କେନ୍ଦୁଝର,୧୦ା୯(ସ୍ବ.ପ୍ର.): ଦୀର୍ଘ ୨୪ ଘଣ୍ଟା ବିତିଯାଇଥିଲେ ମଧ୍ୟ ବାଂଶପାଳ ବ୍ଲକ କେନ୍ଦୁଘାଟି ନିକଟ ବୈତରଣୀରେ ଶୁକ୍ରବାର ଅପରାହ୍ନରେ ଭାସି ଯାଇଥିବା ବ୍ୟକ୍ତିଙ୍କ ପତ୍ତା ମିଳିନାହିଁ। ପୋଲିସ ଓଡ୍ରାଫ୍ ଟିମ୍ ଜରିଆରେ ଖୋଜାଖୋଜା ଜାରି ରଖିଛି। ଫଳରେ ଆଶା ଓ ଆଶଙ୍କା ମଧ୍ୟରେ ପରିବାର ଏବଂ ଗ୍ରାମବାସୀ ରହିଛନ୍ତି।
ସୂଚନାଯୋଗ୍ୟ, ପୂର୍ଣ୍ଣଚନ୍ଦ୍ର ଦେହୁରୀ ତାଙ୍କ ପୁଅ ସହିତ ବ୍ୟାଙ୍କ କାମ ସାରି ଘରକୁ ଫେରୁଥିଲେ। ଗ୍ରାମକୁ ଯିବା ପାଇଁ ବୈତରଣୀରେ ସ୍ଥାୟୀ ପୋଲ ନ ଥିବାରୁ ପାଣିରେ ଅଧାବୁଡ଼ା ଅସ୍ଥାୟୀ ପୋଲରେ ଘରକୁ ଫେରୁଥିବା ବେଳେ ପୁଅ ବାଇକ୍ରେ ପାର ହେଉଥିବା ବେଳେ ପୂର୍ଣ୍ଣଚନ୍ଦ୍ର ଚାଲି ଚାଲି ପାର୍ ହେଉଥିଲେ। ଏହି ସମୟରେ ହଠାତ୍ ତାଙ୍କ ଗୋଡ଼ ଖସି ଯିବାରୁ ସେ ଭାସିଯାଇଥିଲେ। କିଛି ସମୟ ପୂର୍ବରୁ ବର୍ଷା ହୋଇଥିଲା। ତେଣୁ ନଦୀରେ ପାଣି ଅଧିକ ପ୍ରବାହିତ ହେଉଥିଲା। ଏଣୁ ସ୍ରୋତରେ ପୂର୍ଣ୍ଣଚନ୍ଦ୍ର ଭାସି ଯାଇଥିଲେ। ଖବର ପାଇ ନୟାକୋଟ ପୋଲିସ ଘଟଣାସ୍ଥଳରେ ପହଞ୍ଚି ଓଡ୍ରାଫ୍ ଟିମ୍ ଜରିଆରେ ଖୋଜାଖୋଜି ଆରମ୍ଭ କରିଥିଲା। ଏନେଇ ଏସ୍ଡିପିଓ ପି.ଜେ.ଟପୋ କହିଛନ୍ତି, ନୟାକୋଟ ପୋଲିସ ଏବଂ ତଳକୁ ବାମେବାରୀ ପୋଲିସ ଓଡ୍ରାଫ୍ ଜରିଆରେ ଖୋଜାଖୋଜି ଜାରି ରଖିଛନ୍ତି। ଖବର ଲେଖାହେବା ପର୍ଯ୍ୟନ୍ତ ପୂର୍ଣ୍ଣଚନ୍ଦ୍ରଙ୍କର କୌଣସି ପତ୍ତା ମିଳିନାହିଁ।
