ପଟ୍ଟାମୁଣ୍ଡାଇ,୯ା୪(ସ୍ବ.ପ୍ର.): ଚଳିତ ଖରିଫ ଋତୁ ପାଇଁ ଧାନକିଣା ଅବଧି ମାର୍ଚ୍ଚ ୩୦ରେ ଶେଷ ହେଇଛି। କେନ୍ଦ୍ରାପଡ଼ା ଜିଲା ପଟ୍ଟାମୁଣ୍ଡାଇ ବ୍ଲକରେ ୧୪ଟି ମଣ୍ଡିରୁ ୫୮୮୩ ଜଣ ଚାଷୀ ପଞ୍ଜୀକୃତ ହୋଇଥିବା ବେଳେ ୧ ଲକ୍ଷ ୭୮ ହଜାର ୪୩୬ କୁଇଣ୍ଟାଲ ୩୨ କିଲୋ ଧାନ ସଂଗ୍ରହ କରାଯାଇଥିବା ଯୋଗାଣ ବିଭାଗ ଅଧିକାରୀ କହିଛନ୍ତି। ମାତ୍ର ୫୮୮୩ ଜଣ ଚାଷୀଙ୍କ ମଧ୍ୟରୁ ପ୍ରାୟ ୪୦ ଭାଗ ଚାଷୀ ଧାନ ଦେବାରୁ ବଞ୍ଚତ୍ତ ହୋଇଛନ୍ତି ବୋଲି ଚାଷୀମାନେ ଅଭିଯୋଗ କରିଛନ୍ତି। କେନ୍ଦ୍ର ସମବାୟ ବ୍ୟାଙ୍କ କର୍ମଚାରୀ, ମିଲର, ସମବାୟ ସମ୍ପାଦକଙ୍କ ସହ ସମବାୟ କର୍ମଚାରୀ ଓ ଛଦ୍ମ ଚାଷୀମାନଙ୍କ ଅସାଧୁ ମେଣ୍ଟରେ ପ୍ରକୃତ ଚାଷୀ ବଳି ପଡିଥିବା ନେଇ ଅଭିଯୋଗ ହୋଇଛି। ଧାନ ବିକିବା ପାଇଁ ବ୍ୟାକୁଳ ହେଉଥିବା ଚାଷୀଙ୍କ ସୁଯୋଗ ନେଇ ପ୍ରାଥମିକ କୃଷି ସମବାୟ ସମିତି(ପାକ୍ସ) ସମ୍ପାଦକମାନେ ମୂଲଚାଲ କରି ଇଚ୍ଛା ମୁତାବକ ଧାନ କାଟି ସେମାନଙ୍କୁ ଅଗ୍ରାଧିକାର ଦିଆଯିବ ବୋଲି କହିଥିଲେ। ମାତ୍ର ସେମାନଙ୍କ ଧାନ ୧୦୦ ଭାଗ ଜାଗାରେ ୩୦ ଭାଗ କିଣା ହୋଇଥିବାରୁ ଚାଷୀମାନଙ୍କ ମଧ୍ୟରେ ଅସନ୍ତୋଷ ସୃଷ୍ଟି ହୋଇଛି। ଏପରି କି ଅନେକ ଚାଷୀଙ୍କ ଧାନର ୪୦ରୁ ୫୦ ଭାଗ କିଣିବା ପାଇଁ ବାଧ୍ୟ କରାଯାଉଥିଲା। ଯେଉଁମାନେ ସ୍ବର ଉତ୍ତୋଳନ କରିଥିଲେ ସେମାନଙ୍କ ଧାନ ଆଜି ପର୍ଯ୍ୟନ୍ତ ଘରେ ପଡ଼ି ରହିଛି। ଆଉ କେହି କେହି ବେପାରୀଙ୍କୁ ଦେଇ ଦେଲେଣି ବୋଲି ନବନିର୍ମାଣ କୃଷକ ସଙ୍ଗଠନ ପକ୍ଷରୁ ଏଭଳି ସଙ୍ଗିନ ଅଭିଯୋଗ କରାଯାଇଛି।
ସଙ୍ଗଠନ ନେତା ବିଜୟ ଦାସ କହିଛନ୍ତି, ଚଳିତବର୍ଷ ଧାନ ଭଲ ହୋଇଥିଲା। ତେଣୁ ଚାଷୀମାନଙ୍କ ଧାନ ବିକ୍ରି ପାଇଁ ନାମ ପଞ୍ଜୀକରଣ କରାଇ ଥିଲେ। ଏହି ମୁତାବକ ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ବିଭାଗ ପକ୍ଷରୁ ଟୋକନ ଦିଆଯାଇଥିଲା। ପଟ୍ଟାମୁଣ୍ଡାଇ ଅଞ୍ଚଳରେ ୧୪ଟି ସରକାରୀ ମଣ୍ଡିରେ ଧାନ କିଣା ହୋଇଥିଲା। ସେଥି ମଧ୍ୟରୁ ବଡପଡା, ଖଡିଅଣ୍ଟା, ଶ୍ୟାମସୁନ୍ଦରପୁର, ସଂସାରଫଳ, କଷଣଅଣ୍ଟା ଓ ବଡମୂଳବସନ୍ତ ସମବାୟ ସମିତିରେ ପ୍ରକୃତ ଚାଷୀଙ୍କ ଟୋକନ କାଟି ଦିଆଯାଇଥିବା ନେଇ ଅଭିଯୋଗ ହୋଇଆସୁଥିଲା। ମାତ୍ର