ନୂଆଦିଲ୍ଲୀ,୨୩।୬: ସୋସିଆଲ ମିଡିଆରେ ଇଥାନଲ ମିଶ୍ରିତ ପେଟ୍ରୋଲ ଅର୍ଥାତ E20 କୁ ନେଇ ଅନେକ ପ୍ରକାରର ଦାବି ଏବଂ ଭିଡିଓ ଭାଇରାଲ ହେବାରେ ଲାଗିଛି। ଏହି ବିବାଦକୁ ଦୃଷ୍ଟିରେ ରଖି କେନ୍ଦ୍ର ସରକାର ଏବେ ଜବାବ ରଖିଛନ୍ତି। ସରକାର କହିଛନ୍ତି ଯେ, ଇଥାନଲ ବ୍ଲେଣ୍ଡିଂ ପ୍ରୋଗ୍ରାମ (ଇଥାନଲ ମିଶ୍ରଣ ପ୍ରକ୍ରିୟା) ସମ୍ପୂର୍ଣ୍ଣ ବୈଜ୍ଞାନିକ ପଦ୍ଧତିରେ ପରୀକ୍ଷିତ ଏବଂ ସରକାର କ୍ରମାଗତ ଭାବେ ଏହାର ତଦାରଖ କରୁଛନ୍ତି।
ପେଟ୍ରୋଲିୟମ ଏବଂ ପ୍ରାକୃତିକ ଗ୍ୟାସ ମନ୍ତ୍ରଣାଳୟ କହିଛି ଯେ, ସୋସିଆଲ ମିଡିଆରେ କିଛି ଲୋକ ଜାଣିଶୁଣି ଭ୍ରମାତ୍ମକ ତଥ୍ୟ ପ୍ରଚାର କରୁଛନ୍ତି। ଅଧିକ ଭ୍ୟୁଜ ପାଇବା ଏବଂ ଲୋକଙ୍କ ମନରେ ଅଯଥା ଭୟ ସୃଷ୍ଟି କରିବା ପାଇଁ ପୁରୁଣା ଫଟୋ ଓ ଭିଡିଓକୁ ନୂଆ ବୋଲି ଦର୍ଶାଇ ସେୟାର କରାଯାଉଛି।
ଏହି କାର୍ଯ୍ୟକ୍ରମ ୨୦୦୩ ମସିହାରେ ଆରମ୍ଭ ହୋଇଥିଲା। ଏହାର ମୂଳ ଉଦ୍ଦେଶ୍ୟ ହେଉଛି ଅଶୋଧିତ ତୈଳ (କ୍ରୁଡ ଅଏଲ)ର ଆମଦାନୀ ହ୍ରାସ କରିବା, ଦେଶର ଶକ୍ତି ସୁରକ୍ଷାକୁ ମଜବୁତ କରିବା ଏବଂ ପରିବେଶକୁ ସ୍ୱଚ୍ଛ ରଖିବା। ଧୀରେ ଧୀରେ ଏହାକୁ ଆଗକୁ ବଢ଼ାଇ ୨୦୨୩ ମସିହାରୁ ପେଟ୍ରୋଲରେ ୨୦ ପ୍ରତିଶତ ଇଥାନଲ ମିଶ୍ରଣ ଅର୍ଥାତ E20 ଆରମ୍ଭ କରାଗଲା। ସରକାର କହିଛନ୍ତି ଯେ, E20 ପେଟ୍ରୋଲ ଆସିବା ପରଠାରୁ ଇଥାନଲ ଯୋଗୁଁ ଇଞ୍ଜିନ ଖରାପ ହେବା କିମ୍ୱା ଗାଡ଼ି ବନ୍ଦ ହୋଇଯିବା ଭଳି କୌଣସି ବଡ଼ ଅଭିଯୋଗ ସାମ୍ନାକୁ ଆସିନାହିଁ।
