ଭାରତରେ ନଦୀଗୁଡ଼ିକର ଦୁର୍ଦ୍ଦଶା କହିଲେ ନ ସରେ। ସରକାରୀ ପ୍ରୟାସ ସତ୍ତ୍ୱେ ନଦୀଗୁଡ଼ିକର ଅବସ୍ଥା ସୁଧାର ହୋଇନାହିଁ। ସମ୍ପ୍ରତି ମଧ୍ୟପ୍ରଦେଶର ରାଜଗଡ଼ ଜିଲାର ଜଣେ ୨୦ ବର୍ଷୀୟ ଯୁବକଙ୍କ ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି। ତାଙ୍କର କଠିନ ପରିଶ୍ରମ ତାଙ୍କୁ କେବଳ ଭାରତରେ ନୁହେଁ ବରଂ ବିଦେଶରେ ମଧ୍ୟ ଦୃଷ୍ଟି ଆକର୍ଷଣ କରିଛି। ସେ ଏକାକୀ ଅଳିଆ ସଫା କରିବା ପାଇଁ ନଦୀରେ ପଶିଥିଲେ। ଯେଉଁ ସମୟରେ କି ଲୋକମାନେ ତାଙ୍କୁ ଥଟ୍ଟା ପରିହାସ କରୁଥିଲେ।
ସେ କାହାରି କଥାକୁ ଖାତିରି ନ କରି ନିଜ ପ୍ରଚେଷ୍ଟା ଜାରି ରଖିଥିଲେ। ଯେଉଁଥିପାଇଁ ଆଜି ତାଙ୍କୁ ବିଦେଶରୁ ଚାକିରି ଅଫର ମିଳିଛି। ଭିଡିଓରେ ନଦୀ ସଫା ହେବାର ପୂର୍ବରୁ ଏବଂ ପରେ ଫଟୋ ମଧ୍ୟ ଦେଖାଯାଉଛି, ଯାହା ପରିବର୍ତ୍ତନଗୁଡ଼ିକୁ ସ୍ପଷ୍ଟ ଭାବରେ ଦେଖାଯାଉଛି। ଦୁଇଟି ଫଟୋ ମଧ୍ୟରେ ପାର୍ଥକ୍ୟ ଦେଖି ଲୋକମାନେ ଆଶ୍ଚର୍ଯ୍ୟ ହୋଇଗଲେ। ପୂର୍ବରୁ ଅଳିଆ ଏବଂ ମଇଳାରେ ପରିପୂର୍ଣ୍ଣ ଥିବା ଅଞ୍ଚଳ ଏବେ ସଫା ହେବା ପରେ ଯଥେଷ୍ଟ ଭିନ୍ନ ହୋଇଯାଇଛି। ଯୁବକ ଜଣକ ସୋସିଆଲ ମିଡିଆରେ ନଦୀ ସଫା କରିବାର ଅନେକ ଭିଡିଓ ଶେୟାର କରିଛନ୍ତି।
ଗୋଟିଏ ଦିନ ମଧ୍ୟପ୍ରଦେଶର ରାଜଗଡ଼ ଜିଲାର ବିଓରାର ଜଣେ ଯୁବକ ସୁରେନ୍ଦ୍ର ସିଂହ ନଦୀକୁ ମଇଳାରେ ପରିପୂର୍ଣ୍ଣ ଥିବା ଦେଖି ଏହାକୁ ସଫା କରିବାକୁ ଚିନ୍ତା କଲେ। ଏହି ଧାରଣା ତାଙ୍କର ମିଶନ ପାଲଟିଗଲା। ସୁରେନ୍ଦ୍ର ଜଣକ କୌଣସି ସାହାଯ୍ୟ ବିନା ଏକାକୀ ଏହାକୁ ସଫା କରିବାକୁ ବାହାରି ପଡ଼ିଲେ। ସେ ସରକାର କିମ୍ବା ପ୍ରଶାସନକୁ ସାହାଯ୍ୟ ମାଗିଲେ ନାହିଁ। ସେ ନିଜ ଖର୍ଚ୍ଚରେ ଏହାକୁ ସଫା କଲେ। ସୁରେନ୍ଦ୍ର ମାସମାସ ଧରି ନଦୀରୁ ଅଳିଆ ସଫା କରି ଚାଲିଲେ।
