ଆମଷ୍ଟରଡାମ୍,୩୦ା୮: ଲିପୋପ୍ରୋଟିନ୍(ଏ) ହେଉଛି ଅଠାଳିଆ କୋଲେଷ୍ଟରଲର ମୁଖ୍ୟତଃ ଏକ ଆନୁବଂଶିକ ରୂପ। ଏହା ହୃଦ୍ରୋଗ ଓ ହୃଦ୍ଘାତଜନିତ ବିପଦ ବଢ଼ାଇଥାଏ। ବିଶ୍ୱରେ ପ୍ରଥମ ଥର ପାଇଁ ଲିପୋପ୍ରୋଟିନ୍(ଏ)ର ଚିକିତ୍ସା ଏକ ନୂଆ ଔଷଧରେ କରାଯାଇପାରିବ ବୋଲି ଅଧ୍ୟୟନରୁ ଜଣାପଡ଼ିଛି। ଉଚ୍ଚସ୍ତରର ଲିପୋପ୍ରୋଟିନ୍(ଏ) ହେଉଛି ଏଲ୍ଡିଏଲ୍ କୋଲେଷ୍ଟରଲ ସହ ସମାନ। ଏହାକୁ ବେଳେବେଳେ ବ୍ୟାଡ୍ କୋଲେଷ୍ଟରଲ କୁହାଯାଇଥାଏ। ଏହା ଅଧିକ ଅଠାଳିଆ ହୋଇଥିବାରୁ ଧମନୀରେ ରକ୍ତ ପ୍ରବାହକୁ ଅବରୋଧ ଆଶଙ୍କା ବଢ଼ାଇଥାଏ। ବିଶ୍ୱରେ ପ୍ରତି ୫ ଜଣରେ ଜଣକଠାରେ ଏହାର ପ୍ରଭାବ ପଡ଼ିଥାଏ, ଯାହାର ଏପର୍ଯ୍ୟନ୍ତ କୌଣସି ଅନୁମୋଦିତ ଚିକିତ୍ସା ଉପଲବ୍ଧ ନ ଥିଲା। ଅଷ୍ଟ୍ରେଲିଆର ମୋନାଶ୍ ୟୁନିଭର୍ସିଟିରେ ‘ମୁଭାଲାପ୍ଲିନ୍’ ନାମକ ଔଷଧର ପ୍ରଥମ ପରୀକ୍ଷା ମାନବ ଦେହରେ ସଫଳତାର ସହ କରାଯାଇଛି। ଲିପୋପ୍ରୋଟିନ୍(ଏ)ର ଚିକିତ୍ସା ପାଇଁ ଏହା ପ୍ରଥମ ଔଷଧ। ଏହା ଲିପୋପ୍ରୋଟିନ୍(ଏ)ର ସ୍ତରକୁ ସଫଳତାର ସହ ୬୫ ପ୍ରତିଶତ ପର୍ଯ୍ୟନ୍ତ ହ୍ରାସ କରିପାରିବ। ଉକ୍ତ ଔଷଧ ଶରୀରରେ ଲିପୋପ୍ରୋଟିନ୍(ଏ) ସୃଷ୍ଟିକୁ ରୋକିଥାଏ। ଉକ୍ତ ଗବେଷଣାକୁ ଆମଷ୍ଟରଡାମ୍ସ୍ଥିତ ୟୁରୋପିଆନ୍ ସୋସାଇଟି ଅଫ୍ କାର୍ଡିଓଲୋଜି କଂଗ୍ରେସରେ ଉପସ୍ଥାପନ କରାଯିବା ସହ ଜେଏଏମ୍ଏ (ଜର୍ନାଲ ଅଫ୍ ଆମେରିକାନ୍ ମେଡିକାଲ ଆସୋସିଏଶନ)ରେ ପ୍ରକାଶ ପାଇଛି। ଏହି ଔଷଧ କୋଲେଷ୍ଟେରଲ ଚିକିତ୍ସାରେ ନୂଆ ମୋଡ଼ ଦେବାକୁ ଯାଉଛି। ଏହା ଖାଇବା ଔଷଧ ହୋଇଥିବାରୁ ରୋଗୀଙ୍କ ଦ୍ୱାରା ଅଧିକ ଗ୍ରହଣୀୟ ହେବ ବୋଲି ଅଧ୍ୟୟନର ମୁଖ୍ୟ ତଥା ମୋନାଶ ୟୁନିଭର୍ସିଟିର ଭିକ୍ଟୋରିଆନ୍ ହାର୍ଟ ଇନ୍ଷ୍ଟିଚ୍ୟୁଟ୍ ଆଣ୍ଡ ଭିକ୍ଟୋରିଆନ୍ ହାର୍ଟ ହସ୍ପିଟାଲର ନିର୍ଦ୍ଦେଶକ ପ୍ରଫେସର ଷ୍ଟିଫେନ୍ ନିକୋଲ୍ସ କହିଛନ୍ତି। ଏଲ୍ଡିଏଲ୍ କମାଇବା ପାଇଁ ସାଧାରଣ ଭାବେ ଉପଲବ୍ଧ ହେଉଥିବା ଔଷଧ ଲିପୋପ୍ରୋଟିନ୍(ଏ)କୁ ସମାନ ସ୍ତରକୁ ହ୍ରାସ କରିପାରି ନ ଥାଏ। ଆନୁବଂଶିକ ହୋଇଥିବାରୁ ପଥ୍ୟ, ବ୍ୟାୟାମ କିମ୍ବା ଜୀବନ ଶୈଳୀରେ ପରିବର୍ତ୍ତନ ଦ୍ୱାରା ଏହାକୁ ନିୟନ୍ତ୍ରଣ କରିହୁଏ ନାହିଁ। ୬୦ ବର୍ଷ ପୂର୍ବରୁ ଲିପୋପ୍ରୋଟିନ୍(ଏ) ଠାବ ହୋଇଥିଲେ ମଧ୍ୟ ଏହାକୁ କମାଇବା ନିମନ୍ତେ ଔଷଧ ଏପର୍ଯ୍ୟନ୍ତ ଉପଲବ୍ଧ ନ ଥିଲା।
