ଜୁନାଗଡ଼,୧୬।୧(ଡି.ଏନ୍.ଏ.): କଳାହାଣ୍ଡି ଜିଲା ଜୁନାଗଡ଼ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଶନିବାର କୋଭିଡ-୧୯ ଟିକାକରଣ କାର୍ଯ୍ୟକ୍ରମ ଆରମ୍ଭ ହୋଇଛି। ଏଥିରେ ଜୁନାଗଡ଼ ବିଡିଓ ଦୁଲାରାମ ମାରାଣ୍ଡି ଅତିଥି ଭାବେ ଯୋଗଦେଇ ଏହି ଟିକାକରଣ କାର୍ଯ୍ୟକ୍ରମର ଶୁଭାରମ୍ଭ କରିଥିଲେ। ପ୍ରଥମ ବ୍ୟକ୍ତି ଭାବେ ଡାକ୍ତରଖାନାର ସଫେଇ କର୍ମଚାରୀ ଅଶୋକ ବାଗଙ୍କୁ ଟିକା ଦିଆଯାଇଛି। ପ୍ରଥମ ଦିନରେ ସ୍ବାସ୍ଥ୍ୟ ବିଭାଗର ୧୦୦ ଜଣ କର୍ମଚାରୀ ଟିକା ନେବେ ବୋଲି ଜଣାପଡ଼ିଛି। ଏହି ଟିକାକରଣ କାର୍ଯ୍ୟକ୍ରମ ଶୁଭାରମ୍ଭ ସମୟରେ ସ୍ଥାନୀୟ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧିକାରୀ ଡାକ୍ତର ଭଗବାନ ପଣ୍ଡା,ତହସିଲାଦର ବେଦବ୍ୟାସ ଭୋଇ, ଗୋଷ୍ଠୀ କାର୍ଯ୍ୟକ୍ରମ ପ୍ରବନ୍ଧକ ସୁମେଶ୍ୱର ନାଏକ, ଡାକ୍ତର ବିବେକାନନ୍ଦ ମହାନନ୍ଦ,ଏମ୍ପି ପ୍ରତିନିଧି ମୁକେଶ ଅଗ୍ରୱାଲ ପ୍ରମୁଖଙ୍କ ସହ ସ୍ବାସ୍ଥ୍ୟ ବିଭାଗର କର୍ମଚାରୀମାନେ ଉପସ୍ଥିତ ଥିଲେ। କୋଭିଡ୍ ଟିକା ସୁରକ୍ଷିତ ଏଥିରେ କୌଣସି ଲୋକ ଭୟଭୀତ ହେବାର ନାହିଁ ବୋଲି ଜୁନାଗଡ଼ ଭାରପ୍ରାପ୍ତ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧିକାରୀ ଡାକ୍ତର ଭଗବାନ ପଣ୍ଡା ପ୍ରକାଶ କରିଛନ୍ତି।