ସମ୍ପାଦକ ସେ ଜମିକୁ ଅନ୍ୟ ଛଦ୍ମ ଚାଷୀଙ୍କ ନାମରେ କରାଇ ନିଜେ ଅନ୍ୟ ଅଞ୍ଚଳରୁ ଧାନ ଆଣି ବିକ୍ରି କରାଇଛନ୍ତି। ସମ୍ପାଦକଙ୍କ କଥାରେ ପରିଚାଳିତ ଛଦ୍ମ ଚାଷୀମାନେ ତାଙ୍କ ନାମରେ ଧାନ ଦେବା ଓ ତାଙ୍କ ଆଖି ସ୍କାନ କରି ସମ୍ପାଦକ ଓ ଛଦ୍ମ ଚାଷୀମାନେ ପଇସା ଉଠାଇ ନେଇଥିବା ନେଇ ଅଭିଯୋଗ ହେଉଛି। ଧାନକିଣାର ସୁପରିଚାଳନା ଲାଗି ଯେଉଁ ସ୍କ୍ବାଡ୍ ଗଠନ ହୋଇଛି ତାହା କେବଳ ଔପଚାରିକତା ପାଇଁ ବୋଲିି ସେ ଅଭିଯୋଗ କରିଛନ୍ତି। ଫଳରେ ଚାଷୀଙ୍କ ଉପରେ ଅତ୍ୟାଚାର ଜାରି ରହିଛି। ଏହାର ଏକ ଉଦାହରଣ ବଡପଡ଼ା ସମବାୟ ସମିତିରେ ଦେଖିବାକୁ ମିଳିଛି। ଏଠାରେ ୫୭୩ ଜଣ ଚାଷୀ ଧାନ ଦେବା ପାଇଁ ନାମ ପଞ୍ଜୀକୃତ କରିଥିଲେ। ସେମାନଙ୍କ ମଧ୍ୟରୁ ୩୦୮ଜଣ ଚାଷୀ ଧାନ ଦେଇଥିବା ବେଳେ ୨୬୫ ଜଣ ଚାଷୀ ଧାନ ଦେଇ ନ ପାରି ବାହାରେ କମ୍ ଦାମରେ ବିକ୍ରି କରିଛନ୍ତି ବୋଲି ବଡ଼ପଡ଼ାର ଚାଷୀ ଦେବାଶିଷ ମଳିକ, ଦିଲୀପ ମଳିକ, ପ୍ରଶାନ୍ତ ମଳିକ, ସୁଶାନ୍ତ ମଳିକ, ବାବାଜୀ ନାୟକ, ପ୍ରଦୀପ ଦାଶଙ୍କ ସମେତ ପ୍ରାୟ ୬୦ ଚାଷୀ ଅଭିଯୋଗ କରିଛନ୍ତି। ସେହିପରି ଖଡିଅଣ୍ଟା ସମବାୟ ସମିତି ଅଧୀନ ଚାଷୀ ରମେଶ ସ୍ବାଇଁ, ପାରେଶ୍ୱର ନାୟକ, ସଂସାରଫଳର ସୁଶାନ୍ତ ସାମନ୍ତରାୟ, ବସନ୍ତ ବେହେରା, ଶ୍ୟାମସୁନ୍ଦରପୁରର କଳ୍ପତରୁ ମଳିକ, ଗୌରାଙ୍ଗ ମଲିକ, କଷଣଅଣ୍ଟାରୁ ରବୀନ୍ଦ୍ର ଭଟ୍ଟ, ମୁରଲୀ ମଳିକ, ପ୍ରଶାନ୍ତ ମହାନ୍ତି, ଅଶୋକ ଦାସ, ବିକାଶ ମଲିକ ପ୍ରମୁଖଙ୍କ ଧାନ କିଣାଯାଇ ନ ଥିବା ଅଭିଯୋଗ କରିଛନ୍ତି। ସେମାନେ ଏହାର ପ୍ରତିବାଦରେ ରାଜ ରାସ୍ତାରେ ଧାନ ବସ୍ତା ରଖି ଆନ୍ଦୋଳନ କରିବୁ ବୋଲି କହିଛନ୍ତି। ଏ ସମ୍ପର୍କରେ ବଡ଼ପଡ଼ା ସମବାୟ ସମିତି ସଭାପତି ଧନୁଞ୍ଜୟ ସ୍ବାଇଁଙ୍କୁ ଯୋଗାଯୋଗ କରିବାରୁ ଆମେ ଯୋଗାଣ ବିଭାଗ ପାଖରେ ୫୫ ହଜାର କୁଇଣ୍ଟାଲ ରିକ୍ୱାରମେଣ୍ଟ ରଖିଥିଲୁ। ଆମକୁ ୧୩ ହଜାର କୁଇଣ୍ଟାଲ ଧାନ ଦେବାକୁ କୁହାଗଲା। ସେଥିଲାଗି ଏପରି ହୋଇଛି ବୋଲି ସେ କହିଥିଲେ। ଏହା ଉପରେ ଜିଲା ଯୋଗାଣ ଅଧିକାରୀ ପ୍ରଶାନ୍ତ ଗନ୍ତାୟତଙ୍କୁ ପଚାରିବାରୁ ଏପରି କରିଥିବା ପାକ୍ସ ସମ୍ପାଦକମାନଙ୍କ ଉପରେ ଦୃଢ କାର୍ଯ୍ୟାନୁଷ୍ଠାନ ନିଆଯିବ ବୋଲି ସେ କହିଛନ୍ତି।
