କଟକ ଅଫିସ,୩।୮: ପ୍ରଥମ ପର୍ଯ୍ୟାୟ ଲକ୍ଡାଉନ ପରଠୁ ହାଇକୋର୍ଟରେ ଇ-ଫାଇଲିଂ ବ୍ୟବସ୍ଥା ସହ ଅଫ୍ଲାଇନ୍ରେ ମାମଲା ଦାଖଲ ବନ୍ଦ ରହିଛି। ଅନ୍ଲକ୍ ୩ରେ କେତେକ କଟକଣା କୋହଳ ହେବା ପରେ ହାଇକୋର୍ଟରେ ମାମଲା ଦାଖଲ ପ୍ରକ୍ରିୟାରେ ସାମାନ୍ୟ ପରିବର୍ତ୍ତନ କରାଯାଇଛି। ଏଥର ଅଫ୍ଲାଇନ୍ରେ ମାମଲା ଗ୍ରହଣ କରାଯିବ। କୋର୍ଟ ପରିସରରେ ଏକ ଡ୍ରପ୍ବକ୍ସ ରହିବ। ପୂର୍ବାହ୍ନ ୧୦ରୁ ଅପରାହ୍ନ ଗୋଟାଏ ପର୍ଯ୍ୟନ୍ତ ଡ୍ରପ୍ବକ୍ସରେ ଆବେଦନ ଦାଖଲ କରିହେବ। ତେବେ ଉକ୍ତ ମାମଲା କେତେ ଜରୁରୀ ଓ ତାହାର ଶୁଣାଣି କାହିଁକି ଆବଶ୍ୟକ, ସେନେଇ ମେମୋ ଦାଖଲ କରିବାକୁ ପଡ଼ିବ। ରବିବାର ହାଇକୋର୍ଟର ଫୁଲ୍କୋର୍ଟରେ ଇ-ଫାଇଲିଂ ଓ ଇ-ମେଲ୍ ସହ ଡ୍ରପବକ୍ସରେ ଆବେଦନ ଗ୍ରହଣକୁ ମଞ୍ଜୁର କରାଯାଇଛି। ଅଗଷ୍ଟ ୨୧ ଯାଏ କୋର୍ଟ କାର୍ଯ୍ୟ ସୀମିତ ରଖିବାକୁ ବୈଠକରେ ନିଷ୍ପତ୍ତି ହୋଇଛି। ଏହି ସମୟରେ ଅତି ଜରୁରୀ ମାମଲାର ଶୁଣାଣି ହେବ। ମାମଲା କେତେ ଜରୁରୀ, ତାହା ଡେପୁଟି ରେଜିଷ୍ଟ୍ରାର (ଜୁଡିସିଆଲ)ଙ୍କୁ ଅବଗତ କରିବାକୁ ହେବ।
ଅନ୍ୟପକ୍ଷରେ ହାଇକୋର୍ଟ ପକ୍ଷରୁ ଜାରି ବିଜ୍ଞପ୍ତିରେ ଅନ୍ଲାଇନ୍ ବ୍ୟବସ୍ଥାକୁ ଅଧିକ ଗୁରୁତ୍ୱ ଦିଆଯାଇଛି। ଇ-ମେଲ୍ ଓ ଇ-ଫାଇଲିଂରେ ମାମଲା ଦାଖଲକୁ ଅଗ୍ରାଧିକାର ଦିଆଯିବ। କୌଣସି ସମସ୍ୟା ହେଲେ ସଦ୍ୟ ଆରମ୍ଭ ହୋଇଥିବା ଇ-ଫାଇଲିଂ ପୋର୍ଟାଲରେ ଥିବା ଭିଡିଓ ଟ୍ୟୁଟୋରିଆଲ ଦେଖିବାକୁ ପରାମର୍ଶ ଦିଆଯାଇଛି। ଏଥିପାଇଁ ୪ଜଣ ଅଧିକାରୀଙ୍କୁ ଦାୟିତ୍ୱ ଦିଆଯାଇଛି। ସୋମବାର ଶୁଣାଣି ହେବାକୁ ଥିବା ମାମଲାଗୁଡ଼ିକର କଜ୍ ଲିଷ୍ଟ୍ ରବିବାର ପ୍ରକାଶ ପାଇଛି। ୩ଟି ଡିଭିଜନ୍ ବେଞ୍ଚ ଓ ୪ଟି ସିଙ୍ଗଲ୍ ବେଞ୍ଚରେ ମାମଲାର ଶୁଣାଣି ହେବ। ଡିଭିଜନ୍ ବେଞ୍ଚରେ ମୁଖ୍ୟ ବିଚାରପତି ଜଷ୍ଟିସ୍ ମହମ୍ମଦ ରଫିକ୍ ଓ ଜଷ୍ଟିସ୍ ସାବିତ୍ରୀ ରଥ, ମୁଖ୍ୟ ବିଚାରପତି ଜଷ୍ଟିସ୍ ମହମ୍ମଦ ରଫିକ୍ ଓ ଜଷ୍ଟିସ୍ କୃଷ୍ଣରାମ ମହାପାତ୍ର, ଜଷ୍ଟିସ୍ ସଞ୍ଜୟ ମିଶ୍ର ଓ ଜଷ୍ଟିସ୍ ସାବିତ୍ରୀ ରଥ ଶୁଣାଣି କରିବେ। ସେହିଭଳି ସିଙ୍ଗଲ୍ ବେଞ୍ଚରେ ଜଷ୍ଟିସ୍ ବିଦ୍ୟୁତ୍ ରଞ୍ଜନ ଷଡ଼ଙ୍ଗୀ, ଜଷ୍ଟିସ୍ ଦେବବ୍ରତ ଦାସ, ଜଷ୍ଟିସ୍ ସଙ୍ଗ୍ମ ସାହୁ ଓ ଜଷ୍ଟିସ୍ ସଞ୍ଜୀବ ପାଣିଗ୍ରାହୀ ଶୁଣାଣି କରିବେ।
