ସାଲେପୁର,୪।୭(ଅରବିନ୍ଦ ଭୂୟଁା)ପ୍ରଥମ ସ୍ତ୍ରୀ ନିଜ ସ୍ବାମୀଙ୍କୁ ଛାଡପତ୍ର ଦେଇ ଅନ୍ୟତ୍ର ପଳାଇ ଯିବାର ୧୫ ବର୍ଷ ପରେ ସ୍ବାମୀ ପାଖକୁ ଫେରି ଅଦିନରେ ସାବିତ୍ରୀ ବ୍ରତ ପାଳନ କରିଛନ୍ତି। ଏହାକୁ ନେଇ ଏବେ ଦ୍ୱିତୀୟ ସ୍ତ୍ରୀ ଚିନ୍ତାରେ ପଡିଯାଇଛନ୍ତି। ଏଭଳି ଦେଖିବାକୁ ମିଳିଛି ସାଲେପୁର ଥାନା ଅଧୀନ ଏଲମାପୁର ଗ୍ରାମରେ।
ପ୍ରକାଶ ଯେ, ସାଲେପୁର ଥାନା ଅନ୍ତର୍ଗତ ଏଲମାପୁର ଗ୍ରାମର ଚତୁର୍ଭୁଜ ପଣ୍ଡା ୧୫ବର୍ଷ ତଳେ ଦେବସ୍ମିତା ପଣ୍ଡାଙ୍କୁ ବିବାହ କରିଥିଲେ। କୌଣସି କାରଣରୁ ଉଭୟଙ୍କ ମଧ୍ୟରେ ଛାଡ଼ପତ୍ର ହୋଇଥିଲା। ଇତିମଧ୍ୟରେ ଚତୁର୍ଭୁଜ ପ୍ରମୋଦିନୀ ପଣ୍ଡାଙ୍କୁ ଦ୍ୱିତୀୟ ବିବାହ କରିଥିବାବେଳେ ତାଙ୍କର ବର୍ତ୍ତମାନ ପୁଅ ଓ ଝିଅ ଅଛନ୍ତି। ୧୫ବର୍ଷ ପରେ ହଠାତ୍ ପ୍ରଥମ ସ୍ତ୍ରୀ ଦେବସ୍ମିତା ସ୍ବାମୀଙ୍କ ପାଖକୁ ଫେରିଛନ୍ତି। ଦେବସ୍ମିତା ସୁନ୍ଦର ହୋଇଥିବାରୁ ସ୍ବାମୀ ତାଙ୍କୁ ଗ୍ରହଣ କରିଥିଲେ। ଦେବସ୍ମିତା ମଧ୍ୟ ସ୍ବାମୀଙ୍କ ମନକୁ ଜିଣିବା ପାଇଁ ଅଦିନରେ ସାବିତ୍ରୀ ବ୍ରତ କରିବା ସହ ସମସ୍ତ ପ୍ରକାର ଚେଷ୍ଟା କରିଥିଲେ। ଏହି ଘଟଣାକୁ ଦ୍ୱିତୀୟ ପତ୍ନୀ ପ୍ରମୋଦିନୀ ବିରୋଧ କରିବାରୁ ପ୍ରଥମ ସ୍ତ୍ରୀ ତାଙ୍କୁ ମାରଧର କରିଥିଲେ। ଶେଷରେ ଏହି ଘଟଣା ଜପକୁଦ ଫାଣ୍ଡିରେ ପହଞ୍ଚତ୍ ଥିଲା। ସ୍ଥାନୀୟ ଭଦ୍ରବ୍ୟକ୍ତି ଓ ଉଭୟପକ୍ଷଙ୍କ ମଧ୍ୟରେ ଆପୋସ ସମାଧାନ କରାଯାଇଥିଲା। ପ୍ରଥମ ସ୍ତ୍ରୀଙ୍କୁ ସ୍ବାମୀ ଚତୁର୍ଭୁଜ ବାହାରେ ରଖିବା ସହ ଦ୍ୱିତୀୟ ସ୍ତ୍ରୀଙ୍କୁ ନିଜ ଘରେ ରଖିବେ ଓ କୌଣସି ନିର୍ଯାତନା ଦେବେ ନାହିଁ। ଉଭୟ ପିଲାଙ୍କୁ ସ୍ନେହ ଶ୍ରଦ୍ଧା କରିବା ସହ ସେମାନଙ୍କର ଯାବତୀୟ ଆବଶ୍ୟକତାକୁ ପୂରଣ କରିବା ପାଇଁ ସ୍ଥିର କରାଯାଇ ଏହି ଘଟଣାର ସମାଧାନ କରାଯାଇଥିଲା। ଏ ସମ୍ପର୍କରେ ଫାଣ୍ଡି ଅଧିକାରୀ ରତ୍ନାକର ପ୍ରଧାନଙ୍କୁ ପଚାରିବାରେ ଦ୍ୱିତୀୟ ସ୍ତ୍ରୀ ଏକ ଅଭିଯୋଗ ଫାଣ୍ଡିରେ କରିଥିଲେ। ଉଭୟପକ୍ଷ ଓ ଭଦ୍ରବ୍ୟକ୍ତିମାନଙ୍କ ଉପସ୍ଥିତିରେ ସେମାନଙ୍କ ମଧ୍ୟରେ ଆପୋଷ ସମାଧାନ ହୋଇଥିବା ସେ ପ୍ରକାଶ କରିଥିଲେ। ଏହି ଘଟଣା ଏବେ ସାଲେପୁର ଅଞ୍ଚଳରେ ମୁଖ୍ୟ ଚର୍ଚ୍ଚାର ବିଷୟ ହୋଇଛି। ବିଶେଷ କରି ପ୍ରଥମ ସ୍ତ୍ରୀ ସ୍ବାମୀଙ୍କୁ ଧରି ଅଦିନରେ ସାବିତ୍ରୀ ବ୍ରତ ପାଳନ କରୁଥିବା ସୋସିଆଲ୍ ମିଡ଼ିଆରେ ଭାଇରାଲ୍ ହେବାରେ ଲାଗିଛି।
