ବାରିପଦା ଅଫିସ,୨୭।୮: ମୟୂରଭଞ୍ଜ ଜିଲାରେ ରୋଗୀ ପରିବହନ ସେବା ସମ୍ପୂର୍ଣ୍ଣ ବିପର୍ଯ୍ୟସ୍ତ ହୋଇପଡ଼ିଛି। ଆବଶ୍ୟକତାଠାରୁ କମ ସଂଖ୍ୟକ ଆମ୍ବୁଲାନ୍ସ ରହିଥିବା ବେଳେ ଚାଳକ ଅଭାବରୁ ବହୁ ଗାଡ଼ି ଅଚଳ ହୋଇ ପଡ଼ିରହିଛି। ବର୍ଷ ବର୍ଷ ଧରି ଖରାବର୍ଷାରେ ପଡ଼ିରହି ଏହା ଖତ ଖାଉଥିବା ବେଳେ ବିଭାଗ ପକ୍ଷରୁ ନିଲାମ କରାଯାଉ ନାହିଁ। ଏପରିକି ଜରୁରୀକାଳୀନ ସେବା ଯୋଗାଉଥିବା ସଂସ୍ଥା ପକ୍ଷରୁ ଆବଶ୍ୟକ ପଦକ୍ଷେପ ଗ୍ରହଣ କରାଯାଉ ନ ଥିବାରୁ ରୋଗୀଙ୍କୁ ଖଟିଆରେ ବୋହି ଡାକ୍ତରଖାନା ନେବାକୁ ପଡୁଛି। ରାଜ୍ୟ ସରକାର ବିଜୁ ସ୍ବାସ୍ଥ୍ୟକାର୍ଡ ପ୍ରଚଳନ କରିବା ପରେ ମଧ୍ୟ ବଣପାହାଡ଼ ଘେରା ଅଞ୍ଚଳବାସୀ ଉତ୍ତମ ସେବା ପାଇବାରୁ ବଞ୍ଚତ୍ତ ହେଉଛନ୍ତି।
ବାରିପଦାଠାରେ ପିଆର୍ଏମ୍ ମେଡିକାଲ କଲେଜ ଓ ଡାକ୍ତରଖାନାରେ ଦିନକୁ ଦିନ ରୋଗୀଙ୍କ ସଂଖ୍ୟା ବଢ଼ିବାରେ ଲାଗିଛି। ଜିଲାର ୨୬ ବ୍ଲକରେ ଥିବା ୪୦୫ପଞ୍ଚାୟତର ୩୯୬୬ଟି ଗ୍ରାମରେ ସରକାରଙ୍କ ପକ୍ଷରୁ ଜରୁରୀ ସେବା ଯୋଗାଇ ଦିଆଯାଉଛି। ଜିଲାରେ ବର୍ତ୍ତମାନ ୧୩ ଆମ୍ବୁଲାନ୍ସ ଓ ୪୧ଟି ୧୦୮ଆମ୍ବୁଲାନ୍ସ କାର୍ଯ୍ୟ କରୁଛି। ଆମ୍ବୁଲାନ୍ସ ଚାହିଦା ବୃଦ୍ଧି ତୁଳନାରେ ସ୍ବାସ୍ଥ୍ୟବିଭାଗ ପକ୍ଷରୁ ଅଧିକ ଗାଡ଼ି ଦିଆ ନ ଯିବାରୁ ଲୋକେ ଘରୋଇ ଆମ୍ବୁଲାନ୍ସ ନେବାକୁ ବାଧ୍ୟ ହେଉଛନ୍ତି।
