ବନ୍ତ,୧୦।୫(ଡି.ଏନ.ଏ.) କାର୍ଯ୍ୟାନୁଷ୍ଠାନରେ ବିଳମ୍ବ ହେବା ନେଇ ଭଦ୍ରକ ଜିଲା ବନ୍ତ ଗୋଷ୍ଠୀ ସମ୍ବଳ ଶିକ୍ଷୟିତ୍ରୀ ଟୁନାବାଳା ଦାଶ ସୋମବାର ବିଇଓ ଅଫିସ ଆଗରେ ଧାରଣାରେ ବସିଥିଲେ। ସକାଳ ୮ରୁ ଅପରାହ୍ନ ଗୋଟାଏ ପର୍ଯ୍ୟନ୍ତ ସେ ଧାରଣାରେ ବସିଥିବା ବେଳେ କୌଣସି ଅଧିକାରୀ ଧାରଣାସ୍ଥଳକୁ ଆସି ନ ଥିବା ଜଣାଯାଇଛି। ସମ୍ବଳ ଶିକ୍ଷୟିତ୍ରୀ ଦାଶଙ୍କ କହିବା ଅନୁଯାୟୀ, ସେ ଗତବର୍ଷ ଦିବ୍ୟାଙ୍ଗ ଛାତ୍ରୀଛାତ୍ରଙ୍କ ଅଭିଭାବକମାନଙ୍କୁ ନେଇ ପୃଥକ୍ ଭାବେ ୫ଟି କାର୍ଯ୍ୟକ୍ରମ କରିଥିଲେ। ଏହାର ବିଲ୍ କରାଇବାକୁ ବିଇଓ ଲାଞ୍ଚ ମାଗିଥିବା ସେ ଶିକ୍ଷାଧିକାରୀଙ୍କ ନିକଟରେ ଅଭିଯୋଗ କରିବା ପରେ ଆପୋଷ ସମାଧାନ ହୋଇଥିଲା। ପରେ ସମ୍ବଳ ଶିକ୍ଷୟିତ୍ରୀ କର୍ତ୍ତବ୍ୟରେ ଅନିୟମିତତା କରିଥିବା ନେଇ ବିଇଓ ତାଙ୍କୁ କାରଣ ଦର୍ଶାଅ ନୋଟିସ ପଠାଇଥିଲେ। ଏହି ନୋଟିସ ଭିତ୍ତିହୀନ ଏବଂ ଉଦ୍ଦେଶ୍ୟମୂଳକ ବୋଲି ସେ ଗତ ମାର୍ଚ୍ଚ ୨୨ରେ ଜିଲାପାଳଙ୍କଠାରେ ଅଭିଯୋଗ କରିଥିଲେ। ୭ ଦିନ ମଧ୍ୟରେ ତଦନ୍ତ କରି ରିପୋର୍ଟ ଦେବାକୁ ଜିଲାପାଳ ଜିଲା ଶିକ୍ଷାଧିକାରୀଙ୍କୁ ନିର୍ଦ୍ଦେଶ ଦେଇଥିଲେ। ମାତ୍ର ତଦନ୍ତରେ ବିଳମ୍ବ ହେବାରୁ ସେ ଏପ୍ରିଲ ୧୬ରେ ପୁଣି ଜିଲା ପ୍ରଶାସନର ଦୃଷ୍ଟି ଆକର୍ଷଣ କରିଥିଲେ। ଶେଷରେ ଚଳିତ ମାସ ୨ ତାରିଖରେ ବିଇଓ ଅଫିସ ଆଗରେ ଧାରଣାରେ ବସିବା ନେଇ ସେ ଜିଲା ଓ ବ୍ଲକ ପ୍ରଶାସନକୁ ଅବଗତ କରାଇଥିଲେ। ଏ ସମ୍ପର୍କରେ ବ୍ଲକ ଶିକ୍ଷାଧିକାରୀ ଅଧିର କୁମାର ତରେଇ କହିଛନ୍ତି, ତାଙ୍କ ଅଭିଯୋଗ ଉଚ୍ଚସ୍ତରକୁ ଯାଇଥିବା ବେଳେ ଜିଲାପାଳଙ୍କ ନିର୍ଦ୍ଦେଶରେ ତଦନ୍ତ ସରିଛି। ତଦନ୍ତ ରିପୋର୍ଟ ଅନୁସାରେ ଜିଲା ପ୍ରଶାସନ କାର୍ଯ୍ୟାନୁଷ୍ଠାନ ଗ୍ରହଣ କରିବ।