ଆଖୁ ରସ ସିଧାସଳଖ ପେଟ୍ରୋଲରେ ମିଶାଯାଉଥିବା ଭିଡିଓକୁ ସରକାର ଭୁଲ ବୋଲି ଦର୍ଶାଇଛନ୍ତି। ମନ୍ତ୍ରଣାଳୟ ଅନୁଯାୟୀ, ଇନ୍ଧନରେ ମିଶାଯାଉଥିବା ଇଥାନଲ ଏକ ର୍ନିଦ୍ଦିଷ୍ଟ ଶିଳ୍ପ ପ୍ରକ୍ରିୟା (ଇଣ୍ଡଷ୍ଟ୍ରିଆଲ ପ୍ରୋସେସ) ଦ୍ୱାରା ପ୍ରସ୍ତୁତ ହୋଇଥାଏ। ଏହା ଆଖୁ ରସ, ମାଣ୍ଡିଆ/ମୋଲାସେସ, ଖୁଦ (ଭଙ୍ଗା ଚାଉଳ) ଏବଂ ମକା ଭଳି ଜିନିଷରୁ ତିଆରି ହୁଏ, କିନ୍ତୁ ଫର୍ମେଣ୍ଟେସନ (କିଣ୍ୱନ) ଭଳି ପ୍ରକ୍ରିୟା ଦେଇ ଗତି କରିବା ପରେ ଏହାର ଗୁଣ ପ୍ରାକୃତିକ କଞ୍ଚାମାଲଠାରୁ ସମ୍ପୂର୍ଣ୍ଣ ଭିନ୍ନ ହୋଇଯାଏ।
ପେଟ୍ରୋଲ ଟ୍ୟାଙ୍କରେ ପିମ୍ପୁଡି ଲାଗିବା ଭାଇରାଲ ଭିଡିଓ ଉପରେ ମଧ୍ୟ ସ୍ପଷ୍ଟୀକରଣ ଆସିଛି। ଭାରତ ପେଟ୍ରୋଲିୟମ ସୂଚନା ଦେଇଛି ଯେ, ଇନ୍ଧନରେ ବ୍ୟବହୃତ ହେଉଥିବା ଇଥାନଲରୁ ଶର୍କରା (ସୁଗାର) ସମ୍ପୂର୍ଣ୍ଣ ଭାବେ ବାହାର କରିଦିଆଯାଏ ଏବଂ ଏଥିରେ ଏମିତି କିଛି ଉପାଦାନ ମିଶାଯାଏ ଯାହା ପୋକଜୋକ ବା କୀଟପତଙ୍ଗମାନଙ୍କୁ ଦୂରେଇ ରଖେ। ତେଣୁ E20 ଯୋଗୁଁ ପିମ୍ପୁ ଆସୁଥିବା ଦାବି ସମ୍ପୂର୍ଣ୍ଣ ମିଥ୍ୟା।
‘ଇଥାନଲ ପାଣି ଶୋଷିନିଏ’, ଏହି ଦାବି ଉପରେ ସରକାର କହିଛନ୍ତି ଯେ କୌଣସି ବି ଇନ୍ଧନରେ ପାଣି ମିଶିବା କ୍ଷତିକାରକ ଅଟେ। ଆଜିକାଲିର ଗାଡ଼ିଗୁଡ଼ିକରେ ପୂର୍ୱରୁ ହିଁ ଏଭଳି ଡିଜାଇନ ରହିଥାଏ, ଯାହା ଟ୍ୟାଙ୍କ ଭିତରକୁ ପାଣି ଯିବାକୁ ରୋକିଥାଏ। ଅନ୍ୟପଟେ, E20 ବ୍ୟବହାର କଲେ ଗାଡ଼ିର ବୀମା (ଇନସ୍ୟୁରାନ୍ସ) ରଦ୍ଦ ହୋଇଯିବ ବୋଲି କରାଯାଉଥିବା ଦାବିକୁ ମଧ୍ୟ ସମ୍ପୃକ୍ତ ବୀମା କମ୍ପାନୀଗୁଡ଼ିକ ଭୁଲ ବୋଲି କହିଛନ୍ତି।
ସରକାର ଜଣାଇଛନ୍ତି ଯେ, ଆମେରିକା, ବ୍ରାଜିଲ ଏବଂ ଜାପାନ ଭଳି ଦେଶରେ ମଧ୍ୟ ଇଥାନଲ ବ୍ଲେଣ୍ଡିଂ କରାଯାଇଥାଏ। ବ୍ରାଜିଲରେ ତ ଦୀର୍ଘ ସମୟରୁ ଅଧିକ ପରିମାଣର ଇଥାନଲ ମିଶାଯାଉଛି ଏବଂ ସେଠାରେ E27 ଏକ ସାଧାରଣ ପେଟ୍ରୋଲ ଭାବେ ବ୍ୟବହାର ହେଉଛି।
