ଚେନ୍ନାଇ, ୧୩।୨: ତାମିଲନାଡ଼ୁର ରାଜ୍ୟପାଳ ଆର. ଏନ. ରବି ସୋମବାର ବିଧାନସଭା ଅଧିବେଶନ ପ୍ରାରମ୍ଭରେ ନିଜ ଅଭିଭାଷଣ ରଖିବାକୁ ମନାକରି ଗୃହ ଛାଡ଼ି ଚାଲି ଆସିବାରୁ ବିବାଦ ଦେଖାଯାଇଛି। ତାମିଲନାଡ଼ୁର ଡିଏମକେ ସରକାର ପକ୍ଷରୁ ପ୍ରସ୍ତୁତ ହୋଇଥିବା ଏହି ଅଭିଭାଷଣରେ ଭ୍ରମାତ୍ମକ ତଥ୍ୟ ଥିବା ଅଭିଯୋଗ କରି ରାଜ୍ୟପାଳ ବିଧାନସଭା ଛାଡ଼ି ଚାଲିଯାଇଥିଲେ। ତେବେ ରାଜ୍ୟପାଳ ଯିବା ପରେ ତାଙ୍କ ବଦଳରେ ସମ୍ପୂର୍ଣ୍ଣ ଅଭିଭାଷଣକୁ ପଢ଼ିଥିଲେ ବାଚସ୍ପତି ଏମ. ଅପ୍ପାବୁ। ରାଜ୍ୟପାଳଙ୍କ କିଛି ପ୍ରତିକ୍ରିୟାକୁ ବିଧାନସଭାର ରେକର୍ଡରୁ ବାଦ ଦିଆଯାଇଥିବା ନେଇ ସେ ସୂଚନା ଦେଇଥିଲେ। ଅଭିଭାଷଣ ରଖୁଥିବା ସମୟରେ ବାଚସ୍ପତିଙ୍କ ଦ୍ୱାରା ରାଜ୍ୟପାଳଙ୍କୁ ନାଥୁରାମ ଗଡ୍ସେଙ୍କ ସମର୍ଥକ ଭାବେ କଟାକ୍ଷ କରାଯାଇଥିବାରୁ ବିଧାନସଭାର ଗରିମାକୁ ଦୃଷ୍ଟିରେ ରଖି ଅଧା ଅଭିଭାଷଣ ପଢ଼ି ରାଜ୍ୟପାଳ ଗୃହରୁ ଚାଲିଆସିଥିବା ରାଜଭବନ ତରଫରୁ କୁହାଯାଇଛି। ସେହିପରି ରାଜ୍ୟପାଳଙ୍କ ପାଇଁ ପ୍ରସ୍ତୁତ ହୋଇଥିବା ଅଭିଭାଷଣରେ ଅନେକ ଭୁଲ ତଥ୍ୟ ଥିବା ରାଜଭବନ ପକ୍ଷରୁ ସ୍ପଷ୍ଟୀକରଣ ରଖାଯାଇଛି। ତେବେ ରାଜ୍ୟ ସରକାରଙ୍କ ଦ୍ୱାରା ପ୍ରସ୍ତୁତ ହୋଇିଥିବା ତଥ୍ୟ ସମ୍ପୂର୍ଣ୍ଣ ଠିକ ହୋଇଥିବା କହିଛି ଡିଏମ୍କେ। ଲଗାତର ଭାବେ ବିଭିନ୍ନ କ୍ଷେତ୍ରରେ କେନ୍ଦ୍ର ପକ୍ଷରୁ ଅବହେଳା କରାଯାଉଥିବା ଦଳ ପକ୍ଷରୁ କୁହାଯାଇଛି। ସୂଚନାଯୋଗ୍ୟ, ତାମିଲନାଡ଼ୁରେ ଲଗାତର ଦ୍ୱିତୀୟ ବର୍ଷ ପାଇଁ ରାଜ୍ୟପାଳଙ୍କ ଅଭିଭାଷଣ ସମୟରେ ବିବାଦ ଦେଖାଦେଇଛି।
