ଗୋପ,୨୫।୧୦(ଡି.ଏନ୍.ଏ.): ଗୋପ ବ୍ଲକରେ ସରକାର ବିଭାଗର ଅଧିକାରୀ ଓ କର୍ମଚାରୀଙ୍କ ପାଇଁ ରହିଥିବା କ୍ୱାର୍ଟର୍ସଗୁଡ଼ିକରେ ଅଧିକାଂଶ ସମୟ କେହି ରହୁ ନ ଥିବା ଦେଖିବାକୁ ମିଳିଛି। ଫଳରେ ଦୀର୍ଘଦିନ ଧରି କ୍ୱାର୍ଟର୍ସ ସବୁ ଖାଲିପଡ଼ିଥିବାରୁ ଧୀରେ ଧୀରେ କୋଠାଗୁଡ଼ିକ ଭାଙ୍ଗିରୁଜି ଯିବା ସହ ଗଛ ଲତା ମାଡ଼ିଯାଇ ଖତ ଖାଇଗଲାଣି। ବ୍ଲକରେ ଥିବା ପ୍ରାୟ ୧୩ଟି ସରକାରୀ କ୍ୱାର୍ଟର୍ସ ଏବେ ଅନୁପଯୋଗୀ ହୋଇପଡ଼ିଛି। କିଛି ବର୍ଷ ଧରି ଏହି ବ୍ଲକ କଲୋନୀରେ ବିଡିଓଙ୍କ ଠାରୁ ଆରମ୍ଭ କରି ଯନ୍ତ୍ରୀ, କର୍ମଚାରୀ ରହୁଥିବା ବେଳେ ଏବେ ଏହି ସବୁ ସରକାରୀ କ୍ବାର୍ଟର୍ସ ଭୂତ କୋଠିରେ ପରିଣତ ହୋଇଛି। ବିଡିଓ, ଯନ୍ତ୍ରୀ ଓ ବ୍ଲକ କର୍ମଚାରୀମାନେ ଏବେ ବାହାର ଅଞ୍ଚଳରେ ରହୁଥିବା ଭଳି ଅଭିଯୋଗ ରହିଛି। ଫଳରେ ଲକ୍ଷାଧିକ ଟଙ୍କାରେ ନିର୍ମାଣାଧୀନ ଏହି ଗୃହ ସବୁ ଏବେ ପଶୁପକ୍ଷୀଙ୍କ ଆଡ୍ଡାସ୍ଥଳୀ ପାଲଟି ଥିବାବେଳେ ନିଶାଗ୍ରସ୍ତ ଯୁବକମାନେ ଆଡା ଜମାଇବା ମଧ୍ୟ ଦେଖିବାକୁ ମିଳୁଛି। ଏପରିକି ବ୍ଲକ କର୍ମଚାରୀମାନେ ବାହାରେ ରହୁଥିବା ନେଇ ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାଶଙ୍କ ନିକଟରେ ଅଭିଯୋଗ ହେବା ପରେ ମନ୍ତ୍ରୀ ସମସ୍ତ ବ୍ଲକ କର୍ମଚାରୀ ହେର୍ଡ କ୍ବାର୍ଟର୍ସରେ ରହିବା ଲାଗି ନିର୍ଦ୍ଦେଶ ଦେଇଥିଲେ। କିନ୍ତୁ ମନ୍ତ୍ରୀଙ୍କ ନିର୍ଦ୍ଦେଶ କିିଛିଦିନ ମାନିବା ପରେ ଏବେ ପୁଣି ସମାନାବସ୍ଥା ହୋଇଯାଇଛି। ଅପରପକ୍ଷେ ଗୋପ ବ୍ଲକର ସମସ୍ତ କର୍ମଚାରୀ ସରକାରୀ ତହବିଲରୁ ମାସିକ ଭଡ଼ା ବାବଦରେ ହଜାର ହଜାର ଟଙ୍କା ନେଉଥିବା ଭଳି ଅଭିଯୋଗ ରହିଛି। ଏଥିସହ ବ୍ଲକ କର୍ମଚାରୀମାନେ ବାହାରେ ରହୁଥିବାରୁ ଠିକ ସମୟରେ କାର୍ଯ୍ୟାଳୟକୁ ନ ଆସିବାରୁ ଲୋକେ ନାନା ଅସୁବିଧାର ସମ୍ମୁଖୀନ ହେଉଛନ୍ତି। ଏପରିକି ବ୍ଲକର ବିଭିନ୍ନ ବିଭାଗ ଅଧିକାରୀମାନେ ଅଧିକାଂଶ ସମୟ ଅନୁପସ୍ଥିତ ରହିବା ଯୋଗୁ ପ୍ରାୟ ସମୟ ବିଭାଗରେ ତାଲା ଝୁଲୁଥିବା ଦେଖିବାକୁ ମିଳୁଛି। ଏଥିପ୍ରତି ମନ୍ତ୍ରୀ ତଥା ସ୍ଥାନୀୟ ବିଧାୟକ ଓ ଜିଲାପାଳ ସମର୍ଥ ବର୍ମା ଦୃଷ୍ଟି ଦେବାକୁ ସାଧାରଣରେ ଦାବି କରାଯାଇଛି। ଏ ଅଭିଯୋଗ ନେଇ ବିଡିଓ ଦୀପ୍ତିରାଣୀ ଦାସ କହିଛନ୍ତି, ସମସ୍ତ କର୍ମଚାରୀ କ୍ୱାର୍ଟର୍ସରେ ରହିଥିବା, କିନ୍ତୁ ଅଧିକାଂଶ ଗୃହ ରହିବା ଅବସ୍ଥାରେ ନାହିଁ। ଗୃହଗୁଡ଼ିକ ଭାଙ୍ଗିରୁଜି ଯିିବା ସହ ଚାରିଆଡ଼େ ଗଛଲତା ମାଡ଼ିଗଲାଣି। ତେଣୁ ଏଠି ରହିବାକୁ କର୍ମଚାରୀମାନେ ପସନ୍ଦ କରୁନାହାନ୍ତି, ମରାମତି କରାଯିବା ପରେ କର୍ମଚାରୀଙ୍କୁ ରହିବା ପାଇଁ କୁହାଯିବ ବୋଲି କହିଥିଲେ।
