ଜଟଣୀ,୨୬।୮(ଡି.ଏନ୍.ଏ.):ଆଉ ଦିନ କେଇଟା ପରେ ଗଣେଶ ପୂଜା। ଏହି ପୂଜା ପାଳନକୁ ନେଇ ଖୋର୍ଦ୍ଧାର ଜଟଣୀ ସହର ଚଳଚଞ୍ଚଳ ହୋଇପଡ଼ିଛି। ଦୁଇ ବର୍ଷର ବ୍ୟବଧାନ ପରେ ଭକ୍ତଙ୍କ ଗହଣରେ ପୂଜା ହେଉଥିବାରୁ ଏକାଠି ହେବେ ଭକ୍ତ ଏବଂ ଭଗବାନ। ସହରର କୋଣ ଅନୁକୋଣରେ ଥିବା ବିଭିନ୍ନ ପୂଜା ମଣ୍ଡପରେ ଗଣେଶପୂଜା ପାଇବେ। ଚଳିତ ପାର୍ବଣକୁ ସରସ ସୁନ୍ଦର ସହ ଅଧିକ ଆକର୍ଷଣୀୟ କରିବା ପାଇଁ ବିଭିନ୍ନ ସଂଗଠନ, ଅନୁଷ୍ଠାନ ପକ୍ଷରୁ ରାଜ୍ୟ ତଥା ବାହାର ରାଜ୍ୟରୁ କାରିଗର ଆଣି ତୋରଣ ସାଜସଜ୍ଜା ସହ ଶିଳ୍ପୀ ମୂର୍ତ୍ତି ଗଢ଼ିବାରେ ଲାଗିଛନ୍ତି। ଦୀର୍ଘ ୪୦ବର୍ଷରୁ ଊର୍ଦ୍ଧ୍ୱ ସମୟଧରି ସାର୍ବଜନୀନ ଗଣେଶ ପୂଜା କରି ଆସୁଥିବା ଗୋପବନ୍ଧୁ ଛକ ବ୍ୟବସାୟୀ ସଂଘ ପକ୍ଷରୁ ଚଳିତଥର ଅଧିକ ଆକର୍ଷଣୀୟ କରିବା ପାଇଁ ଜୋର୍ଦାର ପ୍ରସ୍ତୁତି ଚଳାଇଛନ୍ତି। କଟକ ବିଭିନ୍ନ ଆଲୋକିତ ଲାଇଟ୍ ଏବଂ ଚୌଦ୍ୱାରର ମେଢ଼ ଦର୍ଶକଙ୍କୁ ଆକୃଷ୍ଟ ବୋଲି ଆୟୋଜକ ବ୍ୟବସାୟୀ ସଂଘ ସଦସ୍ୟ କହିଛନ୍ତି। ୫୬ ଫୁଟ ଉଚ୍ଚର ଦୁଇଟି ଡିଜିଟାଲ ଚାଇନା ଗଟେ ଏବଂ ନଟରାଜ ଲାଇଟ ଗେଟ୍ ବ୍ୟବସାୟୀ ସଂଘର ଶୋଭାକୁ ଦ୍ୱିଗୁଣିତ କରିବା ନେଇ କମିଟି ଆଶା ରଖିଛନ୍ତି। ୭ଲକ୍ଷରୁ ୮ଲକ୍ଷ ଅର୍ଥ ଚଳିତ ପୂଜାରେ ଖର୍ଚ୍ଚ ହେବାକୁ ଥିବା ସମୟରେ ଦର୍ଶକଙ୍କ ମନୋରଞ୍ଜନ ପାଇଁ ଅନେକ ଦୃଷ୍ଟିହୀନ କଳାକାରଙ୍କ ଦ୍ୱାରା ଭଜନ ଏବଂ ସାଂସ୍କୃତିକ କାର୍ଯ୍ୟକ୍ରମ ପ୍ରତିଦିନ ସାରେ ଆୟୋଜିତ କରାଯିବ ବୋଲି କମିଟି ସଭାପତି ସୁରେନ୍ଦ୍ର କୁମାର ସାହୁ କହିଛନ୍ତି। ଉକ୍ତ ମଣ୍ଡପରେ ୮ଫୁଟ ଉଚ୍ଚର ପ୍ରଭୁ ଗଜାନନଙ୍କ ସହିତ ମାତା ଲକ୍ଷ୍ମୀ ଏବଂ ଦେବୀ ସରସ୍ବତୀ ପୂଜା ପାଇବେ। ଗଣେଶ ଚତୁର୍ଥୀ ଏବଂ ପୂର୍ଣ୍ଣମୀ ଭସାଣି ଦିନ କମିଟି ପକ୍ଷରୁ ପ୍ରଭୁଙ୍କ ନିକଟରେ ବିଭିନ୍ନ ଫଳମୂଳ ଏବଂ ମିଷ୍ଠାନ୍ନ ଭୋଗ ଲାଗି କରାଯାଇଥଏ। ଅନ୍ୟ ଦିନରେ ଠାକୁରଙ୍କ ନିକଟରେ ଖେଚୁଡ଼ି ଭୋଗ ଲାଗି ହୋଇଥାଏ। ଯାହା ମାନସିକ ଦାତା ଏବଂ ପୂଜା କମିଟି ବହନ କରିଥାନ୍ତି। ଉକ୍ତ ପ୍ରସାଦ ଶ୍ରଦ୍ଧାଳୁ ଏବଂ ବ୍ୟବସାୟୀଙ୍କ ମଧ୍ୟରେ ବଣ୍ଟା ଯାଇଥାଏ। ଅନ୍ୟପଟେ ଚଳିତ ବର୍ଷ ପ୍ରଭୁ ଗଜାନନଙ୍କ ହାତରେ ୩୫କିଲୋର ସୁସ୍ବାଦୁ ଦେଶୀ ଘିଅରେ ପ୍ରସ୍ତୁତ ଲଡ଼ୁ ଶୋଭା ପାଇବ। ପ୍ରତି ବର୍ଷପରି ଏକ ମନୋରମ କାର୍ଯ୍ୟକ୍ରମ ଜରିଆରେ ନିଲାମ ହୋଇଥାଏ। ଏହି ମଣ୍ଡପରେ ନିଲାମରେ ଲଡ଼ୁ ପାଇବା ନିମନ୍ତେ ରାଜ୍ୟର ବିଭିନ୍ନ ସ୍ଥାନରୁ ଶ୍ରଦ୍ଧାଳୁ ଅଂଶଗ୍ରହଣ କରଥାନ୍ତି ବୋଲି ଆୟୋଜକ କମିଟି ସଦସ୍ୟ କହିଛନ୍ତି। ପୂଜା ସମୟରେ ବିଶେଷକରି ସାରେ ଦର୍ଶକଙ୍କ ଭିଡ଼ ବେଶି ପରିଲକ୍ଷିତ ହେବା ଲକ୍ଷ୍ୟରେ ଭିଡ଼ ଏବଂ ଟ୍ରାଫିକ ନିୟନ୍ତ୍ରଣ ପାଇଁ ପୂଜା କମିଟି ପକ୍ଷରୁ ଏକ ୧୨ଜଣିଆ କମିଟି ଗଠନ କରାଯିବା ନେଇ କମିଟି ପକ୍ଷରୁ ନିଷ୍ପତ୍ତି ନିଆଯାଇଛି।
