ଭୁବନେଶ୍ୱର, ୨୯ା୧୧ (ସ୍ପୋଟର୍ସ ବ୍ୟୁରୋ): ଇଣ୍ଡିଆନ୍ ସୁପର ଲିଗ୍(ଆଇଏସ୍ଏଲ୍)ର ଓଡ଼ିଶା ଫ୍ରାଞ୍ଚାଇଜ ଓଡ଼ିଶା ଫୁଟ୍ବଲ୍ କ୍ଲବ୍(ଓଏଫ୍ସି)ର ମୁଖ୍ୟ ପାର୍ଟନର ରହିଛି ଜିନ୍ଦଲ ପାନ୍ଥର୍ସ। ସୋମବାର ଏନେଇ ଜିନ୍ଦଲ ପାନ୍ଥର୍ସ ଏବଂ ଓଏଫ୍ସି ମଧ୍ୟରେ ଏକ ଚୁକ୍ତି ସ୍ବାକ୍ଷର ହୋଇଛି। ଆସନ୍ତା ସିଜନ୍ଗୁଡ଼ିକରେ ଜିନ୍ଦଲ ପାନ୍ଥର୍ସ ଓଏଫ୍ସିର ମୁଖ୍ୟ ପାର୍ଟନର ରହିବ। ଏକ ଖବରଦାତା ସମ୍ମିଳନୀରେ ଏହି ସହଭାଗିତା ସମ୍ପର୍କରେ ଘୋଷଣା କରାଯାଇଥିଲା। ପାନ୍ଥର୍ସ ପକ୍ଷରୁ ଜିନ୍ଦଲ ଷ୍ଟିଲ୍ର ମୁଖ୍ୟ ମାର୍କେଟିଙ୍ଗ୍ ଅଫିସର ସୁଶୀଲ କୁମାର ପ୍ରଧାନ ଏହି ଚୁକ୍ତି ସମ୍ପର୍କରେ ଘୋଷଣା କରିଥିଲେ। ଏହାସହିତ ଓଏଫ୍ସି ଓ ପାନ୍ଥର୍ସର ସହଯୋଗିତା ଫୁଟବଲ୍ କ୍ଲବକୁ ଗତି, ଶକ୍ତି ଓ ନମନୀୟତାର ଗୁଣ ପ୍ରଦାନ କରିବ। କ୍ରୀଡ଼ା ମାଧ୍ୟମରେ କମ୍ପାନୀ ସମାଜ ପ୍ରତି ଥିବା ନିଜ ଦାୟିତ୍ୱବୋଧ ପୂରଣ କରୁଛି ବୋଲି ସେ ପ୍ରକାଶ କରିଥିଲେ। ଫୁଟ୍ବଲ, କ୍ରିକେଟ୍, ହକି, କବାଡ଼ି ଓ ଖୋ ଖୋ ପରି ଖେଳ ସହିତ ପାନ୍ଥର୍ସ ନିଜକୁ ସଂଶ୍ଳିଷ୍ଟ ରଖିଛି। କ୍ରୀଡ଼ା ସହ ଜଡ଼ିତ ରହି ଯୁବବର୍ଗଙ୍କୁ ଅଧିକ ଆକୃଷ୍ଟ କରିବା ପାଇଁ କମ୍ପାନୀ ଲକ୍ଷ୍ୟ ରଖିଛି ବୋଲି ସେ କହିଛନ୍ତି। ଉଭୟ ଓଏଫ୍ସି ଏବଂ ଜିନ୍ଦଲ ଓଡ଼ିଶାରେ ଫୁଟ୍ବଲକୁ ଆଗକୁ ନେବାକୁ ଉଦ୍ୟମ କରିବେ ବୋଲି କହିଛନ୍ତି ଓଏଫ୍ସିର କ୍ଲବ ସଭାପତି ରାଜ୍ ଅଠଓ୍ବାଲ। ଉଲ୍ଲେଖଯୋଗ୍ୟ, ପୂର୍ବରୁ ଦିଲ୍ଲୀ ଡାଇନାମୋ ରହିଥିବା ଏହି ଫୁଟ୍ବଲ କ୍ଲବଟି ୨୦୧୯ରେ ଓଡ଼ିଶା ସରକାରଙ୍କ ସହଯୋଗରେ ଓଏଫ୍ସି ନାମରେ ପୁନଃନାମିତ ହୋଇଥିଲା। ଓଡ଼ିଶାରେ ଫୁଟ୍ବଲ ବିପ୍ଳବ ଆଣିବା ଲକ୍ଷ୍ୟରେ ଏହା ୨୦୧୯ରେ ଆଇଏସ୍ଏଲ୍ରେ ଅଂଶଗ୍ରହଣ କରିଥିଲା।
