ବାଲେଶ୍ୱର ଅଫିସ,୨୭।୨: ବାଲେଶ୍ୱର ସହର ହରିପୁର ଅଞ୍ଚଳର ଶରତ କୁମାର ନାୟକଙ୍କ ଘରୁ ଓ ତାଙ୍କ ବନ୍ଧୁବାନ୍ଧବଙ୍କ ଘରୁ ବାରମ୍ବାର ଚୋରି ହେଉଥିବା ନେଇ ସହଦେବଖୁଣ୍ଟା ଥାନାରେ ଅଭିଯୋଗ ହୋଇଥିଲା। ବର୍ଷାଧିକ କାଳ ଧରି ଏହି ଚୋରିରେ ସମ୍ପୃକ୍ତ ୩ଜଣଙ୍କୁ ଗିରଫ କରିବାରେ ପୋଲିସ ସଫଳ ହୋଇଥିବା ବେଳେ ଆଉ ୨ଜଣ ଫେରାର ହୋଇଯାଇଛନ୍ତି। ଗିରଫ ୩ଜଣ ହେଲେ ରେମୁଣା ଥାନା କୁରୁଣିଆପାଟଣା ଅଞ୍ଚଳର ୧୯ବର୍ଷର ଜଣେ ଯୁବକ, ସିଂଲା ଥାନା ଅଧୀନ ୨୯ ଓ ୪୨ବର୍ଷର ଦୁଇଜଣ ମହିଳା। ସେମାନଙ୍କ ନିକଟରୁ ୧୦୬.୩୯ ଗ୍ରାମ୍ ଓଜନର ସୁନାଗହଣା, ଗୋଟିଏ ବାଇକ୍ ସହିତ ନଗଦ ୨୦ହଜାର ଟଙ୍କା ଜବତ କରାଯାଇଥିବା ଆୟୋଜିତ ଏକ ଖବରଦାତା ସମ୍ମିଳନୀରେ ଜିଲା ଆରକ୍ଷୀ ଅଧୀକ୍ଷକ ସାଗରିକା ନାଥ ସୂଚନା ଦେଇଛନ୍ତି।
ଗିରଫ ଯୁବକଜଣକ ଶରତଙ୍କ ନାବାଳିକା ଝିଅ ମାଧ୍ୟମରେ ଏହି ଚୋରି ଚଳାଇଥିବା ଜଣାପଡ଼ିଥିଲା। ନାବାଳିକାଙ୍କ ବନ୍ଧୁ ସାଜିଥିବା ଯୁବକ ତାଙ୍କୁ ଡରାଇ ଧମକାଇ ଏହି ଚୋରି କରୁଥିଲେ। ଚୋରିଗହଣାକୁ ସେ ନେଇ ଅନ୍ୟ ଜଣଙ୍କୁ ଦେଉଥିଲେ। ଉକ୍ତ ଯୁବକ ସବୁ ସୁନାଗହଣା ତାଙ୍କ ସ୍ତ୍ରୀ ଓ ଭଉଣୀ ପାଖରେ ରଖୁଥିଲେ। ସେଥିରୁ ଆବଶ୍ୟକ ମୁତାବକ ସୁନାବନ୍ଧକ ଦେଇ ବାଲେଶ୍ୱରର ଆଇଆଇଏଫ୍ଏଲ୍ ଫାଇନାନ୍ସରୁ ଗୋଲଡ ଲୋନ୍ ଓ ଫେଡେରାଲ ବ୍ୟାଙ୍କର ନିଧିପଣ୍ଡା ବ୍ରାଞ୍ଚରୁ ଋଣ ନେଇଛନ୍ତି। ଏପରିକି ସୁନା ଋଣରୁ ଯୁବକଜଣକ ଏକ ୟାମାହା ବାଇକ୍ କିଣିଥିବା ଜଣାପଡ଼ିଛି। ନାବାଳିକାଙ୍କ ମାଧ୍ୟମରେ ସୁନା ଆଣୁଥିବା ଯୁବକଜଣକ ଗିରଫ ହୋଇଥିବା ବେଳେ ଅନ୍ୟ ଦୁଇଜଣ ଫେରାର ଅଛନ୍ତି। ସେମାନଙ୍କୁ ଖୁବ୍ଶୀଘ୍ର ଗିରଫ କରାଯିବ ବୋଲି ଏସ୍ପି ସୂଚନା ଦେଇଛନ୍ତି। ଖବରଦାତା ସମ୍ମିଳନୀରେ ସିଟି ଡିଏସ୍ପି ଗାୟତ୍ରୀବାଳା ପ୍ରଧାନ ଓ ସହଦେବଖୁଣ୍ଟା ଥାନାଧିକାରୀ ଶୁଭ୍ରାଂଶୁ ଶେଖର ନାୟକ ଉପସ୍ଥିତ ଥିଲେ।
