ପୁରୀ,୧।୮(ଅଜିତ ମହାନ୍ତି):ଶ୍ରୀମନ୍ଦିର ପରିଚାଳନା କମିଟି ଅଧ୍ୟକ୍ଷ ଗଜପତି ମହାରାଜଙ୍କ ଅଧ୍ୟକ୍ଷତାରେ ମଙ୍ଗଳବାର ହେବାକୁ ଥିବା ଶ୍ରୀମନ୍ଦିର ପରିଚାଳନା କମିଟି ବୈଠକ ସ୍ଥଗିତ ହୋଇଥିବା ନେଇ ବିଶେଷ ସୂତ୍ରରୁ ସୂଚନା ମିଳିଛି। ପୂବାହ୍ନ ୧୧ଟା ସମୟରେ ବଡ଼ଦାଣ୍ଡସ୍ଥିତ ନୀଳାଦ୍ରି ଭକ୍ତନିବାସ ପରିସରରେ ପରିଚାଳନା କମିଟି ବୈଠକ ଅନୁଷ୍ଠିତ ହେବାର ଥିଲା। କିନ୍ତୁ ହଠାତ୍ ବୈଠକସ୍ଥଗିତ ହେବାର କୌଣିସ ନିର୍ଦ୍ଦିଷ୍ଟ କାରଣ ସମ୍ପର୍କରେ ସୂଚନା ମିଳିପାରି ନାହିଁ। ଅନୁଷ୍ଠିତ ହେବାକୁ ଥିବା ପରିଚାଳନା ବୈଠକରେ ଅନେକ ଗୁରୁତ୍ୱପୂର୍ଣ୍ଣ ବିଷୟବସ୍ତୁ ଉପରେ ଆଲୋଚନା ହେବାର କାର୍ଯ୍ୟକ୍ରମ ରହିଥିଲା। ହେଲେ ଅଚାନକ ବୈଠକକୁ ବାତିଲ ହେବାକୁ ନେଇ ବିଭିନ୍ନ ମହଲରେ ନାନା ପ୍ରଶ୍ନବାଚୀ ସୃଷ୍ଟି ହୋଇଛି। ବୈଠକରେ ମହାପ୍ରଭୁଙ୍କ ସ୍ନାନଯାତ୍ରା ଓ ରଥଯାତ୍ରାର ସମୀକ୍ଷା, ଯାତ୍ରା ସମୟରେ ଦେଖାଦେଇଥିବା ବିଶୃଙ୍ଖଳା ଆଦି ସୁଧାରିବା ନେଇ ଆଲୋଚନା, ଶ୍ରୀମନ୍ଦିର ଚାରିଦ୍ୱାର ଖୋଲିବା ନେଇ ଆଲୋଚନା, ବନକଲାଗି ନେଇ ଚାଲିଥିବା ଦ୍ୱନ୍ଦ୍ୱ, ସେବାୟତ ପିଲାଙ୍କ ପାଇଁ ଗୁରୁକୁଳ, ବାସଗୃହ ସହ ବିଭିନ୍ନ ଗୁରୁତ୍ୱପୂର୍ଣ୍ଣ ପ୍ରସଙ୍ଗକୁ ନେଇ ଆଲୋଚନା କରାଯିବ ବୋଲି ଅନୁମାନ କରାଯାଇଥିଲା। ସେହିପରି ଅନ୍ତର୍ଜାତୀୟ ବାଲୁକା ଶିଳ୍ପୀ ପଦ୍ମଶ୍ରୀ ସୁଦର୍ଶନ ପଟ୍ଟନାୟକ ଅନୁଷ୍ଠିତ ହେବାକୁ ଥିବା ପରିଚାଳନା ବୈଠକରେ ରତ୍ନଭଣ୍ଡାର ଖୋଲିବା ନେଇ ଏଜେଣ୍ଡା ରଖିବା ପାଇଁ ପରିଚାଳନା କମିଟି ଅଧ୍ୟକ୍ଷ ଗଜପତି ମହାରାଜଙ୍କୁ ଚିଠି ଲେଖିଥିଲେ। ତେଣୁ ରତ୍ନଭଣ୍ଡାର ସମ୍ପର୍କରେ ଆଲୋଚନା କରାଯିବାର ଆଶା କରାଯାଉଥିଲା। ମାତ୍ର ବୈଠକ ସ୍ଥଗିତ କରାଯିବା ସହ ପରବର୍ତ୍ତୀ ବୈଠକ କେବେ ହେବ ସେନେଇ ଶ୍ରୀମନ୍ଦିର ପ୍ରଶାସନ ପକ୍ଷରୁ କୌଣସି ପ୍ରାକ୍ ସୂଚନା ଦିଆଯାଇନାହିଁ। ସେହିପରି ପୂର୍ବରୁ ମଧ୍ୟ ଗତ ୨୭ ତାରିଖରେ ବୈଠକ ଅନୁଷ୍ଠିତ ହେବ ବୋଲି ସୂଚନା ମିଳିଥିଲା, କିନ୍ତୁ କିଛି କାରଣ ପାଇଁ ଘୁଞ୍ଚାଯାଇ ଅଗଷ୍ଟ ୧ ମଙ୍ଗଳବାର ବୈଠକ ହେବ ବୋଲି ସୂଚନା ଦିଆଯାଇଥିଲା। ତେବେ ବୈଠକ ସ୍ଥଗିତ ନେଇ ନାନା ଆଲୋଚନା ହେଉଛି। ଏ ନେଇ ଶ୍ରୀମନ୍ଦିର ଲୋକ ସମ୍ପର୍କ ବିଭାଗର ଅଧିକାରୀ କହିଛନ୍ତି, ମଙ୍ଗଳବାର ଅଗଷ୍ଟ ୧ରେ ହେବାକୁ ଥିବା ପରିଚାଳନା ବୈଠକ ସ୍ଥଗିତ ନେଇ ସମ୍ପୂର୍ଣ୍ଣ ଭାବେ ସୂଚନା ନାହିଁ। ଶ୍ରୀମନ୍ଦିର ମୁଖ୍ୟ ପ୍ରଶାସକ ଅସୁସ୍ଥ ଅଛନ୍ତି। ଅପରପକ୍ଷେ ପରିଚାଳନା କମିଟି ଅଧ୍ୟକ୍ଷ ଗଜପତି ମହାରାଜ ବାହାରେ ଅଛନ୍ତି। କାଲି ଆସିବାର ଅଛି। ଯଦି ଗଜପତି ମହାରାଜ ଆସନ୍ତି ତା’ହେଲେ ବୈଠକ ହେବ, ନ ଆସିଲେ ସ୍ଥଗିତ ରଖାଯିବ ବୋଲି ସୂଚନା ଦେଇଥିଲେ। ତେବେ ବିଶେଷ ସୂତ୍ରରୁ ଖବର ଅନୁଯାୟୀ କିଛି ଅସୁବିଧା କାରଣରୁ ପରିଚାଳନା କମିଟି ବୈଠକ ସ୍ଥଗିତ କରାଯାଇଥିବା ଜଣାପଡ଼ିଛି।
