ପୃଥିବୀ ବର୍ତ୍ତମାନ ଅତ୍ୟନ୍ତ ଖରାପ ପରିସ୍ଥିତି ଦେଇ ଗତି କରୁଛି। ପ୍ରଦୂଷଣ ଯୋଗୁ ଗ୍ଲୋବାଲ ଓ୍ବାମିର୍ଂ ବଢୁଛି। ଯାହାର ପ୍ରଭାବ ପୃଥିବୀପୃଷ୍ଠର ପ୍ରତି କୋଣ ଅନୁକୋଣରେ ପଡୁଛି। ଏହି କାରଣରୁ ବରଫ ଖଣ୍ଡ ମଧ୍ୟ ତରଳିବାରେ ଲାଗିଛି। ଗତ ୨୬ ବର୍ଷ ମଧ୍ୟରେ ୨୮ ଟ୍ରିଲିୟନ ଟନ୍ ବରଫ ନଷ୍ଟ ହୋଇସାରିଲାଣି। ଏକ ରିପୋର୍ଟ ଅନୁଯାୟୀ ବର୍ତ୍ତମାନ ସୁଦ୍ଧା ୨୮,୦୦୦,୦୦୦,୦୦୦,୦୦୦,୦୦୦ କିଲୋଗ୍ରାମ ବରଫ ତରଳି ସାରିଲାଣି।
ବ୍ରିଟିଶ ବୈଜ୍ଞାନିକଙ୍କ ଏକ ଟିମ୍ ଅଧ୍ୟୟନ କରି ଏହି ତଥ୍ୟ ପ୍ରଦାନ କରିଛନ୍ତି। ଏହି ଟିମ୍ର ରିପୋର୍ଟ ଅନୁଯାୟୀ, ୧୯୯୪ରୁ ଆଜି ପର୍ଯ୍ୟନ୍ତ ୨୮ ଟ୍ରିଲିୟନ ଟନ୍ ବରଫ ନଷ୍ଟ ହୋଇସାରିଲାଣି। ବୈଜ୍ଞାନିକଙ୍କ ଏହି ଅଧ୍ୟୟନ ପାଇଁ ସାଟେଲାଇଟ୍ ଇମେଜ୍, ବରଫ ପୋଲ୍ର ସବିଶେଷ ବିବରଣୀ, ପାହାଡ଼ ଏବଂ ଗ୍ଲେସିୟରରେ ଜମିଥିବା ବରଫ ସମ୍ପର୍କରେ ବିଶ୍ଳେଷଣ କରାଯାଇଛି। ପରେ ଅଧ୍ୟୟନରୁ ଜଣାପଡ଼ିଛି ଯେ, ବଢୁଥିବା ତାପମାତ୍ରା ଯୋଗୁ ବରଫ ତୀବ୍ର ବେଗରେ ତରଳୁଛି।
ବୈଜ୍ଞାନିକମାନଙ୍କ ଏହି ରିପୋର୍ଟ କ୍ରିଓସଫେର ନାମକ ଏକ ପତ୍ରିକାରେ ପ୍ରକାଶ ପାଇଛି। ଯଦି ଏହି ଭାବରେ ବରଫ ତରଳିବ ତେବେ ପୃଥିବୀ ସୂର୍ଯ୍ୟ କିରଣକୁ ପ୍ରତିଫଳିତ କରିପାରିବ ନାହିଁ। ଯେଉଁଥିପାଇଁ ସୂର୍ଯ୍ୟର ଅତିବାଇଗଣି ରଶ୍ମୀ ପୃଥିବୀର ସମସ୍ତ ଜୀବଜନ୍ତୁଙ୍କ ପାଇଁ କ୍ଷତି ପହଞ୍ଚାଇବ। ଏହି ବରଫ ସୌର ବିକିରଣକୁ ପଠାଇବାରେ ସାହାଯ୍ୟ କରେ। ମାତ୍ର ଯଦି ନ ରହିବ ତେବେ ସୌର ବିକିରଣରୁ ଆମକୁ କିଏ ବା ବଞ୍ଚାଇବ?
ଏତଦ୍ବ୍ୟତୀତ ବରଫ ତରଳିବା ଦ୍ୱାରା ସମୁଦ୍ରର ଜଳପତ୍ତନ ମଧ୍ୟ ବୃଦ୍ଧି ପାଇବ। ଯେତିକି ବରଫ ତରଳିବ ସମୁଦ୍ରର ଜଳସ୍ତର ତା’ଠୁ ଅଧିକ ବୃଦ୍ଧି ପାଇବ। ଫଳରେ ଦେଶରେ ଥିବା କେତେକ ଦ୍ୱୀପ ପାଣିରେ ବୁଡ଼ିଯିବ। ସମୁଦ୍ରର ଜଳପତ୍ତନ ପ୍ରାୟ ୩ ଫୁଟ ବଢ଼ିଯିବ ବୋଲି ବୈଜ୍ଞାନିକମାନେ ଆକଳନ କରିଛନ୍ତି।
