ନୂଆଦିଲ୍ଲୀ: ଏଚ୍-୧ ବି ଭିଜା ସମେତ ଅନ୍ୟ ବର୍ଗରେ ଭିଜା ଦେୟ ବୃଦ୍ଧି କରିବା ଲାଗି ଟ୍ରମ୍ପ ପ୍ରଶାସନ ନିଷ୍ପତ୍ତି ଗ୍ରହଣ କରିଥିଲା। ଏହି ନିଷ୍ପତ୍ତି ଚଳିତ ବର୍ଷ ଅକ୍ଟୋବର ୨ର ଲାଗୁ କରିବା ଯୋଜନା ରହିଥିଲା। ଏହି ପ୍ରସ୍ତାବକୁ ଆମେରିକାର ଡିଷ୍ଟ୍ରିକ୍ଟ କୋର୍ଟ ଜଜ୍ ଜେଫ୍ରେ ହ୍ବାଇଟ୍ ବୁଧବାର ସ୍ଥଗିତ କରିଛନ୍ତି। ସୂଚନା ମୁତାବକ ଏଚ୍-୧ ବି ଭିଜା ଦେୟ ୨୧% ବୃଦ୍ଧି କରିବାକୁ ଆମେରିକା ସରକାର ଯୋଜନା ରଖିଛନ୍ତି। ସେହିଭଳି ଏଲ୍୧ ଭିଜା ଦେୟରେ ୭୫%, ଏଚ୍-୪ ଭିଜାରେ ଦେୟ ୩୪% ବୃଦ୍ଧି ହେବ ବୋଲି ପୂର୍ବରୁ ଘୋଷଣା ହୋଇସାରିଛି। ଆମେରିକା ସରକାରଙ୍କ ଏହି ନିଷ୍ପତ୍ତି ବିରୋଧରେ ୮ ସାମାଜିକ ଅନୁଷ୍ଠାନ କୋର୍ଟଙ୍କ ଦ୍ୱାରସ୍ଥ ହୋଇଥିଲେ। ବେଆଇନ ଭାବେ ଭିଜା ଦେୟ ବଢାଯାଇଥିବା ଆବେଦନକାରୀ ଅଭିଯୋଗରେ କହିଛନ୍ତି। ସେହିଭଳି ନାଗରିକତା ଆବେଦନ ଫି ଏବଂ ଶରଣାର୍ଥୀଙ୍କ ଲାଗି ହୋଇଥିବା ଫି ବୃଦ୍ଧି ପ୍ରସ୍ତାବକୁ ମଧ୍ୟ ଆବେଦନରେ ନିନ୍ଦା କରାଯାଇଛି। ସମଗ୍ର ଆମେରିକା ଲାଗି କୋର୍ଟଙ୍କ ଏହି ସ୍ଥଗିତ ନିଷ୍ପତ୍ତି କାର୍ଯ୍ୟକାରୀ ହେବ। ସେହିଭଳି ମାମଲାର ଚୂଡ଼ାନ୍ତ ନିଷ୍ପତ୍ତି ନ ଆସିବା ଯାଏ ପୂର୍ବରୁ ଯେଉଁ ଫି ଲାଗୁ ହେଉଥିଲା ସେଭଳି ବ୍ୟବସ୍ଥା ରହିବ ବୋଲି ଜଣାପଡିଛି।
