ଭୁବନେଶ୍ୱର,୧୮।୧୨(ବ୍ୟୁରୋ): କେନ୍ଦ୍ରାପଡ଼ା ଜିଲାର ମହାକାଳପଡ଼ାଠାରେ ଆର୍ସେଲର ମିତ୍ତଲ ନିପନ ଷ୍ଟିଲ୍ ପକ୍ଷରୁ ୧ ଲକ୍ଷ ୨ ହଜାର ୨୭୫ କୋଟି ଟଙ୍କାର ପୁଞ୍ଜି ବିନିଯୋଗରେ ଏକ ବୃହତ୍ ଷ୍ଟିଲ୍ପ୍ଲାଣ୍ଟ ସ୍ଥାପନ ହେବ। ଶୁକ୍ରବାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏକ ଉଚ୍ଚସ୍ତରୀୟ କ୍ଲିୟରାନ୍ସ ଅଥରିଟି (ଏଚ୍ଏଲ୍ସିଏ) ବୈଠକରେ ଏହି ପ୍ରକଳ୍ପକୁ ଅନୁମୋଦନ ଦିଆଯାଇଛି। ମିତ୍ତଲ ଦ୍ୱାରା ପ୍ରସ୍ତାବିତ ଏହି ଷ୍ଟିଲ୍ ପ୍ଲାଣ୍ଟ କାର୍ଯ୍ୟକ୍ଷମ ହେଲେ ରାଜ୍ୟର ପ୍ରାୟ ୧୬ ହଜାର ଲୋକଙ୍କୁ ନିଯୁକ୍ତି ସୁଯୋଗ ମିଳିପାରିବ। ଏହି ଷ୍ଟଲ୍ ପ୍ଲାଣ୍ଟ ଦେଶର ମାନୁଫାକ୍ଚରିଂ କ୍ଷେତ୍ରର ସର୍ବବୃହତ୍ ପ୍ରକଳ୍ପ ହେବ। ଏଥିରେ ବାର୍ଷିକ ୨୪ ନିୟୁତ ଟନ ବିଭିନ୍ନ ଗ୍ରେଡ୍ର ଇସ୍ପାତ ଉତ୍ପାଦନ ହେବ। ଏଥିସହିତ ଏହି ପ୍ରକଳ୍ପରୁ ମୂଲ୍ୟଯୁକ୍ତ ଡାଉନଷ୍ଟ୍ରିମ୍ ଇସ୍ପାତ ମଧ୍ୟ ଉତ୍ପାଦନ ହେବ। ସେହିପରି ଏହି ପ୍ରକଳ୍ପ ଅଧୀନରେ ନିର୍ମାଣ ହେବାକୁ ଥିବା ସିମେଣ୍ଟ କାରଖାନାରୁ ବାର୍ଷିକ ୧୮.୭୫ ମେଟ୍ରିକ ଟନ୍ର ସିମେଣ୍ଟ ଉତ୍ପାଦନ ହେବ। ଏହା ଦେଶର ସର୍ବବୃହତ୍ ସିମେଣ୍ଟ ଉତ୍ପାଦନ ପ୍ଲାଣ୍ଟରେ ପରିଣତ ହେବ। ଏହା ଦ୍ୱାରା ସମ୍ପୃକ୍ତ ଅଞ୍ଚଳର ମାନୁଫାକ୍ଚରିଂ କ୍ଷେତ୍ରର ବିକାଶରେ ସହାୟକ ହେବ। ଏହି ମେଗା ଷ୍ଟିଲ୍ ପ୍ଲାଣ୍ଟ ସ୍ଥାପନ ହେବା ଦ୍ୱାରା କେନ୍ଦ୍ରାପଡ଼ା ଜିଲାର ସାମଗ୍ରିକ ଭାବେ ବିକାଶ ହେବାସହ ଓଡ଼ିଶାକୁ ବିଶ୍ୱ ଇସ୍ପାତ ମାନଚିତ୍ରରେ ଏକ ସ୍ବତନ୍ତ୍ର ସ୍ଥାନ ଦେବ ବୋଲି କମ୍ପାନୀ ପକ୍ଷରୁ ଆଶା କରାଯାଇଛି। ଏହି ପ୍ରକଳ୍ପରେ ବହୁ ଅନ୍ତର୍ଜାତୀୟ କମ୍ପାନୀ ମଧ୍ୟ ନିଜର ମାନୁଫାକ୍ଚରିଂ ୟୁନିଟ୍ ସ୍ଥାପନ କରିବେ, ଯଦ୍ଦ୍ବାରା ରାଜ୍ୟରେ ନିଯୁକ୍ତି ସୁଯୋଗ ଆହୁରି ଅଧିକ ବ୍ୟାପକ ହେବ।
ପର୍ଯ୍ୟାୟ କ୍ରମେ ଆସନ୍ତା ୭ ବର୍ଷ ମଧ୍ୟରେ ଏହି ବୃହତ୍ ପ୍ରକଳ୍ପ ନିର୍ମାଣ କାର୍ଯ୍ୟ ଶେଷ ହେବା ନେଇ ଲକ୍ଷ୍ୟ ରଖାଯାଇଛି। ପ୍ରକଳ୍ପ ପାଇଁ ଆବଶ୍ୟକ ଆନୁଷଙ୍ଗିକ ଭିତ୍ତିଭୂମି, ଶକ୍ତି ଓ ଜଳ ଯୋଗାଣ ଏବଂ ଅନ୍ୟାନ୍ୟ କ୍ଲିୟରାନ୍ସ ସରକାରଙ୍କ ଦ୍ୱାରା ନିର୍ଦ୍ଧାରିତ ସମୟରେ ସମ୍ପନ୍ନ ହେବ। ଏ ସମସ୍ତ କାର୍ଯ୍ୟ ମୁଖ୍ୟ ଶାସନ ସଚିବଙ୍କ ଅଧ୍ୟକ୍ଷତାରେ ଗଠିତ ଏକ ଉଚ୍ଚ କ୍ଷମତା ସମ୍ପନ୍ନ କମିଟି ତଦାରଖ କରିବ। ଏହି ପୁଞ୍ଜିନିବେଶକୁ ମିଶାଇ ଗତ ୧୨ ମାସ ମଧ୍ୟରେ ରାଜ୍ୟ ସରକାର ୨.୭ ଲକ୍ଷ କୋଟି ଟଙ୍କାର ପୁଞ୍ଜିନିବେଶକୁ ମଞ୍ଜୁରୀ ଦେଇଛନ୍ତି। ଏହି ପ୍ରକଳ୍ପଗୁଡ଼ିକରେ ରାଜ୍ୟର ପ୍ରାୟ ୧.୬ ଲକ୍ଷ ନିଯୁକ୍ତି ସୁଯୋଗ ସୃଷ୍ଟି ହେବାର ସମ୍ଭାବନା ରହିଛି। ଓଡ଼ିଶା ଏବେ ଦେଶର ବୃହତ୍ ଇସ୍ପାତ ଉତ୍ପାଦନକାରୀ ରାଜ୍ୟରେ ପରିଣିତ ହୋଇଥିବା ବେଳେ ମେଗା ଷ୍ଟିଲ୍ପ୍ଲାଣ୍ଟ କାର୍ଯ୍ୟକାରୀ ହେବା ପରେ ୨୦୩୦ ସୁଦ୍ଧା ଇସ୍ପାତ ଉତ୍ପାଦନ କ୍ଷମତା ୧୦୦ ନିୟୁତ ଟନ୍କୁ ଟପିବ।
