି (ପାରାଦୀପ ଇଣ୍ଟରନ୍ୟାଶନାଲ କାର୍ଗୋ ଟର୍ମିନାଲ) ବର୍ଥରେ ଥିବା ଜଲାସ୍ବ ପାଖକୁ ଶୋଭାଯାତ୍ରାରେ ନିଆଯାଇଥିଲା। ସମୁଦ୍ରରେ ବୁଲିବା ପରେ ସା ୬ଟାରେ ଜାହାଜ ବର୍ଥକୁ ଫେରିଥିଲା। ପାରାଦୀପ ବନ୍ଦର ଇତିହାସରେ ଏହା ଦ୍ବିତୀୟ ଘଟଣା ବୋଲି କୁହାଯାଇଛି। ଏହାପୂର୍ବରୁ ୧୯୬୨, ଜାନୁୟାରୀ ୩ ରେ ବନ୍ଦରର ଭିତ୍ତିପ୍ରସ୍ତର ପଡ଼ିଥିଲା। ସେତେବେଳେ ତତ୍କାଳୀନ ପ୍ରଧାନମନ୍ତ୍ରୀ ଜବାହରଲାଲ ନେହେରୁ ଓ ମୁଖ୍ୟମନ୍ତ୍ରୀ ବିଜୁ ପଟ୍ଟନାୟକଙ୍କ ସହ ୫୦ରୁ ଊଦ୍ଧର୍ବ ବିଧାୟକ ସାମିଲ ହୋଇ ପାରାଦୀପ ଗସ୍ତରେ ଆସିଥିଲେ।
