ଫୁଲବାଣୀ ଅଫିସ,୩୧।୩: କନ୍ଧମାଳ ଜିଲା ଫିରିଙ୍ଗିଆ ମେଡିକାଲର ଜନସ୍ବାସ୍ଥ୍ୟ ଅଧିକାରୀ ଡା. ନିଶିତ ନିଶାନ୍ତ ମାଲୁ ବୁଧବାର ଭିଜିଲାନ୍ସ ଜାଲରେ ପଡ଼ିଛନ୍ତି। ମେଡିକାଲରେ କାର୍ଯ୍ୟରତ ପୁରୁଷ ବହୁମୁଖୀ ସ୍ବାସ୍ଥ୍ୟକର୍ମୀ ବେଣୁପାଣି ଦିଗାଲଙ୍କ ବକେୟା ପ୍ରାପ୍ୟ ଅନୁମୋଦନ କରିବାକୁ ସେ ୭ ହଜାର ଟଙ୍କା ଲାଞ୍ଚ ନେଉଥିବା ବେଳେ ଧରାପଡ଼ି ଗିରଫ ହୋଇଛନ୍ତି। ଏ ନେଇ ଭିଜିଲାନ୍ସ ପକ୍ଷରୁ ନଂ.୭/୨୧ରେ ମାମଲା ରୁଜୁ ହୋଇଛି। ଜାମିନ୍ ନାମଞ୍ଜୁର ହେବାରୁ ଡା.ମାଲୁଙ୍କୁ ଜେଲ ହାଜତକୁ ପଠାଇ ଦିଆଯାଇଛି।
ପୁରୁଷ ବହୁମୁଖୀ ସ୍ବାସ୍ଥ୍ୟକର୍ମୀ ବେଣୁପାଣିଙ୍କର ଟିଏ ଏବଂ ଆର୍ସିଏମ୍ ବାବଦରେ ୪୧ ହଜାର ଟଙ୍କା ବକେୟା ପ୍ରାପ୍ୟ ପାଇବାକୁ ଥିଲା। ଏହି ଟଙ୍କା ପାଇଁ ଫାଇଲରେ ଦସ୍ତଖତ କରିବା ନିମନ୍ତେ ସେ ଡା.ମାଲୁଙ୍କୁ ନିବେଦନ କରିଥିଲେ। ହେଲେ ଗତ ୧୦ ତାରିଖରେ ଡା.ମାଲୁ ଏନେଇ ୭ ହଜାର ଟଙ୍କା ଦାବି କରିଥିଲେ। ଟଙ୍କା ନ ଥିବା ବେଣୁପାଣି କହିଥିଲେ। ଡା.ମାଲୁ ୩୧ ତାରିଖରେ ଟଙ୍କା ଦେବାକୁ କହିଥିଲେ। ଏ ନେଇ ବେଣୁପାଣି ଭିଜିଲାନ୍ସର ଦ୍ୱାରସ୍ଥ ହୋଇଥିଲେ। ଯୋଜନା ମୁତାବକ ଡା.ମାଲୁଙ୍କୁ ତାଙ୍କ କ୍ୱାର୍ଟର୍ସରେ ବେଣୁପାଣି ଟଙ୍କା ଦେଇଥିଲେ। ଏହି ସମୟରେ ପ୍ରସ୍ତୁତ ଥିବା ଭିଜିଲାନ୍ସ ଡିଏସ୍ପି ଅରୁଣ ନାୟକଙ୍କ ନେତୃତ୍ୱରେ କର୍ମଚାରୀମାନେ ପହଞ୍ଚି ତାଙ୍କୁ ଧରିବା ସହ କେମିକାଲ ବୋଳା ଟଙ୍କା ଜବତ କରିଥିଲେ।
