ଦାରିଙ୍ଗବାଡି,୧୪।୨(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡିରେ ଉଠା ଦୋକାନୀଙ୍କ ତହସିଲ କାର୍ଯ୍ୟାଳୟ ଘେରାଉ ଘଟଣା ପରେ ସ୍ଥାନୀୟ ପ୍ରଶାସନ ଥଇଥାନ ପାଇଁ ପଦକ୍ଷେପ ଜୋରଦାର ଆରମ୍ଭ ହୋଇଯାଇଛି। ସ୍ଥାନୀୟ ବିଡ଼ିଓ ପ୍ରୀତିରଞ୍ଜନ ରଥ ନିଜେ ଉଠା ଦୋକାନୀଙ୍କ ପାଇଁ ଥଇଥାନ ପାଇଁ ନିଆଯାଇଥିବା ଜମିରେ ପୂର୍ବ ନିର୍ଦ୍ଧାରିତ ପରିକଳ୍ପନାକୁ କାର୍ଯ୍ୟକାରୀ ପାଇଁ ଅଣ୍ଟା ଭିଡ଼ିଛନ୍ତି। ସେ ପିଣ୍ଡି ନିର୍ମାଣ ଓ ପୂର୍ବରୁ ରହିଥିବା ପିଣ୍ଡି ଉପରେ ଦୋକାନ ଗୃହ ନିର୍ମାଣ, ପିଇବା ପାଣି ପାଇଁ ଆରଓ ସ୍ଥାପନ, ବିଦ୍ୟୁତ ସଂଯୋଗ ପାଇଁ ସ୍ଥାନ ନିରୂପଣ ସହ ଡ୍ରେନେଜ ବ୍ୟବସ୍ଥା ପାଇଁ ନିଜେ ଉପସ୍ଥିତ ରହି ତଦାରଖ କରିଛନ୍ତି। ବିଡ଼ିଓ ଏହି ସମସ୍ତ କାର୍ଯ୍ୟକୁ ଆସନ୍ତା ୧୫ ଦିନ ମଧ୍ୟରେ ସାରିବାକୁ କନିଷ୍ଠ ଯନ୍ତ୍ରୀ ଧୀରେନ ସେଠୀଙ୍କୁ ନିର୍ଦ୍ଦେଶ ଦେଇଛନ୍ତି। ଏହି ସମୟରେ ବିଡ଼ିଓ ପ୍ରୀତିରଞ୍ଜନ ରଥଙ୍କ ସହ ସ୍ଥାନୀୟ ସରପଞ୍ଚ ଚନ୍ଦ୍ରିକା ମଲିକ, କନିଷ୍ଠ ଯନ୍ତ୍ରୀ ଧୀରେନ ସେଠୀ, ପଞ୍ଚାୟତ କାର୍ଯ୍ୟନିର୍ବାହୀ ଯନ୍ତ୍ରୀ ରୋଶନ ରଥ ପ୍ରମୁଖ ଉପସ୍ଥିତ ରହିଥିଲେ।
ଏନେଇ ବିଡ଼ିଓ ରଥ ପ୍ରତିକ୍ରିୟାରେ କହିଛନ୍ତି, ଦାରିଙ୍ଗବାଡି ବଜାରରେ କୌଣସି ପନିପରିବା ଦୋକାନ ଖୋଲିବାକୁ ଦିଆଯିବ ନାହିଁ। ସମସ୍ତ ପନିପରିବା ଏହି ସ୍ବତନ୍ତ୍ର ମାର୍କେଟରେ ବିକ୍ରିବଟା କରାଯିବ। ଦାରିଙ୍ଗବାଡିରେ ହୋଲସେଲ ଓ ଖୁଚୁରା ପନିପରିବା ବିକ୍ରିବଟା ଏହି ଗୋଟିଏ ସ୍ଥାନରେ ହିଁ କରାଯିବ। ଏଥିସହ ସମସ୍ତ ବସ ଗୁଡିକ ଓ ଯାତ୍ରୀବାହୀ ଅଟୋ ଏହି ମାର୍କେଟ ନିକଟ ବସଷ୍ଟାଣ୍ଡରେ ହିଁ ପାର୍କିଂ କରିବେ। ଫଳରେ ଗ୍ରାହକମାନେ ଏହି ନୂତନ ବଜାରରେ ନିଜ ମନ ପସନ୍ଦର ପନିପରିବା ସହ ଅନ୍ୟ ଦୋକାନରୁ ମାର୍କେଟିଂ କରିବା ସହଜ ହେବ ବୋଲି କହିଛନ୍ତି। ସେ କହିଛନ୍ତି ଯେ, ସମସ୍ତ ଉଠାଦୋକାନୀଙ୍କୁ ଥଇଥାନ କରାଯିବ। ଆବଶ୍ୟକ ପଡିଲେ ଜମି ପାଇଁ ତହସିଲଦାରଙ୍କୁ କୁହାଯିବ। ଜମି ଯୋଗାଇଦେଲେ ଆହୁରି ସ୍ବତନ୍ତ୍ର ଜନଜାତି ହାଟ ନିର୍ମାଣ ପାଇଁ ବାଲିଗୁଡା ଆଇଟିଡିଏର ପ୍ରକଳ୍ପ ପ୍ରଶାସକଙ୍କୁ ନିବେଦନ କରାଯିବ ବୋଲି ସେ କହିଛନ୍ତି।
ସୂଚନାଯୋଗ୍ୟ ଯେ, ପ୍ରାୟ ୧୭୦ ଜଣ ଉଠା ଦୋକାନୀ ଦୋକାନ ଗୃହ ପାଇବା ପାଇଁ ଆବେଦନ କରିଥିବା ବେଳେ ଏବେ ସୁଦ୍ଧା ୯୦ଜଣଙ୍କୁ ଦୋକାନ ଗୃହ ଯୋଗାଇଦିଆଯାଇଛି। ଆହୁରି ପ୍ରଶାସନ ପାଇଁ ଦୋକାନ ଗୃହ ର ଆବଶ୍ୟକତା ରହିଥିବାରୁ ତାକୁ ପୁରଣ ପାଇଁ ଯୁଦ୍ଧ କାଳୀନ ଭିତ୍ତିରେ କାର୍ଯ୍ୟ ଚାଲିଛି ।
ସୂଚନାଯୋଗ୍ୟ ଯେ, ୫୯ନଂ ଜାତୀୟ ରାଜପଥ ଉପରୁ ଉଠା ଦୋକାନୀଙ୍କୁ ଗତ ଜାନୁୟାରୀ ୨୧ରେ ଜବରଦଖଲ ଉଚ୍ଛେଦ କରାଯାଇଥିବାବେଳେ ଥଇଥାନରେ ବିଳମ୍ବ ଯୋଗୁ ଉଠା ଦୋକାନୀ ସଂଘ ପକ୍ଷରୁ ଶୁକ୍ରବାର ତହସିଲ କାର୍ଯ୍ୟାଳୟକୁ ଘେରାଉ କରିବା ସହ ଥଇଥାନ କର ନ ହେଲେ ଆମ ପରିବାର ଲୋକଙ୍କୁ ଖାଇବାକୁ ଦେଇ ପ୍ରତିପୋଷଣ କର ବୋଲି ଦାବିରେ ବିକ୍ଷୋଭ କରିବା ସହ ଦୀର୍ଘ ସମୟ ଧରି କାର୍ଯ୍ୟାଳୟ ଆଗରେ ଧାରଣାରେ ବସିଥିଲେ। ପରେ ବିଡିଓ ରଥ, ତହସିଲଦାର ଧୀରୋଜ ପାତ୍ର, ଆଇଆଇଆସି ସଂଗ୍ରାମ କେଶରୀ ଜେନା ପ୍ରମୁଖ ଉତ୍ତ୍ୟକ୍ତ ଲୋକଙ୍କୁ ବୁଝାସୁଝା କରି ଆଲୋଚନା ପରେ ୧୫ ଦିନ ମଧ୍ୟରେ ଥଇଥାନ କରିବାକୁ ପ୍ରତିଶ୍ରୁତି ଦେଇଥିଲେ ପରେ ଆନ୍ଦୋଳନକାରୀମାନେ ସେଠାରୁ ଉଠିଥିଲେ।
Dharitri – Odisha’s No.1 Odia Daily
