ଲଙ୍ଗଳେଶ୍ୱର,୧୧ା୯ (ଡି.ଏନ.ଏ.)-ପ୍ରାକୃତିକ ବିପର୍ଯ୍ୟୟରୁ ରକ୍ଷା ପାଇବା ପାଇଁ ବାଲେଶ୍ୱର ଜିଲା ସମୁଦ୍ର ଉପକୂଳବର୍ତ୍ତୀ ଅଞ୍ଚଳରେ କେଉଁ ଆବହମାନ କାଳରୁ ବନୀ ଜଙ୍ଗଲ ସୃଷ୍ଟି କରାଯାଇଛି। ହେଲେ ସଂରକ୍ଷଣ କି ରକ୍ଷଣାବେକ୍ଷଣ ଦିଗରେ ଆବଶ୍ୟକ ପଦକ୍ଷେପ ନିଆଯାଉ ନ ଥିବାରୁ ଏହା ପ୍ରାୟ ଧ୍ୱଂସ ହେବାକୁ ବସିଲାଣି।
ସଦର ବ୍ଲକ କଷାଫଳ ମୁହାଣ, ଡୁବଡୁବି ନଦୀପାର୍ଶ୍ୱ ଓ ଓଡ଼ିଶା କୋଷ୍ଟ କେନାଲ ପାର୍ଶ୍ୱରେ ଥିବା ବନୀଜଙ୍ଗଲ ଏବେ ଧ୍ୱଂସାଭିମୁଖୀ। ସିଂଲା ଥାନା ରାଜଧାନୀ ଛକଠାରୁ ପଞ୍ଚୁପଡା ପୋଲ ପର୍ଯ୍ୟନ୍ତ ଥିବା ବନୀଜଙ୍ଗଲକୁ ଲୋକମାନେ ନିଜର ଆବଶ୍ୟକତା ଲାଗି କାଟି ପକାଉଛନ୍ତି। ପ୍ରାକୃତିକ ବିପର୍ଯ୍ୟୟରେ ବନୀଜଙ୍ଗଲ ଜନବସତିକୁ ସୁରକ୍ଷା ପ୍ରଦାନ କରିଥାଏ। ଅଧିକରୁ ଅଧିକ ବନୀ ଜଙ୍ଗଲ ସୃଷ୍ଟି, ସୁରକ୍ଷା ଏବଂ ରକ୍ଷଣାବେକ୍ଷଣ ପାଇଁ ବନବିଭାଗ ପକ୍ଷରୁ କୌଣସି ପଦକ୍ଷେପ ଗ୍ରହଣ କରାଯାଉନାହିଁ। ଜନବସତିର ସୁରକ୍ଷା ଏବଂ ମୃତ୍ତିକା ସଂରକ୍ଷଣ ପାଇଁ ରାଜ୍ୟ ସରକାର ହେନ୍ତାଳ ଓ ବନୀ ଜଙ୍ଗଲ ସୃଷ୍ଟି କରିବା ପାଇଁ ଲକ୍ଷ ଲକ୍ଷ ଟଙ୍କା ଖର୍ଚ୍ଚ କରୁଛନ୍ତି। ଲୋକଙ୍କୁ ସୁରକ୍ଷା ଦେଉଥିବା ବନୀଜଙ୍ଗଲ ଏବେ ନିଜେ ସୁରକ୍ଷା ଖୋଜୁଛି। ଏହାର ସୁରକ୍ଷା ଲାଗି ସାର୍ଥାର ପୂର୍ବତନ ସରପଞ୍ଚ ଦିଲୀପ କୁମାର ମହାନ୍ତି, ଭୂଦେ ସାହୁ, ବିଷ୍ଣୁ ଦିନ୍ଦା, ଜୟନ୍ତୀ ମୁର୍ମୁ, ତପନ ସାହୁ, ମଞ୍ଜୁଲତା ଗାଣ, ଦୀନବନ୍ଧୁ ବେହେରା ପ୍ରମୁଖ ବୁଦ୍ଧିଜୀବୀମାନେ ମତ ଦେଇଛନ୍ତି। ଏ ସମ୍ପର୍କରେ ଜିଲା ବନ ଅଧିକାରୀ ବିଶ୍ୱରାଜ ପଣ୍ଡା କହିଛନ୍ତି, ବନୀଜଙ୍ଗଲ ରକ୍ଷଣାବେକ୍ଷଣ ଦାୟିତ୍ୱ ବନବିଭାଗର। ଯଦି କେହି ଜଙ୍ଗଲ କାଟି ସଫା କରୁଛନ୍ତି ତେବେ ଏହାର ତଦନ୍ତ କରି କାର୍ଯ୍ୟାନୁଷ୍ଠାନ ନିଆଯିବ।
