ଚଣ୍ଡିଖୋଲ,୮ା୪(ଡି.ଏନ.ଏ.): ମାତ୍ର ୧୨ ହଜାର ଟଙ୍କାରେ ଶିଶୁପୁତ୍ରକୁ ବିକ୍ରିକରି ଦେଇଛନ୍ତି ବାପା। ଏଭଳି ଏକ ଘଟଣା ଦେଖିବାକୁ ମିଳିଛି ଯାଜପୁର ଜିଲା ବଡ଼ଚଣା ବ୍ଲକ ଶାସନ ପୁରୁଷୋତ୍ତମପୁରର ଆଦିବାସୀ ବସ୍ତି ଚମାରଖଟି ଗ୍ରାମରେ। ଏହି ଗ୍ରାମର ଘନ ସିକୁ ଓ ତାଙ୍କ ସ୍ତ୍ରୀ ସଙ୍ଗୀତା ସିକୁଙ୍କ ଗୋଟିଏ ପୁଅ ଓ ଦୁଇ ଝିଅ। ପୁଅ ବବୁଲଙ୍କ ବୟସ ୮ ବର୍ଷ ହେବ। ମାର୍ଚ୍ଚ ୩୦ ତାରିଖରେ ଘନ ପୁଅକୁ ନେଇ ଧର୍ମଶାଳା ଥାନା ଅନ୍ତର୍ଗତ ଆରୁହା ହାଟକୁ ଯାଇଥିଲେ। ସେଠାରେ ସେ ଜେନାପୁର ଥାନା ଅଞ୍ଚଳର ଜଣେ ବ୍ୟକ୍ତିଙ୍କୁ ବିକ୍ରି କରିଦେଇଥିଲେ। ସମ୍ପୃକ୍ତ ବ୍ୟକ୍ତି ତାଙ୍କୁ ୭ ହଜାର ଟଙ୍କା ଦେଇଥିଲେ। ଆଉ ୫ ହଜାର ଟଙ୍କା ପଛରେ ଦେବେ ବୋଲି କହିଥିଲେ।
୬ ତାରିଖ ଗୁରୁବାର ଦମ୍ପତିଙ୍କ ମଧ୍ୟରେ ଝଗଡ଼ା ହେବାରୁ ଏକଥା ପଦାକୁ ଆସିଛି। କେତେଜଣ ବ୍ୟକ୍ତି ଏ ସମ୍ପର୍କରେ ଜିଲା ଶିଶୁ ସୁରକ୍ଷା ଅଧିକାରୀ ନିରଞ୍ଜନ କରଙ୍କୁ ଜଣାଇବା ପରେ ସେ ତୁରନ୍ତ ଶିଶୁଟିକୁ ଉଦ୍ଧାର କରିବା ପାଇଁ ବଡ଼ଚଣା ଥାନାକୁ ନିର୍ଦ୍ଦେଶ ଦେଇଥିଲେ। ବଡ଼ଚଣା ପୋଲିସ ଜେନାପୁର ଅଞ୍ଚଳରେ ପହଞ୍ଚତ୍ ଶିଶୁପୁତ୍ରଙ୍କୁ ଉଦ୍ଧାରକରି ଆଣି ତାଙ୍କ ମା’ଙ୍କ ଜିମା ଦେଇଥିବା ଜଣାପଡ଼ିଛି। ନିଶା ଖାଇବା ପାଇଁ ଘନ ଶିଶୁପୁତ୍ରକୁ ବିକ୍ରିକରି ଦେଇଥିଲେ ବୋଲି ଶିଶୁପୁତ୍ରଙ୍କ ମା’ ସଙ୍ଗୀତା ପୋଲିସ ଆଗରେ ପ୍ରକାଶ କରିଛନ୍ତି। କିନ୍ତୁ ପିଲା ବିକ୍ରିର କାରଣ ସମ୍ପର୍କରେ କେହି ମୁହଁ ଖୋଲୁନାହାନ୍ତି।
