ନୂଆଦିଲ୍ଲୀ: ଆୟକର ବିଭାଗ ପକ୍ଷରୁ ଆସେସ୍ମେଣ୍ଟ ବର୍ଷ ୨୦୧୯-୨୦ (ଆର୍ଥତ୍କ ବର୍ଷ ୨୦୧୮-୧୯) ଲାଗି ଆୟକର ରିଟର୍ନ (ଆଇଟିଆର୍) ଫାଇଲିଂ କରିବାର ସୀମାକୁ ବୁଧବାର ବୃଦ୍ଧି କରାଯାଇଛି। ଏଥିଲାଗି ଅବଧି ସେପ୍ଟେମ୍ବର ୩୦ ଯାଏ ରହିଥିବା ବେଳେ ଏହାକୁ ନଭେମ୍ବର ୩୦ ଯାଏ ବଢ଼ାଯାଇଛି। କୋଭିଡ୍-୧୯ ଯୋଗୁ ଲୋକମାନେ ବର୍ତ୍ତମାନ ସମସ୍ୟାରେ ରହିଥିବାରୁ ବିଭାଗ ଏଭଳି ନିଷ୍ପତ୍ତି ଗ୍ରହଣ କରିଥିବା ଜଣାପଡିଛି। ଆୟକର ବିଭାଗ ଟୁଇଟ ଯୋଗେ କହିଛି ଯେ, କୋଭିଡ୍ ଯୋଗୁ ଲୋକମାନେ ସମସ୍ୟାରେ ରହିଛନ୍ତି। ଏଭଳି ବିଭିନ୍ନ ଦିଗକୁ ବିଚାରକରି ଟିକସଦାତାଙ୍କୁ ଆଶ୍ୱସ୍ତି ପ୍ରଦାନ କରିବା ଲାଗି ଆୟକର ବିଭାଗର ନୀତି ନିର୍ଦ୍ଧାରଣକାରୀ ସଂସ୍ଥା କେନ୍ଦ୍ରୀୟ ପ୍ରତ୍ୟକ୍ଷ ଟିକସ ବୋର୍ଡ(ସିବିଡିଟି) ପକ୍ଷରୁ ଏଭଳି ପଦକ୍ଷେପ ହାତକୁ ନିଆଯାଇଥିବା କୁହାଯାଇଛି। ସୂଚନା ଯୋଗ୍ୟ, ୨୦୧୮-୧୯ ଆଇଟିଆର୍ ଫାଇଲିଂ କରିବାର ଅବଧିକୁ ସରକାର ବର୍ତ୍ତମାନ ସୁଦ୍ଧା ୪ଥର ବୃଦ୍ଧି କରିଛନ୍ତି। ଆଇଟିଆର୍ ପଇଠ କରିବା ଲାଗି ଟିକସଦାତାଙ୍କ ପାଖକୁ ଏସ୍ଏମ୍ଏସ୍ ଏବଂ ଇ-ମେଲ୍ ପଠାଯାଉଛି। ଅନ୍ୟ ଏକ ବିଜ୍ଞପ୍ତିରେ ଆୟକର ବିଭାଗ ପକ୍ଷରୁ କୁହାଯାଇଛି ଯେ, ଚଳିତ ବର୍ଷ ସେପ୍ଟେମ୍ବର ୨୯ ସୁଦ୍ଧା ୩୩ ଲକ୍ଷ ଟିକସଦାତାଙ୍କୁ ୧.୧୮ ଲକ୍ଷ କୋଟି ଟଙ୍କାର ରିଫଣ୍ଡ ପ୍ରଦାନ କରାଯାଇଛି। ଏହା ମଧ୍ୟରେ ୩୨, ୨୩୦ କୋଟି ଟଙ୍କାର ବ୍ୟକ୍ତିଗତ ଆୟକର ରିଫଣ୍ଡ ରହିଥିବା ବେଳେ ୮୬,୦୯୪ କୋଟି ଟଙ୍କାର କର୍ପୋରେଟ ଟିକସ ରିଫଣ୍ଡ ସାମିଲ ରହିଛି।
