ବ୍ରିସବେନ୍,୧୩।୧: ଅଷ୍ଟ୍ରେଲିଆ ଗସ୍ତରେ ହନୁମା ବିହାରୀ ଅନେକ ସମାଲୋଚନାର ସମ୍ମୁଖୀନ ହୋଇଥିଲେ। ପ୍ରଥମେ ଖରାପ ବ୍ୟାଟିଂ ପାଇଁ ଏବଂ ପରେ ଖରାପ ଫିଲ୍ଡିଂ ପାଇଁ । ପ୍ରଶଂସକମାନେ ଏହା ମଧ୍ୟ କହିଥିଲେ ଯେ ବିହାରୀ ଅନ୍ତର୍ଜାତୀୟ ସ୍ତରର ଖେଳାଳି ନୁହଁନ୍ତି। ସିଡନୀ ଟେଷ୍ଟର ଶେଷ ଦିନରେ ସେ ଆର ଅଶ୍ୱିନଙ୍କ ସହ ଦୃଢ ଇନିଂସ ଖେଳି ପ୍ରତ୍ୟେକ ସମାଲୋଚକଙ୍କ ମୁହଁ ବନ୍ଦ କରିଦେଇଥିଲେ। ସିଡନୀ ଟେଷ୍ଟର ପଞ୍ଚମ ଦିନରେ ୪୦୭ ରନର ଟାର୍ଗେଟକୁ ପିଛା କରୁଥିବା ଟିମ ଇଣ୍ଡିଆ ରିଷଭ ପନ୍ତ ଏବଂ ଚେତେଶ୍ୱର ପୂଜାରାଙ୍କୁ ଆଉଟ୍ ପରେ ପକାଇ ଅସୁବିଧାରେ ପଡ଼ିଥିଲା।
ଦଳ ପରାଜୟର ସଙ୍କଟ ଦେଇ ଗତି କରୁଥିଲା। ଏଭଳି ପରିସ୍ଥିତିରେ ଅଶ୍ୱିନ ଏବଂ ବିହାରୀ ବ୍ୟାଟିଂ କରି ଦିନର ଖେଳ ଶେଷ ପର୍ଯ୍ୟନ୍ତ କ୍ରିଜ୍ରେ ରହି ମ୍ୟାଚ ଡ୍ର କରିଥିଲେ। ହନୁମା ୨୩ ରନରେ ଏବଂ ଅଶ୍ୱିନ ୩୯ରନରେ ଅପରାଜିତ ରହିଥିଲେ। ଏହା ପରେ ବିହାରୀଙ୍କ ଉତ୍ସାହ ଚାରିଆଡ଼େ ପ୍ରଶଂସିତ ହେଉଛି। ସେ ବ୍ୟାଟିଂ ସମୟରେ ହାମଷ୍ଟ୍ରିଂ ଆଘାତ ସହ ବ୍ୟାଟିଂ କରୁଥିଲେ। ଏହା ସତ୍ତ୍ୱେ ସେ ୧୬୧ ବଲର ସମ୍ମୁଖୀନ ହୋଇଥିଲେ ୨୩ ରନ୍ କରିଥିଲେ ତାଙ୍କ ଆଘାତ ଏତେ ଗୁରୁତର ହୋଇଥିଲା ଯେ ମ୍ୟାଚ ସରିବା ପରେ ଡ୍ରେସିଂ ରୁମକୁ ଫେରୁଥିବାବେଳେ ସେ ବ୍ୟାଟ ସହାୟତା ନେଇ ଫେରୁଥିଲେ। ସମସ୍ତେ ବିହାରୀଙ୍କ ସାହସକୁ ସଲାମ କରୁଥିଲେ। ଛୋଟ ବେଳୁ ମଧ୍ୟ ସେ ବେଶ୍ ସଂଘର୍ଷ କରିଥିଲେ। ତାଙ୍କୁ ମାତ୍ର ୧୨ ବର୍ଷ ହୋଇଥିବାବେଳେ ତାଙ୍କ ପିତାଙ୍କ ମୃତ୍ୟୁ ହୋଇଥିଲା। ପିତାଙ୍କ ମୃତ୍ୟୁରେ ବିହାରୀ ଏତେ ଭାଙ୍ଗି ଯାଇଥିଲେ ଯେ, ସେ ପ୍ରାୟ ୫ ଦିନ ନିଖୋଜ ଥିଲେ। ଏହା ପରେ ତାଙ୍କ ମା’ ଜାଣିବାକୁ ପାଇଲେ ଯେ ସେ ଏହି ସମୟରେ ସ୍କୁଲ ଦଳ ପକ୍ଷରୁ ମ୍ୟାଚ ଖେଲି ଜିତିଛନ୍ତି। ସେ ସେହି ମ୍ୟାଚରେ ୮୨ ରନ ସଂଗ୍ରହ କରିଥିଲେ।
