ଲଣ୍ଡନ,୧୩।୩: ବ୍ରିଟେନ୍ରେ ବେଆଇନ ଭାରତୀୟ ପ୍ରବାସୀଙ୍କ ସଂଖ୍ୟା ବଢ଼ିବାରେ ଲାଗିଥିବା ସେଠାକାର ସରକାର ଦାବି କରିଛନ୍ତି। ଫ୍ରାନ୍ସ ଚ୍ୟାନେଲ ଦେଇ ଛୋଟ ବୋଟ୍ ଜରିଆରେ ବହୁ ସଂଖ୍ୟକ ଭାରତୀୟ ବେଆଇନ ଭାବେ ବ୍ରିଟେନ୍ରେ ପ୍ରବେଶ କରୁଥିବା କୁହାଯାଉଛି। ଗତବର୍ଷ ଏହି ଚ୍ୟାନେଲ ଜରିଆରେ ମୋଟ ୬୮୩ ଭାରତୀୟ ବ୍ରିଟେନ୍ ଯାଇଥିଲେ, ଯାହାଙ୍କ ମଧ୍ୟରୁ ଅଧିକାଂଶ ହେଉଛନ୍ତି ଯୁବକ। ଦେଶରୁ ବେଆଇନ ପ୍ରବାସୀଙ୍କୁ ବିତାଡିତ କରିବା ଲାଗି ଗତ ସପ୍ତାହରେ ବ୍ରିଟେନ୍ ପ୍ରଧାନମନ୍ତ୍ରୀ ଋଷି ସୁନକ ଏବଂ ସ୍ବରାଷ୍ଟ୍ର ସଚିବ ସୁଏଲା ବ୍ରାଭରମାନ୍ ହାଉସ୍ ଅଫ୍ କମନ୍ସରେ ବେଆଇନ ପ୍ରବାସୀ ବିଲ୍ ଉପସ୍ଥାପନ କରିଥିଲେ। ଛୋଟ ବୋଟ୍ ଜରିଆରେ ଦେଶରେ ବେଆଇନ ଢଙ୍ଗରେ ପ୍ରବେଶ କରୁଥିବା ପ୍ରବାସୀଙ୍କୁ ରୋକିବା ସହ ଏ ନେଇ ସେମାନଙ୍କୁ ସାହାଯ୍ୟ କରୁଥିବା ଚାଲାଣକାରୀ ଗୋଷ୍ଠୀକୁ ଧରିବା ମୁଖ୍ୟ ଉଦ୍ଦେଶ୍ୟ ବୋଲି କୁହାଯାଇଛି।
ବେଆଇନ ପ୍ରବାସୀଙ୍କୁ ବ୍ରିଟେନ୍ରେ ପ୍ରବେଶ କରାଇବା ଲାଗି ଏକ ଗ୍ୟାଙ୍ଗ୍ କାର୍ଯ୍ୟ କରୁଛି, ଯାହା ଜଣପିଛା ୩,୦୦୦ ପାଉଣ୍ଡ (ପାଖାପାଖି ୨,୯୫,୯୧୧ ଟଙ୍କା) ନେଇଥାଏ। ଏହି ଗ୍ୟାଙ୍ଗ୍ ଡଙ୍ଗା ସାହାଯ୍ୟରେ ପ୍ରବାସୀମାନଙ୍କୁ ଫ୍ରାନ୍ସରୁ ଇଂଲଣ୍ଡରେ ପହଞ୍ଚାଇଥାଏ। ଏହି ଛୋଟ ଡଙ୍ଗାରେ ଏକକାଳୀନ ୪୦ରୁ ୫୦ ଜଣଙ୍କୁ ନିଆଯାଏ। ଉକ୍ତ ଡଙ୍ଗାଗୁଡ଼ିକୁ ତୁର୍କୀରୁ କିଣାଯାଇଥାଏ। ତେବେ ଏହି ଛୋଟ ବୋଟ୍ରେ ଯାତ୍ରା ସମୟରେ ଅନେକ ପ୍ରବସୀ ଭାସିଯିବାର ଖବର ମଧ୍ୟ ପ୍ରକାଶ ପାଇଛି। ୨୦୧୮ ପର୍ଯ୍ୟନ୍ତ କୌଣସି ଭାରତୀୟ ଛୋଟ ଡଙ୍ଗା ଜରିଆରେ ବ୍ରିଟେନ୍ରେ ପ୍ରବେଶ କରି ନ ଥିଲେ। କିନ୍ତୁ ୨୦୨୦ରେ ପ୍ରଥମ ଥର ୬୪ ଜଣ ଭାରତୀୟ ଛୋଟ ବୋଟ୍ରେ ଆସି ବ୍ରିଟେନ୍ରେ ପହଞ୍ଚିଥିଲେ। ସେହିପରି ୨୦୨୧ରେ ୬୭ ଜଣ ଏବଂ ୨୦୨୨ରେ ସର୍ବାଧିକ ୬୮୩ ଜଣ ବେଆଇନ ଉପାୟ ଅବଲମ୍ବନ କରି ବ୍ରିଟେନ୍ ଆସିଥିବା ସରକାରଙ୍କ ପକ୍ଷରୁ କୁହାଯାଇଛି। ନିକଟରେ ଏକ ଜିବି ନ୍ୟୁଜ୍ ନାମକ ଟିଭି ଚାନେଲ୍ ପକ୍ଷରୁ ଏକ ଟିକ୍ଟକ୍ ଭିଡିଓ ଜାରି କରାଯାଇଥିଲା, ଯେଉଁଥିରେ କେତେଜଣ ଶିଖ୍ ସମ୍ପ୍ରଦାୟର ଲୋକ ପ୍ରବାସୀଙ୍କୁ ବୋଟ୍ରେ ବସାଇ ନେଉଥିବା ଦେଖିବାକୁ ମିଳିଥିଲା। ଉକ୍ତ ଭିଡିଓକୁ ପରବର୍ତ୍ତୀ ସମୟରେ ଶିଖ୍ ପ୍ରେସ୍ ଆସୋସିଏଶନ୍ ପକ୍ଷରୁ ନିନ୍ଦା କରାଯାଇଥିଲା। ଗତବର୍ଷ ମୋଟ ୪୫,୭୫୫ ଅନୁପ୍ରବେଶକାରୀ ବ୍ରିଟେନ୍ ଆସିଥିଲେ। ବିଶେଷ କରି ଆଲବାନିଆ, ଆଫଗାନିସ୍ତାନ, ଇରାନ୍, ଇରାକ୍ ଏବଂ ସିରିଆର ଅଧିକାଂଶ ନାଗରିକ ବେଆଇନ ଭାବେ ବ୍ରିଟେନ୍ରେ ପ୍ରବେଶ କରୁଥିବାବେଳେ ଭାରତ ଏହି ସୂଚୀରେ ୧୦ମ ସ୍ଥାନରେ ରହିଛି। ଏ ସଂକ୍ରାନ୍ତରେ ଗତ ଶୁକ୍ରବାର ପ୍ରଧାନମନ୍ତ୍ରୀ ସୁନକ ଫ୍ରାନ୍ସ ରାଷ୍ଟ୍ରପତି ଇମାନୁଏଲ୍ ମାକରଁଙ୍କ ସହ ଆଲୋଚନା କରିଛନ୍ତି। ୨୦୨୨ରେ ମୋଟ ୩,୨୪୮ ଜଣ ଭାରତୀୟଙ୍କୁ ବ୍ରିଟେନ୍ ସରକାରଙ୍କ ପକ୍ଷରୁ ଆଶ୍ରୟ ଦିଆଯାଇଛି।
