କଟକ ଅଫିସ,୨୯ା୩:ଖାନ୍ନଗରଠାରେ କାଠଯୋଡ଼ି ନଦୀରେ ମିଶୁଥିବା ପ୍ରଦୂଷିତ ଜଳକୁ ବନ୍ଦ କରିବାକୁ ହାଇକୋର୍ଟ ସୋମବାର କଟକ ମହାନଗର ନିଗମ(ସିଏମ୍ସି)କୁ ନିର୍ଦ୍ଦେଶ ଦେଇଛନ୍ତି। ହାଇକୋର୍ଟ ମୁଖ୍ୟ ବିଚାରପତି ଏସ୍. ମୁରଲୀଧର ଓ ବିଚାରପତି ଆର୍.କେ. ପଟ୍ଟନାୟକଙ୍କୁ ନେଇ ଗଠିତ ଖଣ୍ଡପୀଠ ଉପରୋକ୍ତ ନିର୍ଦ୍ଦେଶ ଦେଇଛନ୍ତି। ସେହିପରି ରାଜ୍ୟର କେତେ ନଦୀରେ ଏହିପରି ପ୍ରଦୂଷିତ ଜଳ ମିଶୁଛି, ସେସମ୍ପର୍କରେ ତଥ୍ୟ ଦେବାକୁ ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡକୁ ନିର୍ଦ୍ଦେଶ ଦେଇଛନ୍ତି ହାଇକୋର୍ଟ। କାଠଯୋଡ଼ି ନଦୀରେ ମିଶୁଥିବା ଏହି ପ୍ରଦୂଷିତ ଜଳକୁ ସିଏମ୍ସି ମତ୍ତଗଜପୁର ସ୍ବେରେଜ ଟ୍ରିଟମେଣ୍ଟ ପ୍ଲାଣ୍ଟକୁ ଛାଡ଼ିବା ପାଇଁ ହାଇକୋର୍ଟ ତାଙ୍କ ନିର୍ଦ୍ଦେଶରେ ସ୍ପଷ୍ଟ କରିଛନ୍ତି ା ତେବେ ଜାଇକା ପ୍ରକଳ୍ପ କାର୍ଯ୍ୟ ଚାଲିଥିବାରୁ ଏଭଳି କରିବାକୁ ପଡୁଛି ବୋଲି ସିଏମ୍ସି ପକ୍ଷରୁ କୁହାଯାଇଥିଲା ା ଏହାର ସ୍ଥାୟୀ ସମାଧାନ ପାଇଁ ସିଏମ୍ସି କି ପଦକ୍ଷେପ ନେଇଛି ସେସମ୍ପର୍କରେ ସତ୍ୟପାଠ ଜରିଆରେ ପରବର୍ତ୍ତୀ ତାରିଖରେ ହାଇକୋର୍ଟଙ୍କୁ ଅବଗତ କରାଇବା ପାଇଁ ହାଇକୋର୍ଟ ନିର୍ଦ୍ଦେଶ ଦେଇଛନ୍ତି। ଆସନ୍ତା ସୋମବାର ମାମଲାର ପରବର୍ତ୍ତୀ ଶୁଣାଣି ହେବ।
ମାମଲାରୁ ପ୍ରକାଶ ଯେ, କଟକ ଖାନ୍ନଗର ପୂଜା କମିଟି ଖାନନଗରଠାରେ ମିଶୁଥିବା ପ୍ରଦୂଷିତ ଜଳକୁ ବନ୍ଦ କରିବା ନେଇ ୨୦୧୬ ମସିହାରେ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ ା ପରେ କୋର୍ଟଙ୍କ ନିର୍ଦ୍ଦେଶ କ୍ରମେ ଖାନନଗର ପୂଜା କମିଟି ପକ୍ଷରୁ କାଠଯୋଡି ଠାରେ ମିଶୁଥିବା ପ୍ରଦୂଷିତ ଜଳର ଫଟୋ ଓ ଭିଡିଓ କୋର୍ଟରେ ଦାଖଲ କରିଥିଲେ। ସେହିପରି ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ ପକ୍ଷରୁ କାଠଯୋଡ଼ି ନଦୀରୁ ସଂଗ୍ରହ କରାଯାଇଥିବା ଜଳର ପରୀକ୍ଷଣ ରିପୋର୍ଟ ହାଇକୋର୍ଟରେ ଦାଖଲ କରାଯାଇଥିଲା।
