ବାଲୁଗାଁ/କୃଷ୍ଣପ୍ରସାଦ, ୨୬ା୧୨(ଡି.ଏନ୍.ଏ.): ବାୟୁମଣ୍ଡଳରୁ ଉଷ୍ମତା ହ୍ରାସ ପାଇବା ପରେ ଚିଲିକାକୁ ରଙ୍ଗବେରଙ୍ଗର ବିଦେଶୀ ପକ୍ଷୀଙ୍କ ଆଗମନ ଆରମ୍ଭ ହୋଇଥାଏ। ଫଳରେ ଚିଲିକା ଚଳଚଞ୍ଚଳ ହୋଇପଡ଼ିଥାଏ। ଡିସେମ୍ବରରୁ ହଜାର ହଜାର ପର୍ଯ୍ୟଟକ ଏଠାକୁ ଆଗମନ କରିଥାନ୍ତି। ପର୍ଯ୍ୟଟକମାନେ ମା’ କାଳିଜାଈଙ୍କ ଦର୍ଶନ କରିବା ସହ ଚିଲିକାର ପ୍ରାକୃତିକ ସୌନ୍ଦର୍ଯ୍ୟ ଏବଂ ପକ୍ଷୀଙ୍କ ଜଳକ୍ରୀଡ଼ାର ଆନନ୍ଦ ନେଇଥାନ୍ତି। କରୋନା ମହାମାରୀ ଯୋଗୁ ଚଳିତବର୍ଷ ଚିଲିକାକୁ କାଁ ଭାଁ ପର୍ଯ୍ୟଟକ ଆସୁଥିବା ଜଣାପଡ଼ିଛି। ଅନ୍ୟପଟେ କାଳିଜାଈ ମନ୍ଦିର ବନ୍ଦ ଥିବା ବେଳେ ବଡ଼ଦିନରେ ଦର୍ଶନ ପାଇଁ ଆସିଥିବା ପର୍ଯ୍ୟଟକମାନେ ନିରାଶ ହୋଇଥିଲେ। ଗତବର୍ଷ ଅପେକ୍ଷା ଚଳିତବର୍ଷ ୨୦ପ୍ରତିଶତ ପର୍ଯ୍ୟଟକ ଆସିଥିବା ସର୍ଭେରୁ ଜଣାପଡ଼ିଛି।
ସୂଚନା ମୁତାବକ, କରୋନା କଟକଣା ଯୋଗୁ ମାର୍ଚ୍ଚରୁ ଚିଲିକାରେ ଡଙ୍ଗା ଚଳାଚଳ ବନ୍ଦ ରହିଥିତ୍ଲା। ଅକ୍ଟୋବର ୧୫ରେ ଚିଲିକାରେ ଯାତ୍ରୀ ପରିବହନ ନିମନ୍ତେ ଜିଲା ପ୍ରଶାସନ ପକ୍ଷରୁ ଅନୁମତି ମିଳିଥିଲା। ସରକାରୀ ଗାଇଡ୍ଲାଇନ୍ ଅନୁଯାୟୀ ଗୋଟିଏ ଡଙ୍ଗାରେ ୧୪ଜଣ ପରିବର୍ତ୍ତେ ୭ଜଣ ଯାତ୍ରୀ ପରିବହନ ନେଇ ନିୟମ ରହିଛି। ଏଥିସହ ମାସ୍କ ପରିଧାନ ଏବଂ ସାମାଜିକ ଦୂରତ୍ୱ ନିର୍ଦ୍ଦେଶ ରହିଛି। ଗତବର୍ଷ ବଡ଼ଦିନରେ ଓଟିଡିସି ପକ୍ଷରୁ ନିୟୋଜିତ ବୋଟ୍ରେ ୧୨ଶହ ପର୍ଯ୍ୟଟକ ଭ୍ରମଣରେ ଯାଇଥିବା ବେଳେ ଚଳିତ ବର୍ଷ ମାତ୍ର ୩ଶହ ପର୍ଯ୍ୟଟକଙ୍କ ବୁକିଂ ହୋଇଥିବା ପରିଚାଳାକ ସୌମ୍ୟକାନ୍ତ ଦାସ କହିଛନ୍ତି। ଅନ୍ୟପଟେ ପକ୍ଷୀ ଅଭୟାରଣ୍ୟ ନଳବଣକୁ ପ୍ରବେଶ ନେଇ ନିଷେଧ ଥିବାରୁ ପର୍ଯ୍ୟଟକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଉଛି। ଏଥିପ୍ରତି ରାଜ୍ୟ ସରକାର ଦୃଷ୍ଟି ଦେବା ସହ ନଳବଣକୁ ସୁରକ୍ଷାବଳୟ ମଧ୍ୟରେ ପ୍ରବେଶ ନିମନ୍ତେ ଅନୁମତି ପ୍ରଦାନ କଲେ ପର୍ଯ୍ୟଟକଙ୍କ ସଂଖ୍ୟା ବୃଦ୍ଧି ପାଇବ।