ଜିଲା ମୁଖ୍ୟ ଚିକିତ୍ସାଧିକାରୀଙ୍କ ଅଧୀନରେ ୧୩ଟି ଆମ୍ବୁଲାନ୍ସ ଚଳାଚଳ ଉପଯୋଗୀ ରହିଥିବା ବେଳେ ୧୦ରୁ ଊର୍ଦ୍ଧ୍ୱ ଖତ ଖାଉଛି। ଅଚଳ ଯାନବାହନ ନିଲାମ କରାଯାଉ ନାହିଁ। ଜିଲା ମୁଖ୍ୟ ଚିକିତ୍ସାଳୟରେ ସ୍ଥାନ ଅଭାବ ଯୋଗୁ ସିଡିଏମ୍ଓଙ୍କ କ୍ୱାର୍ଟର୍ସ ପରିସର ଡମ୍ପିଂ ୟାର୍ଡ଼ ପାଲଟିଛି। ସେଠାରେ ସରକାରୀ ଓ ବିଭିନ୍ନ ସୂତ୍ରରୁ ରୋଗୀ ପରିବହନ ସେବା ପାଇଁ ମିଳିଥିବା ଆମ୍ବୁଲାନ୍ସ ଗୁଡ଼ିକ ଅଚଳ ଅବସ୍ଥାରେ ପଡ଼ିରହିଛି। ସେହିପରି ଆମ୍ବୁଲାନ୍ସ ଚାଳକ ଅଭାବରୁ ଠିକ୍ ସମୟରେ ରୋଗୀଙ୍କ ନିକଟରେ ସେବା ପହଞ୍ଚତ୍ ପାରୁନାହିଁ। ୫୧ଟି ମଞ୍ଜୁର ପଦବୀ ସ୍ଥାନରେ ୨୨ଜଣ ଚାଳକ କାର୍ଯ୍ୟ କରୁଛନ୍ତି। ଜିଲାରେ ୧୩ଟି ଆମ୍ବୁଲାନ୍ସ, ୨ଟି ସ୍ବର୍ଗ ରଥ, ଗୋଟିଏ ମହାପ୍ରୟାଣ ଗାଡ଼ି ସମେତ ସିଡିଏମ୍ ଓ ଏବଂ ବିଭିନ୍ନ ବିଭାଗୀୟ ଅଧିକାରୀଙ୍କ ଗାଡ଼ି ମିଶି ୩୦ଟି ସରକାରୀ ଯାନ ରହିଛି। ଅଧିକାରୀଙ୍କ ବ୍ୟତୀତ ଆମ୍ବୁଲାନ୍ସ ଓ ଅନ୍ୟ ଗାଡ଼ିଗୁଡ଼ିକରେ ୩ ସିପ୍ଟ କାର୍ଯ୍ୟ କରିବା ପାଇଁ ଦୈନିକ ଜଣେ ଲେଖାଏ ଚାଳକ ଦରକାର ଥିବା ବେଳେ ୨୨ଜଣ ଓ ଏଜେନ୍ସି ଜରିଆରେ ନିଯୁକ୍ତ ୧୦ଜଣ ଚାଳକଙ୍କୁ ମିଶାଇ ମୋଟ ୩୨ଜଣ ଚାଳକ କାର୍ଯ୍ୟ ତୁଲାଉଛନ୍ତି। ଆବଶ୍ୟକତାକୁ ଦୃଷ୍ଟି ଦେଇ ସ୍ବାସ୍ଥ୍ୟ ବିଭାଗ ପକ୍ଷରୁ ଜିଲାକୁ ଅଧିକ ଆମ୍ବୁଲାନ୍ସ ପ୍ରଦାନ ଓ ଚାଳକ ପଦବୀ ପୂରଣ କରିବା ପାଇଁ ବିଭିନ୍ନ ସଙ୍ଗଠନ ପକ୍ଷରୁ ଦାବି ହେଉଛି। ଏ ସମ୍ପର୍କରେ ଜିଲା ମୁଖ୍ୟ ଚିକିତ୍ସାଧିକାରୀ ଡା.ରୂପଭାନୁ ଆଚାର୍ଯ୍ୟ କୁହନ୍ତି, ସମସ୍ୟା ସମ୍ପର୍କରେ ଅବଗତ ଅଛି। ଖୁବ୍ ଶୀଘ୍ର ଏହାର ସମାଧାନ କରାଯିବ ା
