ଚଣ୍ଡିଗଡ଼,୧୩।୧: ସାଙ୍ଗୁରୁର ଜିଲାର ମଲେରକୋଟଲାରେ ଅବସ୍ଥିତ ମୁବାରିକ ମଞ୍ଜିଲ ପ୍ୟାଲେସର ଅଧିଗ୍ରହଣ, ସଂରକ୍ଷଣ ଏବଂ ଉପଯୋଗକୁ ପଞ୍ଜାବ କ୍ୟାବିନେଟ ଅନୁମୋଦନ କରିଛି। ରାଜପ୍ରାସାଦର ମାଲିକାଣୀ ୯୭ ବର୍ଷିୟା ବେଗମ ମୁନାୱାର୍-ଉଲ-ନିସାଙ୍କ ଶେଷ ଇଚ୍ଛା ଭାବରେ ସରକାରଙ୍କଠାରୁ ଅଧିଗ୍ରହଣ କରିବାକୁ ପ୍ରସ୍ତାବ ଦେଇଥିଲେ। ମୁବାରିକ ମଞ୍ଜିଲ ପ୍ୟାଲେସର ଅଧିଗ୍ରହଣ ପାଇଁ ବେଗମ ମୁନାୱାର୍-ଉଲ-ନିସାଙ୍କୁ ରାଜ୍ୟ ସରକାର ୩ କୋଟି ଟଙ୍କା ଦେବେ। ମୁବାରିକ ମଞ୍ଜିଲ ପ୍ୟାଲେସ ଏକମାତ୍ର ମାଲିକାଣୀ ହେଉଛନ୍ତି ବେଗମ ମୁନାୱାର୍-ଉଲ-ନିସା। ରାଜ୍ୟ କିମ୍ବା ପର୍ଯ୍ୟଟନ ଏବଂ ସଂସ୍କୃତି ବିଭାଗ ସମେତ ଯେକୌଣସି ବ୍ୟକ୍ତିଙ୍କୁ ଏହି ସମ୍ପତ୍ତି ଦେବାର ତାଙ୍କର ସମ୍ପୂର୍ଣ୍ଣ ଅଧିକାର ଅଛି ବୋଲି ସେ ସରକାରଙ୍କୁ ଏକ ପତ୍ର ଲେଖିଛନ୍ତି। ଏହାପରେ ପଞ୍ଜାବ କ୍ୟାବିନେଟ ବୈଠକରେ ପ୍ୟାଲେସର ଦାୟିତ୍ୱ ଗ୍ରହଣ କରିବାକୁ ନିଷ୍ପତ୍ତି ନିଆଯାଇଛି। ମୁଖ୍ୟମନ୍ତ୍ରୀ କ୍ୟାପଟେନ ଅମରିନ୍ଦର ସିଂ କହିଛନ୍ତି ଯେ, ଏହି ନିଷ୍ପତ୍ତି ରାଜ୍ୟର ସମୃଦ୍ଧ ଐତିହ୍ୟକୁ ବଞ୍ଚାଇ ରଖିବା ଏବଂ ଯୁବ ପିଢିକୁ ଆମର ଗୌରବମୟ ଅତୀତ ସହିତ ପୁନଃସଂଯୋଗ କରିବାରେ ସହାୟକ ହେବ। ଏହି ପ୍ରାସାଦଟି ବହୁ ମହଲା ବିଶିଷ୍ଟ ଐତିହ୍ୟ ସମ୍ପତ୍ତି, ଯାହାକି ୧୫୦ ବର୍ଷ ପୁରୁଣା। କୋଠାଟି ୩୨୪୦୦ ବର୍ଗଫୁଟ ଉପରେ ବ୍ୟାପିଛି।