ସେ କୁହନ୍ତି, ପ୍ରତ୍ୟେକ ମହତ୍ତ୍ୱ କାର୍ଯ୍ୟ ଆରମ୍ଭ ହେବା ପୂର୍ବରୁ ବାଧା ଆସିଥାଏ। ଦିନ ଥିଲା ନଦୀ ଏକାକୀ ସଫା କରୁଥିବା ଦେଖି ଲୋକମାନେ ତାଙ୍କୁ ପରିହାସ କରୁଥିଲେ, ପଚାରୁଥିଲେ କି ସେ କେତେ ଦିନ ପର୍ଯ୍ୟନ୍ତ ଏମିତି କାମ ଜାରି ରଖିବେ। ଏହା ସତ୍ତ୍ୱେ, ସେ ପଛକୁ ହଟି ନଥିଲେ ଏବଂ ପୂର୍ଣ୍ଣ ଆଗ୍ରହ ସହିତ ଜାରି ରଖିଲେ। ସମାଲୋଚନାକୁ ଖାତିର ନ କରି ସେ ତାଙ୍କର ଅଭିଯାନ ଜାରି ରଖିଲେ।
ସୁରେନ୍ଦ୍ରଙ୍କ କଠିନ ପରିଶ୍ରମ ଏବେ ବିଦେଶରେ ପହଞ୍ଚିଛି। ନଦୀ ସଫା କରିବାର ତାଙ୍କ କାହାଣୀ ନେଦରଲ୍ୟାଣ୍ଡର ଏକ ସଂଗଠନର ପ୍ରତିଷ୍ଠାତା ଏବଂ ସିଇଓଙ୍କ ପାଖରେ ମଧ୍ୟ ପହଞ୍ଚିଛି। ଏହି ସଂଗଠନ ବିଶ୍ୱର ସମୁଦ୍ର ଏବଂ ନଦୀରୁ ପ୍ଲାଷ୍ଟିକ ପ୍ରଦୂଷଣ ଦୂର କରିବା ପାଇଁ କାମ କରନ୍ତି। ସୁରେନ୍ଦ୍ର ଏକା ନଦୀ ସଫା କରିବାର ପ୍ରୟାସର ଏକ ଭିଡିଓ ଦେଖିବା ପରେ, ଏହି ବିଦେଶୀ ସଂଗଠନର ସିଇଓ ତାଙ୍କ ସୋସିଆଲ ମିଡିଆ ମାଧ୍ୟମରେ ତାଙ୍କୁ ତାଙ୍କ ସଂଗଠନରେ ଚାକିରି ପ୍ରଦାନ କରିଛନ୍ତି। ସେ ତାଙ୍କ ପୋଷ୍ଟରେ ଲେଖିଛନ୍ତି, ‘ଆମ ପାଇଁ କାମ କରିବାକୁ ଆସ।’
ସୁରେନ୍ଦ୍ର ତାଙ୍କ ଇନ୍ଷ୍ଟାଗ୍ରାମରେ କେବଳ ନଦୀ ସଫା ପାଇଁ ତାଙ୍କର ଉତ୍ସର୍ଗୀକୃତତାର ଏହି ଭିଡିଓ ଶେୟାର କରିଛନ୍ତି। ଏପର୍ଯ୍ୟନ୍ତ ୧୫ ଲକ୍ଷରୁ ଅଧିକ ଲୋକ ଏହାକୁ ଦେଖିସାରିଛନ୍ତି ଏବଂ ହଜାର ହଜାର ଲୋକ ଏହାକୁ ଲାଇକ୍ ବି କରିଛନ୍ତି। ଭାଇରାଲ ଭିଡିଓଟି ୟୁଜର୍ସଙ୍କଠାରୁ ଅନେକ ପ୍ରତିକ୍ରିୟା ପାଇଛି। ଜଣେ ୟୁଜର ଲେଖିଛନ୍ତି, ୨୦ ବର୍ଷୀୟ ଯୁବକଙ୍କୁ କାହିଁକି ଏକ ସାର୍ବଜନୀନ ନଦୀ ସଫା କରିବାକୁ ପଡିଲା? ଅନେକ ୟୁଜର ତାଙ୍କ ଉତ୍ସର୍ଗୀକୃତତା ଏବଂ କଠିନ ପରିଶ୍ରମକୁ ପ୍ରଶଂସା କରୁଛନ୍ତି।
