ରୂପ୍ସା, ୨୧।୫-ରବିଧାନ ଅମଳ ସରିଗଲାଣି। ଏବେ ବିକ୍ରୀ ନେଇ ଚାଷୀ ଚିନ୍ତାରେ ପଡିଛି। ଏଯାଏ ଟୋକନ ମିଳିନି। ରବିଧାନରେ ବିହନ, ସାର, ଔଷଧ ଆଦି ପର୍ଯ୍ୟାପ୍ତ ଖର୍ଚ୍ଚ ପରେ ଚାଷୀ ସରକାରୀ ମୂଲ୍ୟରେ ଧାନ ବିକ୍ରି କରି ନ ପାରି ମୁଣ୍ଡରେ ହାତ ଦେଇ ବସିଛି। ଅମଳ ସାରି ଦି’ ପଇସା ଲାଭ ଆଶାରେ କେତେଜଣ ଚାଷୀ ଧାନବସ୍ତା ସବୁକୁ ଘରେ ରଖିଛନ୍ତି। ଆଉ କେତେକ ଚାଷୀ ଧାରକରଜ ଶୁଝିବାକୁ ବେପାରୀଙ୍କୁ କୁଇଣ୍ଟାଲ ପ୍ରତି ୧ହଜାର ଟଙ୍କା ଦରରେ ଧାନ ବିକି ଅଭାବୀ ବିକ୍ରୀର ଶିକାର ହେଉଛନ୍ତି।
ବାଲେଶ୍ୱର ଜିଲାରେ ବସ୍ତା ବ୍ଲକରେ ପ୍ରାୟ ସମସ୍ତ ପରିବାର କୃଷି କାର୍ଯ୍ୟ କରି ଜୀବିକା ନିର୍ବାହ କରିଥାନ୍ତି। କୃଷି ଅଧିକାରୀଙ୍କ କାର୍ଯ୍ୟାଳୟରୁ ମିଳିଥିବା ସୂଚନା ଅନୁଯାୟୀ ବ୍ଲକ ଅନ୍ତର୍ଗତ ୩୧ପଞ୍ଚାୟତରେ ୧୯ହଜାର ୮ଶହ ହେକ୍ଟର ଚାଷ ଜମି ରହିଛି। ଏଥିମଧ୍ୟରୁ ୧୪ହଜାର ୬ଶହ ହେକ୍ଟର ରବିଚାଷ ଜମି ଅନ୍ତର୍ଭୁକ୍ତ। ରବିଋତୁରେ ୧୦ହଜାର ୨ଶହ ହେକ୍ଟର ଜଳସେଚିତ ଜମି ରହିଥିବା ବେଳେ ଅବଶିଷ୍ଟ ଅଣଜଳସେଚିତ ଅଟେ। ଚଳିତବର୍ଷ ୬ହଜାର ୧ଶହ ହେକ୍ଟର ଜମିରେ ରବି ଧାନ ଚାଷ ହୋଇଥିବା ବେଳେ ୭ହଜାର ୯ଶହ ହେକ୍ଟର ଜମିରେ ଡାଲି ଓ ତୈଳବୀଜ ଜାତୀୟ ଫସଲ ହୋଇଥିଲା। କିନ୍ତୁ ରବିଧାନ ଅମଳ ଆରମ୍ଭରୁ ସରକାରୀ ଧାନମଣ୍ଡି ଖୋଲି ନ ଥିବାରୁ ଚାଷୀ ନିଜ ଫସଲର ଉଚିତ୍ ମୂଲ୍ୟ ପାଇବାରେ ବଞ୍ଚତ୍ତ ହୋଇଛନ୍ତି। ଏଯାବତ୍ ବ୍ଲକ ଅନ୍ତର୍ଗତ ସମସ୍ତ ମଣ୍ଡିରେ ଧାନକିଣା ଆରମ୍ଭ ହୋଇନାହଁି। ଧାନବିକ୍ରି ପାଇଁ ସେବା ସମବାୟ ସମିତିରେ ପଞ୍ଜିକରଣ କରିଥିବା ୮୦ଶତକଡ଼ା ଚାଷୀଙ୍କୁ ମୋବାଇଲରେ ମେସେଜ ମାଧ୍ୟମରେ ଟୋକନ ମଧ୍ୟ ଆସିନାହଁି।
ଗଡ଼ପଦା ପଞ୍ଚାୟତ ଚାଷୀ ଜୟନ୍ତ ଦେ କହନ୍ତି, ଏବର୍ଷ ପ୍ରତିକୂଳ ପାଗରେ ରବିଧାନ ଚାଷ କରାଯାଇଥିଲା। ଅମଳ ବେଳେ କାଳବୈଶାଖୀ ଝଡ଼ବର୍ଷା ଯୋଗୁ ଖର୍ଚ୍ଚ ଦ୍ୱିଗୁଣା ବଢ଼ିଗଲା। ସରକାର ମଣ୍ଡିରେ ଧାନ କିଣା ଆରମ୍ଭ ନ କରିବାରୁ ବେପାରୀଙ୍କୁ ୧କୁଇଣ୍ଟାଲ ପ୍ରତି ହଜାରେ ଟଙ୍କା ଦରରେ ଧାନ ବିକ୍ରି କରିବାକୁ ବାଧ୍ୟ ହେଲୁ। ଯାହାକି ଚାଷରେ ଖର୍ଚ୍ଚ ହୋଇଥିବା ଅର୍ଥ ଭରଣା ହୋଇପାରିଲା ନାହଁି।
ରାଉତପଡ଼ା ପଞ୍ଚାୟତର ଚାଷୀ ମହେନ୍ଦ୍ର ଗିରି କହନ୍ତି, ଅମଳ ଧାନକୁ ମଣ୍ଡିରେ ବିକ୍ରି ପାଇଁ ପ୍ରସ୍ତୁତ କରିରଖିଛୁ। ଏଯାବତ୍ ଟୋକନ ଆସିନି। ସରକାରୀ ଦର ୧୮୬୮ ଟଙ୍କା ଥିବାବେଳେ ବେପାରୀଙ୍କୁ ୧ହଜାର ଟଙ୍କାରେ ବିକ୍ରି କଲେ ଚାଷ ଖର୍ଚ୍ଚ ବି ମିଳିବ ନାହଁି।
ଏ ସମ୍ପର୍କରେ ବସ୍ତା ବ୍ଲକ ଯୋଗାଣ ନୀରିକ୍ଷକ ମଧୁସ୍ମିତା ସେନାପତି କହିଛନ୍ତି, ବ୍ଲକ ଅଧୀନ ୧୨ଟି ମଣ୍ଡିରେ ଧାନ କ୍ରୟ ପାଁଇ ନିର୍ଦ୍ଦେଶ ମିଳିଛି। ମାତ୍ର ସମସ୍ତ ଚାଷୀଙ୍କୁ ଟୋକନ ମିଳି ନାହଁି। ଖୁବ୍ଶୀଘ୍ର ସମସ୍ୟାର ସମାଧାନ ହେବ।
